جامبىل وبلىسى: ءبىر كۇندە ءتورت نىسان اشىلدى

اشىلعان نىساننىڭ بارلىعى دا جاڭا اپپاراتتارمەن قامتىلعان. ەندى جىل سوڭىنا دەيىن اۋداننىڭ اقشولاق, ۇشبۇلاق, جەڭىس جانە قوساق ەلدىمەكەندەرىندە مەديتسينالىق تىرەكتەر اشۋ جوسپارلانىپ وتىر.

بۇگىن اشىلعان بايزاق اۋىلىنداعى «كەڭەس» فەلدشەرلىك-امبۋلاتوريالىق تىرەگى مەملەكەتتىك-جەكەمەنشىك ارىپتەستىك شەڭبەرىندە جۇزەگە اسىرىلىپ وتىر. اتالمىش دەنساۋلىق ساقتاۋ نىسانىنىڭ جالپى قۇنى 26 ميلليون تەڭگەنى قۇراعان. ون كەلۋشىگە ارنالعان تىرەك اۋىلدىڭ 1300-دەن استام حالقىنا قىزمەت كورسەتەتىن بولادى. جاڭا نىساننىڭ سالتاناتتى اشىلۋ راسىمىنە اۋدان اكىمى نۇرجان نۇرجىگىتوۆ قاتىسىپ, اۋىل تۇرعىندارىن قۇتتىقتادى. ءوز كەزەگىندە بوتامويناق اۋىلدىق وكرۋگى اقساقالدار القاسىنىڭ توراعاسى اسقار بەكباۋوۆ تۇرعىندار اتىنان مەملەكەتتىڭ قولداۋىنا دەگەن ريزاشىلىعىن ءبىلدىردى.

جاڭا الەۋمەتتىك نىساننىڭ لەنتاسىن بوتامويناق اۋىلدىق وكرۋگى اقساقالدار القاسىنىڭ توراعاسى اسقار بەكباۋوۆ پەن ەڭبەك ارداگەرى كەۋلىمجاي شارتىقباەۆ قيدى. بۇدان كەيىن اۋدان اكىمى مەن جەرگىلىكتى تۇرعىندار فەلدشەرلىك-امبۋلاتوريالىق تىرەكتىڭ قىزمەت بولمەلەرىن ارالاپ كوردى. تىرەكتە فەلدشەرلىك, ەكپە جانە قابىلداۋ بولمەلەرى ورنالاسقان. ولاردىڭ ءبارى دە تولىقتاي زاماناۋي جاڭا ۇلگىدەگى اپپاراتتارمەن جابدىقتالعان. مۇندا بىلىكتى ماماندار بۇگىننەن باستاپ اۋىل تۇرعىندارىنىڭ بارلىعىنا دا قاجەتتى مەديتسينالىق كومەك كورسەتۋدى باستاپ كەتتى.  

بۇدان كەيىنگى نىسان بوتامويناق اۋىلىنداعى مەديتسينالىق تىرەك. جالپى قۇنى 22 ميلليون تەڭگەنى قۇرايتىن تىرەك بەس كەلۋشىگە ارنالعان. سالتاناتتى شاراعا اۋدان اكىمىنىڭ ورىنباسارى ءداۋىر داۋلەتوۆ, اۋىلدىق اقساقالدار القاسىنىڭ توراعاسى ەسەنقۇل ماقۇلباەۆ قاتىسىپ, جىلى لەبىزدەرىن ءبىلدىردى.

اتالعان مەديتسينالىق تىرەك 5 ناۋقاستى ءبىر ساتتە قابىلداپ, كومەك بەرە الادى. مۇنداعى بىلىكتى ماماندار اۋىلداعى 454 تۇرعىنعا قاجەتتى مەديتسينالىق كومەك كورسەتۋدە. سونىمەن قاتار, بۇگىن 210 تۇرعىنى بار جاڭاساز اۋىلى مەن 224 تۇرعىنى بار باعارا اۋىلىندا دا بەس كەلۋشىگە ارنالعان مەديتسينالىق تىرەكتەر پايدالانۋعا بەرىلدى.

جامبىل وبلىسى