الماتىدا ق.ي.ساتباەۆ اتىنداعى گەولوگيا ينستيتۋتىندا الەمگە ايگىلى اكادەميك, ورتالىق ازيا مەن قازاقستان ايەلدەرى اراسىنان شىققان العاشقى گەولوگ عالىم, كورنەكتى مەملەكەت قايراتكەرى پاتشايىم تاجىباەۆانىڭ 100 جىلدىق مەرەيتويى حالىقارالىق دەڭگەيدە وتە ءساتتى ءوتتى. ەكى كۇنگە سوزىلعان شارا قالىڭ قاۋىمعا وي سالعان تاعىلىمىمەن ەرەكشەلەندى.
ايتۋلى تۇلعانىڭ الىس-جاقىن شەتەلدەردەن كەلگەن ارىپتەستەرى مەن شاكىرتتەرى: ازەربايجان ۇلتتىق عىلىم اكادەمياسىنىڭ پرەزيدەنتى, گەولوگيا جانە گەوفيزيكا ينستيتۋتىنىڭ ديرەكتورى اكيف اليزادە, رەسەي عىلىم اكادەمياسىنىڭ اكادەميگى ۆيكتور كليپكو, تاجىكستاننان كەلگەن اكادەميك بوتىرجان ابدۋللاەۆ, نوۆوسىبىرلىك عۇلاما الەكساندرا لەۆيگەۆا, ۋفالىق پروفەسسور سابير مۇستافين جانە باسقالار پاتشايىم تاجىبايقىزىنىڭ قازاقستانداعى ليتولوگيا عىلىمىنىڭ نەگىزىن قالاعانىن, جەزقازعان, باتىس قازاقستان, قۇمكول, تاعى باسقا ولكەلەردەگى جەر استى بايلىعىن ەل يگىلىگىنە جاراتۋعا ايانباي اتسالىسقانىن, قر جوعارعى كەڭەسىنىڭ دەپۋتاتى, ۆيتسە-سپيكەر مىندەتتەرىن ءمىنسىز اتقارىپ, ءوزىنىڭ اسا ۇلكەن بەدەلىن ەل ومىرىنە قاتىستى پروبلەمالاردى شەشۋگە ارناعانىن, سول ماقساتپەن كسرو مينيسترلەر كەڭەسىنىڭ توراعاسى ا.كوسىگيننىڭ قابىلداۋىندا بولعانىن, ول قابىلداۋدىڭ قازاقستاننىڭ عانا ەمەس, گەولوگيا عىلىمىنىڭ دامۋىنا قۋاتتى سەرپىن بەرگەنىن اسقان ريزاشىلىقپەن ەسكە الدى...
مەرەيتويدىڭ ءبىرىنشى ءبولىمى – سالتاناتتى ماجىلىستە سويلەگەن قر ۇلتتىق ينجەنەرلىك اكادەمياسىنىڭ ۆيتسە-پرەزيدەنتى نادير ناديروۆ, كورنەكتى مەملەكەت قايراتكەرى, عالىمنىڭ دوسى بيجامال رامازانوۆا, تۇركىستان وبلىسى تولە بي اۋدانىنداعى پاتشايىم تاجىباەۆا اتىنداعى №3 مەكتەپتىڭ ديرەكتورى قاليما يجانوۆا, عالىمنىڭ قىزى, اكادەميك, ءال-فارابي اتىنداعى قازاق ۇلتتىق ۋنيۆەرسيتەتىنىڭ وقىتۋشىسى, قۇرمەتتى كافەدرا مەڭگەرۋشىسى قۇرالاي اققوشقاروۆا, شىمكەنت قالاسىنداعى «ايعاق» تەلەارناسىنىڭ باس ديرەكتورى, تۇركىستان وبلىستىق ءماسليحاتىنىڭ دەپۋتاتى دۋلات ءابىش, جازۋشى قر مەملەكەتتىك سىيلىعىنىڭ لاۋرەاتى ءسابيت دوسانوۆ, قازىعۇرت اۋدانىنداعى پاتشايىم تاجىباەۆا اتىنداعى مەكتەپتىڭ وقۋ ءىسىنىڭ مەڭگەرۋشىسى التىنشاش قانىليەۆا, الماتى قالاسىنىڭ اكىمى باقىتجان ساعىنتاەۆتىڭ قۇتتىقتاۋ حاتىن تاپسىرعان اكىمنىڭ كەڭەسشىسى دانيار اليەۆ, الماتى قالاسى بوستاندىق اۋدانى ارداگەرلەر كەڭەسىنىڭ توراعاسى حاميت ءبىرجانوۆ, ت.ب. پاتشايىم تاجىباەۆانىڭ عىلىمداعى ەرلىگى مەن ەرەن قايراتكەرلىگى جايلى وي تولعاپ, ونىڭ جان دۇنيەسىنىڭ كىرشىكسىز تازالىعىن, اسقان ادامگەرشىلىگى جايلى تەبىرەنە سىر شەرتتى. اقىن مىڭباي ءراش پاتشايىم تاجىباەۆا جايلى ولەڭىن شابىتتانا وقىعاندا حالىق دۇركىرەتە قول سوقتى. ايگىلى كۇيشى, كومپوزيتور ءشامىل ابىلتاەۆ كەشتى انمەن كومكەردى.
ۇلى عالىمعا زور ءىلتيپات, ىستىق ىقىلاسپەن ءارى ىرىمداپ بالالارىنىڭ اتىن بەرگەن اتا-انالار دا كوپ. سولاردىڭ ءبىرى – ستۋدەنت پاتشايىم باتىربەكوۆانىڭ تەرەڭ سەزىممەن تەبىرەنە ايتقان قىسقا دا نۇسقا ءسوزى كوپتىڭ كوڭىلىنەن شىقتى.
مەرەيتويدىڭ ەكىنشى بولىمىندە ايگىلى عالىم جايلى «ەە يميا – پاتشايىم» – «پاتشايىم دەسە پاتشايىم» اتتى قازاق, ورىس تىلدەرىندە جارىق كورگەن كىتاپتىڭ تۇساۋى كەسىلدى. بۇل پاتشايىم تاجىباەۆا جايلى بۇدان بۇرىن جارىق كورگەن ەكى كىتاپتىڭ جالعاسى. مۇندا عالىم جايلى اسەرلى, مازمۇندى ەستەلىكتەر توپتاسقان.
مەرەيتويدىڭ ءۇشىنشى ءبولىمى – «اسا كورنەكتى عالىم پاتشايىم تاجىباەۆانىڭ قازاقستانداعى گەولوگيا عىلىمىنا قوسقان ۇلەسى» تاقىرىبىنداعى حالىقارالىق عىلىمي كونفەرەنتسيادا شەتەلدىك جانە قازاقستاندىق عالىمدار گەولوگيا عىلىمىنىڭ جەتىستىكتەرى مەن پروبلەمالارى جايلى ويلارىمەن ءبولىستى.
بۇل ادەتتەگى مەرەيتويلاردىڭ ءبىرى ەمەس, ايتارى انىق, بوياۋى قانىق, تاعىلىمى مول, تاربيەلىك ءمانى زور, اسا اسەرلى كەش بولدى.