«بايقوڭىر» اكك اق توراعاسىنىڭ ورىنباسارى ەسكەندىر سەيداحانوۆ عارىشتان مۇناي كەنىشىن بارلاۋ ماسەلەسىن كوتەردى. بۇل تۋرالى وبلىس اكىمىنىڭ ءباسپاسوز قىزمەتى ايماقتىڭ الەۋمەتتىك-ەكونوميكالىق دامۋ باعىتىن تالقىلاۋعا ارنالعان اكىمدىك اپپاراتى وتىرىسىنا سىلتەمە جاساپ حابارلادى.
ە. سەيداحانوۆتىڭ مالىمدەۋىنشە, ايماقتا ەكونوميكالىق الەۋەتتى ارتتىرۋدىڭ رەزەرۆتەرى از ەمەس. ماسەلەن, ۆانادي مەن سيرەك كەزدەسەتىن مەتالداردى ءوندىرۋدى رەتكە كەلتىرۋ قاجەت. ءبىز قازىر الەم بويىنشا ەڭ ساپالى فەرروسيليتسي ءوندىرۋدى مەڭگەردىك. سوندىقتان وزگە ونىمدەردى دە ەل يگىلىگىنە جاراتۋ ماقساتىمەن يننوۆاتسيا جانە نانوتەحنولوگيالار ورتالىعىن قۇرۋ قاجەتتىگى العى كەزەككە شىعىپ وتىر. ەندى مۇنايدى Deep Vision نوۋ-حاۋ تەحنولوگياسىنىڭ كومەگىمەن تەرەڭنەن ءوندىرۋدى قولعا الىپ, ۋكراينانىڭ «گەوفيزيكا جانە جەر پروبلەمالارى» ينستيتۋتى عالىمدارىمەن بىرگە عارىشتان مۇناي كەنىشىن بارلاۋ ءىسىن جۇرگىزۋىمىز كەرەك.
جيىندا وبلىستىڭ كليماتتىق احۋالىن جاقسارتۋعا سەپتىگىن تيگىزەتىن جەل, گيدرو جانە كۇن ەلەكتر ستانسالارىن سالۋ ءۇشىن يننوۆاتسيالىق ساراپشىلار توبىن قۇرۋ ماسەلەسى دە قوزعالدى. بۇل تاقىرىپقا ماڭىز بەرىلۋىنىڭ سەبەبى – وسى وڭىردە ءبىر جىلدىڭ 300-دەن اسا كۇنىندە اۋا رايى اشىق بولىپ تۇرادى. سوندىقتان كۇن ساۋلەسىن بالامالى قۋات كوزى رەتىندە پايدالانۋدىڭ مۇمكىندىگى بار.
اكتسيونەرلىك قوعام توراعاسى ورىنباسارىنىڭ كەلەسى ۇسىنىسى قىتايدىڭ حاربين قالاسىنىڭ وقىمىستىلارىمەن بىرگە مال جانە ەگىن شارۋاشىلىقتارىنا قاجەتتى تەحنولوگيالاردى ەنگىزۋگە بايلانىستى ايتىلدى. وبلىس اكىمى قىرىمبەك كوشەرباەۆ وسى جانە جوعارىدا ايتىلعان ۇسىنىستاردى پىسىقتاي كەلىپ, ناقتى ناتيجە بەرەتىن جوبالاردى جۇزەگە اسىرۋ قاجەتتىگىن ايتتى. ال وسى ىستەردى ءبىر ارناعا توعىستىرۋ ماقساتىندا كاسىپكەرلىك جانە تۋريزم, سىرتقى بايلانىستار جانە يندۋستريالدى-يننوۆاتسيالىق دامۋ باسقارمالارى قۇرىلادى. وتىرىستا سونداي-اق ءتيىستى سالالار باسشىلارىنا باسقارما باسشىلارىمەن بىرگە مەتاللۋرگيالىق كلاستەردى دامىتۋ تۇجىرىمداماسىن ازىرلەۋ جانە حاربين عالىمدارىمەن بىرلەسە جوبالاردى جۇزەگە اسىرۋ جونىندەگى كەلىسىمگە قول جەتكىزۋ تاپسىرىلدى.
ءامىرحان الماعانبەتوۆ,
«ەگەمەن قازاقستان».