اقپارات جانە قوعامدىق دامۋ مينيسترلىگى مەن ازاماتتىق باستامالاردى قولداۋ ورتالىعىنىڭ قولداۋىمەن ىسكە اسىرىلعان «ەڭبەكقور جاستار» اقپاراتتىق كامپانياسى جۇمىسىنىڭ قورىتىندىسى شىعارىلدى. بۇل تۋرالى مينيسترلىكتىڭ ءباسپاسوز قىزمەتى حابارلادى.
جوبادا ەلىمىزدەگى اۋىل شارۋاشىلىعى سالاسىندا ەڭبەك ەتىپ جۇرگەن 30-دان استام جاس كاسىپكەردەن سۇحبات الىنىپ, وتاندىق بۇقارالىق اقپارات قۇرالدارىندا جاريالاندى. سونىمەن قاتار الەۋمەتتىك جەلى ارقىلى جاس كاسىپكەرلەردىڭ اتقارعان جۇمىستارى كەڭىنەن ناسيحاتتالدى. جوبانىڭ نەگىزگى ماقساتى جاس تا بولسا ءوز كاسىبىن اشىپ, ءىسىن ورگە سۇيرەپ جۇرگەن قىز-جىگىتتەردىڭ قوعامدا تانىلۋىنا, ناسيحاتتالۋىنا مۇمكىندىك بەرۋ.
جوبا اياسىندا كوپتىڭ كوڭىلىنەن شىققان جاس كاسىپكەرلەردىڭ ءبىرى – 25 جاستاعى ادەمى ەسەنشوراەۆا. ول الماتى مەن نۇر-سۇلتان قالالارىندا دانەكەرلەۋ تسەحتارىن جالعا الىپ, كاسىپ اشتى. سونىمەن قاتار, بۇل باستامانى اۋىلدى جەرلەردە دە ءساتتى جالعاستىرىپ وتىر. ال ماسكەۋدە جانە بۋەنوس-ايرەستە (ارگەنتينادا) وقىعان 28 جاستاعى اگرونوم داۋلەت باكيشەۆ پاۆلودار وبلىسىنداعى تۋعان اۋىلىندا اۋىل شارۋاشىلعى سالاسى بويىنشا ىلكىمدى جوبالاردى جۇزەگە اسىرۋدا.
ءىس-شارا اياسىندا «ەڭبەك نارىعىنىڭ جاڭا بولمىسىنداعى جاستار رەسۋرستىق ورتالىقتارىنىڭ الەۋەتى مەن ءرولى» تۇجىرىمداماسى تانىستىرىلدى.
PHD دوكتورى, زەرتتەۋ توبىنىڭ جەتەكشىسى جانارگۇل قۇلماعامبەتوۆانىڭ ايتۋىنشا, قازاقستاندا العاش رەت جاستار رەسۋرستىق ورتالىعى 2014 جىلى اشىلعان. مۇنداي ورتالىقتاردى اشۋداعى نەگىزگى مىندەت - جاستار مەن جاستار ۇيىمدارىنا قىزمەت كورسەتۋ. بۇگىنگى تاڭدا قازاقستان بويىنشا 208 جاستار رەسۋرستىق ورتالىعى جۇمىس ىستەيدى.
جاستار رەسۋرستىق ورتالىقتارى قىزمەتىنىڭ ماڭىزدى باعىتتارىنىڭ ءبىرى - جاستاردىڭ ومىرلىك ماڭىزدى داعدىلارى بويىنشا دامىتۋ, ازىرلەۋ جانە وقىتۋ.
بۇگىندە قازاقستاننىڭ ەكونوميكالىق بەلسەندى حالقىنىڭ تورتتەن ءبىر بولىگىن جاستار قۇرايدى. بۇل رەتتە سوڭعى بەس جىلدا جاستار اراسىنداعى جۇمىسسىزدىق دەڭگەيى 1,6 پايىزعا تومەندەدى.