نەگىزگى ۇبت-عا وتىنىشتەردى قابىلداۋ 11–25 ءساۋىر ارالىعىندا وتەدى. وسى كەزەڭدە تالاپكەرلەرگە نەگىزگى ۇبت-نى ەكى رەت تاپسىرىپ, ەڭ جوعارى ناتيجەمەن گرانت كونكۋرسىنا قاتىسۋ مۇمكىندىگى بەرىلەدى. بۇل تۋرالى عىلىم جانە جوعارى ءبىلىم مينيسترلىگى حابارلادى, دەپ جازادى Egemen.kz.
ءبىرىنشى ءوتىنىشتى 11–16 ءساۋىر ارالىعىندا, ال ەكىنشىسىن 17–25 ءساۋىر ارالىعىندا ۇمىتكەردىڭ قالاۋى بويىنشا تاپسىرۋعا بولادى. تەستىلەۋدىڭ ءوزى 10 مامىردان 10 شىلدەگە دەيىنگى كەزەڭدە وتەدى.
ۇبت-عا قاتىسۋعا ءوتىنىش ۇلتتىق تەستىلەۋ ورتالىعىنىڭ سايتى نەمەسە UTO.kz قوسىمشاسى ارقىلى بەرىلەدى. تالاپكەرلەرگە تەستىلەۋ كۇنىن, ۋاقىتىن جانە ورنىن تاڭداۋ مۇمكىندىگى بەرىلەدى. سونىمەن قاتار ولار ەكى مۇمكىندىك ءۇشىن ءبىر عانا بەيىندىك پاندەر كومبيناتسياسىن تاڭداي الادى.
نەگىزگى ۇبت-عا دايىندىق دەڭگەيىن ارتتىرۋ ءۇشىن قاڭتار جانە ناۋرىز ايلارىنداعى ۇبت-دان وتكەن تالاپكەرلەرگە ءار ءپان بويىنشا جەكە تاقىرىپتىق تالداۋ ۇسىنىلعان. ياعني, ءار ۇبت-دان كەيىن (قاڭتار, ناۋرىز) تۇلەكتەر ءالسىز تاقىرىپتارىن جەتىلدىرىپ, دايىندالۋعا مۇمكىندىك الادى. سونداي-اق ءبىرىنشى مۇمكىندىكتەن كەيىن ەكىنشى تەستىلەۋگە دايىندىقتارىن جاقسارتۋعا ۋاقىت بەرىلەدى.
قوسىمشا رەتىندە ۇلتتىق تەستىلەۋ ورتالىعىنىڭ سايتىندا سىناق تەستتەرى ىسكە قوسىلادى.
ەمتيحان كەزىندە تەستىلەۋ باعدارلاماسىندا كالكۋلياتور, حيميالىق ەلەمەنتتەردىڭ پەريودتىق جۇيەسى جانە تۇزداردىڭ ەرىگىشتىك كەستەسى قولجەتىمدى بولادى. قوسىمشا تۇردە تالاپكەرلەرگە ىڭعايلى بولۋ ءۇشىن كەستەلەردىڭ قاعاز نۇسقالارى بەرىلەدى.
اپەللياتسياعا تالاپكەرلەر تەستىلەۋ اياقتالعاننان كەيىن 30 مينۋت ىشىندە ءوتىنىش بەرە الادى. اپەللياتسيا بەرگەن تالاپكەردىڭ سەرتيفيكاتى اپەللياتسيالىق كوميسسيا شەشىمى قابىلدانعاننان كەيىن جەكە كابينەتتە قولجەتىمدى بولادى.
وقۋعا ءتۇسۋ ءۇشىن ەڭ تومەنگى شەكتى بالدار وزگەرىسسىز قالادى:
ۇلتتىق جوعارى وقۋ ورىندارىنا — 65 بالل; باسقا جوعارى وقۋ ورىندارىنا — 50 بالل; «پەداگوگيكالىق عىلىمدار» ءبىلىم بەرۋ سالاسى بويىنشا — 75 بالل; «دەنساۋلىق ساقتاۋ» سالاسى بويىنشا — 70 بالل; «قۇقىق» باعىتى بويىنشا — 75 بالل.سونىمەن قاتار «قازاقستان تاريحى» جانە ەكى بەيىندىك ءپان بويىنشا ۇبت جانە شىعارماشىلىق ەمتيحاننان كەمىندە 5 بالل, ال «وقۋ ساۋاتتىلىعى» مەن «ماتەماتيكالىق ساۋاتتىلىق» پاندەرىنەن كەمىندە 3 بالل جيناۋ قاجەت. ايتا كەتۋ كەرەك, جوعارى وقۋ ورىندارى ءبىلىم بەرۋ باعدارلامالارى توپتارى بويىنشا وزدەرىنىڭ شەكتى بالدارىن بەلگىلەي الادى.
قاۋىپسىزدىكتى قامتاماسىز ەتۋ جانە قۇقىق بۇزۋشىلىقتاردىڭ الدىن الۋ ماقساتىندا تەستىلەۋگە كىرەر كەزدە تەلەفون, شپارگالكا سياقتى تىيىم سالىنعان زاتتاردى وتكىزبەۋ ءۇشىن قول جانە رامكالى مەتالل ىزدەگىشتەر قولدانىلادى.
ناۋرىزداعى ۇبت: تالاپكەرلەردىڭ 70%-ى شەكتى بالل جينادى
تەستىلەۋ اۋديتوريالارىندا رۇقسات ەتىلگەن ماگنيتتىك تولقىندار شەگىندە ۇيالى جانە راديوەلەكتروندىق بايلانىس سيگنالدارىن باسۋ قۇرىلعىلارى پايدالانىلادى, سونداي-اق بەينەباقىلاۋ جۇرگىزىلەدى.
ۇبت-2026 اياقتالعاننان كەيىن 31 قازانعا دەيىن بەينەجازبالارعا تالداۋ جۇرگىزىلەدى. تىيىم سالىنعان زاتتاردى قولدانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا تالاپكەردىڭ ۇبت ناتيجەلەرى جويىلادى.
ناۋرىزداعى ۇبت: 117 تالاپكەردىڭ ناتيجەسى جويىلدى