الماتى قالاسىندا ماتەريالدىق ەمەس مادەني مۇرانى ساقتاۋ مەن ىلگەرىلەتۋ ماسەلەلەرىنە, سونداي-اق 2003 جىلعى كونۆەنتسيانى ىسكە اسىرۋ بارىسىنا جۇرگىزىلگەن ورتا مەرزىمدى باعالاۋعا ارنالعان ۇلتتىق دوڭگەلەك ۇستەل ءوتتى, دەپ حابارلايدى Egemen.kz.
ءىس-شاراعا قازاقستان رەسپۋبليكاسى مادەنيەت جانە اقپارات مينيسترلىگىنىڭ, يۋنەسكو حاتشىلىعىنىڭ, قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ, ساراپشىلار قاۋىمداستىعى مەن ەلىمىزدىڭ وڭىرلەرىنىڭ وكىلدەرى قاتىستى.
ءىس-شارا 2025-2026 جىلدارعا ارنالعان يۋنەسكو-نىڭ تەحنيكالىق گرانتى اياسىندا جۇزەگە اسىرىلىپ جاتقان ەكى كۇندىك باعدارلامانىڭ العاشقى كۇنى شەڭبەرىندە ءوتتى. قازىرگى ۋاقىتتا گرانت پيلوتتىق رەجيمدە قازاقستاننىڭ بەس وڭىرىندە – جەتىسۋ, اتىراۋ, شىعىس قازاقستان, قاراعاندى جانە قىزىلوردا وبلىستارىندا ىسكە اسىرىلۋدا. اتالعان وڭىرلەردە گرانتتى ءتيىمدى باسقارۋدى قاداعالاپ, ونىڭ ورىندالۋىنا تۇراقتى مونيتورينگ جۇرگىزەتىن ارنايى جۇمىس توپتارى قۇرىلعان.
جيىندا قر پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا ۇلتتىق مادەني داستۇرلەردى جۇيەلى تۇردە مەملەكەتتىك قولداۋدىڭ ماڭىزىن اتاپ ءوتىپ, وسى باعىتتا ناقتى پراكتيكالىق شەشىمدەر ازىرلەۋ قاجەتتىگىنە توقتالدى.
وڭىرلەر الدىندا قازاقتىڭ ءداستۇرلى مادەنيەتىنىڭ ۇمىت قالعان ەلەمەنتتەرىن جاڭعىرتۋ جانە ولاردى كەڭىنەن ناسيحاتتاۋدىڭ زاماناۋي تاسىلدەرىن, سونىڭ ىشىندە تسيفرلىق مەديانى ەنگىزۋ مىندەتى تۇر.
«مەملەكەت باسشىسى ۇلتتىق قۇرىلتاي وتىرىسىندا اتاپ وتكەندەي, شىنايى وتانشىلدىق ناقتى ىستەن, تۋعان جەرگە دەگەن سۇيىسپەنشىلىكپەن جانە قوعامعا قىزمەت ەتۋگە دايىن بولۋدان كورىنەدى. وتباسىندا ۇقىپتىلىقپەن ساقتالىپ, ۇرپاقتان ۇرپاققا جالعاسىپ كەلە جاتقان بىرەگەي مۇرا مەملەكەت تاراپىنان ناقتى قولداۋعا يە بولىپ, زاماناۋي مادەني ورتادا تولىققاندى دامۋى قاجەت. 2003 جىلعى كونۆەنتسيا ماتەريالدىق ەمەس مۇرا تۇجىرىمداماسى رەتىندە قازاقستان قوعامىنىڭ قۇندىلىقتارىمەن تولىق ۇندەسەدى», دەدى ايدا بالاەۆا.
يۋنەسكو-نىڭ 2003 جىلعى كونۆەنتسيا حاتشىلىعىنىڭ باسشىسى فۋميكو وحيناتا حالىقارالىق كومەك تەتىگىنىڭ كونۆەنتسيانى ىسكە اسىرۋداعى نەگىزگى قۇرالداردىڭ ءبىرى رەتىندەگى ماڭىزىن ەرەكشە اتاپ ءوتتى.
«قازاقستاننىڭ ماتەريالدىق ەمەس مادەني مۇراسىنىڭ ۇلتتىق ءتىزىمى جاڭارتىلىپ, ەلدىڭ ءارتۇرلى وڭىرلەرىندەگى جەرگىلىكتى قاۋىمداستىقتاردىڭ الەۋەتى نىعايتىلعانىن كورۋ – قۋانىشتى جايت. ءبىز قازاقستاندىق مەملەكەتتىك ورگاندار مەن قاۋىمداستىقتاردىڭ جۇمىسىن جوعارى باعالايمىز جانە بۇل تاجىريبە وزگە ەلدەردى دە حالىقارالىق كومەك تەتىگىن بەلسەندىرەك پايدالانۋعا ىنتالاندىرادى دەپ سەنەمىز», دەدى فۋميكو وحيناتا.
تالقىلاۋ قورىتىندىسى بويىنشا دوڭگەلەك ۇستەل بارىسىندا ايتىلعان ۇسىنىستار جۇيەلەندىرىلىپ, الداعى جۇمىستا ەسكەرىلەتىنى اتاپ ءوتىلدى.
بۇگىندە يۋنەسكو جوباسىنىڭ ءبىرىنشى كەزەڭىن ىسكە اسىرۋ اياسىندا قولدانىستاعى ۇلتتىق تىزىمدەگى 79 ەلەمەنتتىڭ 56-سى قۇجاتتالعان, ماتەريالدىق ەمەس مادەني مۇرانىڭ 277 يەسىمەن سۇحبات جۇرگىزىلگەن.
سونىمەن قاتار بەس پيلوتتىق وڭىردە وقىتۋ سەمينارلارى وتكىزىلدى. قازىرگى ۋاقىتتا قازاقستاننىڭ ماتەريالدىق ەمەس مادەني مۇرا يەلەرىنىڭ ينتەراكتيۆتى دەرەكتەر بازاسىن جاساۋ جۇمىسى جۇرگىزىلىپ جاتىر.سونداي-اق ەكى سالالىق سەكتسيا ءوتىپ, وندا اۋىزشا جانە ەپيكالىق مۇرا ماسەلەلەرى, بەيىندى ماماندار دايارلاۋ, قۇجاتتىق مۇرانى دامىتۋ, ونى تسيفرلاندىرۋ جانە قورلارعا قولجەتىمدىلىكتى كەڭەيتۋ, سونداي-اق بالالار مەن جاسوسپىرىمدەردى تاربيەلەۋدە ءداستۇرلى ويىندار مەن فولكلورلىق سايىستاردى پايدالانۋ ماسەلەلەرى تالقىلاندى.
باعدارلامانىڭ ەكىنشى كۇنىنە پيلوتتىق وڭىرلەردىڭ وبلىستىق بۋىن باسشىلارىنا ارنالعان جابىق وقىتۋ سەمينارى, جەرگىلىكتى دەڭگەيدە ماتەريالدىق ەمەس مادەني مۇرا ەلەمەنتتەرىن ايقىنداۋ جانە دامىتۋ جونىندەگى سەمينار-بريفينگ, سونداي-اق يۋنەسكو-نىڭ تەحنيكالىق گرانتىن ىسكە اسىرۋعا ارنالعان جۇمىس كەڭەسى جوسپارلانعان.