بۇگىنگى تاڭدا جامبىل وبلىسى, سارىسۋ اۋدانىنىڭ قىستاۋداعى شارۋالارىن قاسقىرلاردىڭ كوبەيىپ كەتۋى الاڭداتىپ وتىر. ءبىر شارۋانىڭ وزىنەن جىل باسىنان بەرى ءىرىلى-ۇساقتى 11 مال شىعىن بولعان ەكەن. بۇل ارينە مال شارۋاشىلىعىمەن اينالىسىپ وتىرعان مالشىلارعا وڭاي بولمايتىنى انىق. دەگەنمەن, جەرگىلىكتى اكىمدىك شارۋالارعا كومەك قولىن سوزىپ, يت-قۇسپەن كۇرەسۋدە پارمەندىلىك تانىتۋدا.
«الدىڭعى دەمالىستا, ياعني, 30 قاراشا كۇنى جايىلما, يگىلىك, جاڭاتالاپ اۋىلدىق وكرۋگتەرىنە قاراستى 25 شارۋاشىلىق, وسى دەمالىس كۇنى جايىلما, دوسبول اۋىلدىق وكرۋگتەرىنە قاراستى 22 شارۋاشىلىق, بارلىعى 47 شارۋاشىلىقتىڭ قىستاۋلارى ارالانىپ, زەردەلەندى. اۋىلدارداعى 47 شارۋاشىلىقتا 1979 ءمۇيىزدى ءىرى قارا, 16211 ۋاق مال, 1037 جىلقى, 730 تۇيە قىسقا تۇسكەن. مالدىڭ قوڭى جاقسى. كەي جەرلەردە جانتاق پەن يزەن قالىڭ. شارۋاشىلىقتار قىسقا قاجەتتى مال ازىعىمەن قامتىلعان. شارۋالاردى الاڭداتىپ وتىرعان ماسەلە – يت-قۇستىڭ كوبەيىپ كەتۋى. ءبىر شارۋادان جىلدىڭ باسىنان بەرى ءىرىلى-ۇساقتى 11 مال شىعىن بولعان», دەيدى سارىسۋ اۋدانىنىڭ اكىمى قاناتبەك مادىبەك.
اكىمنىڭ ايتۋىنشا, كۇن سۋىتقالى بەرى تاي-تۋلاقتى قويىپ, تۋ بيەلەر دە يت-قۇسقا جەم بولىپ جاتىر ەكەن. وسى ورايدا قاناتبەك مادىبەك زاڭ تالاپتارىنا ساي ءتيىمدى جوسپار قۇرۋ قاجەتتىگىن, سەبەبى بۇل مالدان بۇرىن ادامعا قاۋىپتى بولۋى مۇمكىن ەكەنىن ايتادى. جالپى, بۇگىندە اۋدان بويىنشا 168 شارۋا مالىمەن ەلدى مەكەندەردەن تىس جەرلەردە وتىر ەكەن.
جامبىل وبلىسى