اتىراۋ وبلىسى قۇرمانعازى اۋدانىنىڭ ازعىر ءوڭىرىنىڭ 8 مىڭداي تۇرعىنى جوعارى جىلدامدىقتى ينتەرنەتكە قول جەتكىزەدى دەپ حابارلايدى اتىراۋ وبلىسى وڭىرلىك كوممۋنيكاتسيالار قىزمەتى.
ايماقتاعى شالعاي ەلدى مەكەندەردى دامىتۋعا ەرەكشە ماڭىز بەرىلۋدە. بۇل تۋرالى وبلىس اكىمى نۇرلان نوعاەۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا مالىمدەدى. قازىرگى ۋاقىتتا رەسەي فەدەراتسياسىمەن شەكارالاس ايماقتا ورنالاسقان ازعىر اۋىلىنا جالپى ۇزىندىعى 377 شاقىرىم گاز قۇبىرى تارتىلدى. سونىمەن بىرگە شەكارا ماڭىنا جاقىن ورنالاسقان كەيبىر ەلدى مەكەندەر ەلەكتر قۋاتىن رەسەيدەن الىپ وتىرۋى سەبەپتى جاڭا ەلەكتر جەلىلەرىن جۇرگىزۋدىڭ جوبالىق-سمەتالىق قۇجاتتاماسى جاساقتالۋدا. جاقىن ارادا ينتەرنەت جەلىسى جۇرگىزىلەدى.
تسيفرلاندىرۋ ەنگىزىلۋىنىڭ ارقاسىندا 10 اۋىلداعى ءومىر دەڭگەيى ايتارلىقتاي جوعارىلاپ, الەۋمەتتىك قىزمەتتەرگە قولجەتىمدىلىك ارتا تۇسپەك. اتىراۋ جەرگىلىكتى جەلىلەر تەحنيكالىق تورابىنىڭ ديرەكتورى نۇرلان ماقۇلوۆتىڭ ايتۋىنشا, قازىرگى ۋاقىتتا اتالعان باعىتتا 160 شاقىرىم وپتيكالىق-تالشىقتى كابەل تارتىلدى.
- وپتيكالىق-تالشىقتى جەلى باتىس قازاقستان وبلىسىنىڭ بوكەي وردا اۋدانىنان تارتىلىپ جاتىر. ونىڭ جالپى ۇزىندىعى 185 شاقىرىم. ينتەرنەتكە قولجەتىمدىلىك جىلدامدىعى سەكۋندىنا 8 مەگابيتكە دەيىن جەتەتىن بولادى. جىل سوڭىنا دەيىن ينتەرنەتپەن 5 ەلدى مەكەن تولىقتاي قامتىلادى. بۇل ورايدا, جالپى جۇمىس اۋقىمى ەكى كەزەڭگە بولىنگەنىن اتاپ ءوتۋ كەرەك. جوبا تولىقتاي 2020 جىلدىڭ ناۋرىز ايىندا اياقتالادى, - دەدى نۇرلان ماقۇلوۆ.
اتىراۋ