قۇرلىقتىق حوككەي ليگاسىنىڭ (قحل) كەزەكتى تۋرىن ويىنىن ەكاتەرينبۋرتە وتكىزگەن نۇر-سۇلتاننىڭ «بارىسى» جەرگىلىكتى «اۆتوموبيليستەن» ايلاسىن اسىردى.
وتە شيەلەنىستى وتكەن باسەكەدە ەسەپ 19-مينۋتتا اشىلدى. قوناقتاردىڭ ساپىنداعى نيكيتا ميحايليستىڭ بەرگەن پاسىن اركادي شەستاكوۆ گولعا اينالدىردى. ودان كەيىن جارتى ساعاتتان اسا ۋاقىت بويى قوس كوماندا ءبىر-ءبىرىنىڭ قاقپا كىلتىن تابا المادى. تەك 51-مينۋتتا ايدىن يەلەرى تارازى باسىن تەڭەستىرە الدى.
تەڭ ەسەپ ويىن سوڭىنا دەيىن ساقتالدى. ال قوسىمشا ۋاقىتتا «بارىستىڭ» باعى جاندى. 64-مينۋتتا لينۋس ۆيدەلل نىسانانى ءدال كوزدەپ, ءوز كومانداسىنا جەڭىس اپەردى. ەسەپ – 1:2. ءبىر ايتا كەتەرلىگى, وسىدان بىرەر كۇن بۇرىن عانا ماگنيتوگورسكىنىڭ «مەتاللۋرگ» كلۋبىنا قارسى ويىندا دا ءدال وسى حوككەيشى وۆەرتايمدا گول سوعىپ, ەلوردالىق كومانداعا جەڭىس سىيلاعان ەدى.
وسى كۇنگە دەيىن 31 كەزدەسۋ وتكىزگەن «بارىس» قازىرگى كەزدە 40 ۇپايدى ەنشىلەپ وتىر. شىعىس كونفەرەنتسياسىندا نۇر-سۇلتاننىڭ حوككەيشىلەرى ءتورتىنشى ورىندا تۇرسا, تۇراقتى بىرىنشىلىكتىڭ جارىس كەستەسىندە 10-ساتىعا جايعاستى. ءوزىنىڭ كەلەسى كەزدەسۋىن جەرلەستەرىمىز 1 جەلتوقساندا ءوز مۇز ايدىنىندا مينسكىنىڭ «ديناموسىنا» قارسى وتكىزەدى.