سەيسەنبى كۇنى كەشكىسىن قاراعاندىدا چەمپيوندار ليگاسىنىڭ ەكىنشى ىرىكتەۋ كەزەڭىنىڭ ەكىنشى ويىنىندا دا بەلارۋستىڭ باتە-ءسىن 1:0 ەسەبىمەن جەڭگەن «شاحتەر» كومانداسى كەلەسى اينالىمعا شىقتى.
ەندى «شاحتەر» ءۇشىنشى كەزەڭدە البانيانىڭ چەمپيونى «سكەندەربەۋ» كومانداسىمەن كەزدەسەدى. ەگەر ونى جەڭسە, پلەي-وفف كەزەڭىنە شىعادى. بۇل «شاحتەردىڭ» ەۋروپا ليگاسىنىڭ توپتىق كەزەڭىندە وينايتىنىن بىلدىرەدى. دەمەك, كەزدەسۋدە جەڭىلسەك تە, ەۋروپا ليگاسىنىڭ توپتىق كەزەڭىندە وينايمىز. ال, جەڭسەك «شاحتەر» توپتىق تۋرنيرگە قاتىسىپ, ەۋروپانىڭ الاڭدارىندا كىلەڭ مىقتىلارمەن كۇش سىناسادى. ەندى «شاحتەردىڭ» سەيسەنبى كۇنى كەشكىسىن قارسىلاسىن ۇتىپ, بۇكىل قازاقستاندى وزىنە قاراتقان ويىنىنا كەلسەك, بۇل كەزدەسۋدە قاراعاندىلىق كوماندا بەلورۋستارعا قاراعاندا سەنىمدى وينادى. كەزدەسۋدە «شاحتەر» بارلىق جاعىنان باتە-دەن باسىم ءتۇستى.
قازىر بىزگە ويىننىڭ باستان اياق قالاي وتكەنىن ءتىزىپ, جازىپ وتىرۋدىڭ قاجەتى شامالى. ەرەكشە اتاپ وتەرلىك جايت, «شاحتەردىڭ» قورعانىسى مەن قاقپاشىسى الەكساندر موكيننىڭ جانقيارلىق ويىنى كوماندانىڭ جەڭىسكە جەتۋىنە كوپ كومەگى ءتيدى. ول قوناقتاردىڭ بارلىق سوققىلارىن قايتارىپ, ويىننىڭ سوڭىنا دەيىن قاقپانى تازا ساقتادى. بۇل كەزدەسۋدە قاقپانى باتە-ءنىڭ 15 سوققىسىن عانا ەمەس, 67-مينۋتتا ويدان شىعارىلعان پەنالتيدىڭ ءوزىن دە قايتارىپ تاستادى. كەزدەسۋدە «شاحتەردىڭ» قورعانىسى بەلورۋستاردىڭ بارلىق شابۋىلىنا توسقاۋىل قويىپ, گول سوعۋعا مۇلدەم مۇمكىندىك بەرمەدى. قايتا, بۇكىل ويىن بويى ءبىزدىڭ قورعاۋشىلار قارىمتا شابۋىلعا جاعداي تۋعىزىپ, شابۋىلشىلارعا كومەكتەسىپ وتىردى. سونداي كەزدىڭ بىرىندە قارسىلاستار الاڭىندا جالعىز جۇرگەن يگور زەنكوۆيچكە پاس شىعارىپ, ونىڭ گول سوعۋىنا جاعداي جاسادى. جالپى, «شاحتەردىڭ» سەيسەنبى كۇنگى ويىنى ءبارىمىزدىڭ كوڭىلىمىزدەن شىقتى. ال ويىنشىلارى ويىن ورنەگىمەن, جانكەشتىلىگىمەن كوزگە ءتۇستى. ەڭ باستىسى, قاراعاندىلىقتار بۇكىل قازاقستاننىڭ اتىن ەۋروپا الاڭدارىن ايقايلاتىپ شىعاراتىنداي كوماندا ەكەنىن كورسەتتى.
بۇگىن ەۋروپا ليگاسىنىڭ ەكىنشى كەزەڭىنىڭ جاۋاپتى كەزدەسۋلەرى وتەدى. ءبىزدىڭ پاۆلوداردىڭ «ەرتىس» كومانداسى سىرت الاڭدا بوسنيا جانە گەرتسوگوۆينانىڭ «شيروكي بريەگ» كلۋبىمەن ويناسا, «اقتوبە» ءوز الاڭىندا نورۆەگيانىڭ «حەدد» كلۋبىن قابىلدايدى.
داستان كەنجالين,
«ەگەمەن قازاقستان».