بۇگىنگى تاڭدا ۇرپاق تاربيەسى, ونىڭ ىشىندە قىز بالالاردىڭ تاربيەسى وزەكتى ماسەلەگە اينالىپ وتىر. ارينە ەشكىم دە پەرزەنتىن جامان بولسىن دەپ تاربيەلەمەيدى. بىراق ۋاقىتتىڭ اعىمى, قوعامداعى ءتۇرلى جاعدايلاردىڭ ءبارى دە ادام ساناسىنا وزگەرىس اكەلمەي قويمايدى.
كەزىندەگى «قىزعا قىرىق ۇيدەن تىيىم» قاعيداسى بۇگىندە كوپ جاعدايدا ەسكەرىلمەي جاتاتىنى دا سوندىقتان بولسا كەرەك. بويجەتىپ كەلە جاتقان بۇلا قىزداردىڭ كەيبىرىنىڭ شالىس باسقان ءبىر قادامى ومىرلىك قاسىرەتكە اينالۋى مۇمكىن. جاۋاپكەرشىلىك جوعالعان جەردە ەشتەڭەنىڭ دە قالمايتىنىن «ويناپ ءجۇرىپ, وت باسقان» كەيبىر بويجەتكەندەردىڭ تاعدىرىنان كورۋگە بولادى. بۇلاي دەۋىمىزگە سەبەپ, بۇگىندە جامبىل وبلىسىنىڭ ءبىلىم وشاقتارىندا مەكتەپ جاسىندا ءجۇرىپ جۇكتى بولىپ قالعان قىزداردىڭ كوبەيۋى بولىپ وتىر. Nur Otan پارتياسى بالالار قۇقىعىن قورعاۋ جونىندەگى كەڭەس مۇشەسى رىستى جۇمابەكوۆا وسى ماسەلە توڭىرەگىندە جامبىلدىق شەنەۋنىكتەرگە شۇيلىككەن بولاتىن. راسىندا دا ەشكىمدى ۇرپاقتىڭ تاربيەسى بەيجاي قالدىرماۋى ءتيىس.
جامبىل وبلىستىق ءبىلىم باسقارماسىنىڭ باسشىسى راحيا تۇرماحانبەتوۆا وبلىستىق دەنساۋلىق ساقتاۋ باسقارماسىنىڭ مالىمەتى بويىنشا اعىمداعى جىلدىڭ 9 ايىندا ەرتە جۇكتىلىكپەن تىركەلگەن قىزدارعا قاتىستى تالداۋ جۇمىستارىنىڭ جۇرگىزىلگەنىن ايتادى. مالىمەتكە سۇيەنسەك, بۇگىنگى تاڭدا جامبىل وبلىسى بويىنشا بارلىعى 13 پەن 18 جاس ارالىعىندا جۇكتى بولىپ تىركەلگەن بويجەتكەندەردىڭ سانى 213-كە جەتكەن ەكەن. ولاردىڭ 113-ءى بۇگىندە كامەلەت جاسىنا تولىپ قويعان بولسا, 92 قىزدىڭ جاسى 16 مەن 17 جاس ارالىعىندا بولىپ شىقتى. ونىڭ ىشىندە 108 قازاق قىزى بولسا, قالعاندارى ورىس, نەمىس, دۇنگەن, تۇرىك, ازەربايجان, وزبەك, كۇرد, گرۋزين, تاجىك ۇلتىنىڭ وكىلدەرى ەكەن. ماسەلەن, تاراز قالاسىندا 2, بايزاق اۋدانىندا 1, جامبىل اۋدانىندا 1, ت.رىسقۇلوۆ اۋدانىندا 3 جانە شۋ اۋدانىندا 1 قىز 16 جاسقا دەيىن جۇكتى رەتىندە تىركەلىپتى. مۇنداي جاعدايلاردى بويجەتكەندەردىڭ ءوز ومىرلەرىنە بەيجاي قاراعانىنان تۋىنداپ وتىرعان ماسەلە دەۋگە بولادى. ال پسيحولوگتاردىڭ ايتۋىنشا, قىز بەن جىگىتتىڭ اراسىنداعى الدامشى سەزىم, سونىمەن قاتار جەكە جاۋاپكەرشىلىكتىڭ جوقتىعى دا وسىنداي جاعدايلارعا اكەپ سوقتىرۋى مۇمكىن ەكەن.
«اتاپ ايتقاندا, بۇل 8 قىزدىڭ 4-ەۋى كوللەدجدەردە وقىپ ءجۇرىپ تىركەلسە, قالعان 4-ەۋى مەكتەپتە وقىپ ءجۇرىپ تىركەلگەن. بۇگىندە بۇل قىزداردىڭ 7-ەۋى كوللەدج ستۋدەنتى بولسا, ال بىرەۋى كەشكى مەكتەپتە وقۋىن جالعاستىرۋدا. ۇلتتىق بولىنىسىنە كەلسەك, ولاردىڭ ىشىندە 6 قازاق قىزى, 1 تۇرىك جانە 1 ورىس قىزى بار. 7 قىزدىڭ وتباسىلىق جاعدايى تومەن, 1 قىزدىڭ جاعدايى ورتاشا», دەيدى راحيا تۇرماحانبەتوۆا. باسقارما باسشىسىنىڭ ايتۋىنشا, ەرتە جۇكتىلىك بويىنشا تىركەلگەن بويجەتكەندەردىڭ دەنى نەگىزىنەن الەۋمەتتىك جاعدايى تومەن وتباسىلارىنان شىققاندار ەكەن. ال ولاردىڭ مۇنداي سوراقى جاعدايعا ۇرىنۋىنا ناقتى سەبەپتى تابۋ تاعى قيىن. دەگەنمەن مۇنداي كوكەيكەستى ماسەلە توڭىرەگىندە بۇگىندە وڭىردە قانداي جۇمىستار اتقارىلۋدا دەگەن ساۋالدىڭ ۇشى كورىنەدى. ارينە مۇنداي كەلەڭسىز جاعدايلار ورىن العاندا اۋەلى ولاردىڭ اتا-اناسى مەن مۇعالىمدەرىنىڭ جاۋاپ بەرەتىنى راس. بىراق ءوز اۋىرتپالىعىن وزگەلەرگە ارتقان بويجەتكەندەر نەگە اۋەلى ءوزىنىڭ ارى مەن ۇياتىن ويلامادى ەكەن دەگەن دە ويعا قالاسىڭ.
بۇل رەتتە راحيا تۇرماحانبەتوۆا ەرتە جۇكتىلىكتى جانە جىنىستىق سيپاتتاعى, سونىمەن قاتار بالالارعا قاتىستى زورلىق-زومبىلىق جانە قاتىگەزدىك كورسەتۋدىڭ الدىن الۋ ماسەلەلەرى بويىنشا جۇرگىزىلىپ جاتقان جۇمىستار تۋرالى دا ايتىپ بەردى. اتا-انالار قاۋىمىن بالا تاربيەسىنە ءتيىستى دەڭگەيدە قامتۋ ماقساتىندا جىل سايىن اتا-انالار فورۋمى ۇيىمداستىرىلىپ, ءتيىستى ۇندەۋلەر قابىلدانۋدا ەكەن. ء«جاسوسپىرىم قىزدار اراسىندا ەرتە جۇكتىلىكتىڭ الدىن الۋ ماقساتىندا ءبىلىم مەكەمەلەرى ۇكىمەتتىك ەمەس ۇيىمدارمەن بىرلەسكەن جۇمىستار جۇرگىزۋدە. سونىمەن قاتار وبلىستىق ءبىلىم باسقارماسى ءبىلىم بەرۋ مەكەمەلەرىندە كامەلەتكە تولماي جۇكتى بولىپ ەسەپكە الىنعان جاسوسپىرىمدەردىڭ ەرتە جۇكتىلىگىنىڭ الدىن الۋ, سەكسۋالدى سيپاتتاعى قىلمىستاردى ەرتە انىقتاۋ ماسەلەلەرىن ۇنەمى باقىلاۋدا ۇستايدى», دەيدى باسقارما باسشىسى.
بىراق بۇدان دا ماسەلەنىڭ شەشىلىپ كەتپەسى انىق. ادام بار جەردە ماسەلە بار. دەگەنمەن ەرتەڭ انا بولاتىن بۇگىنگى قىزدارىمىزدىڭ قىزىق قۋىپ, جالعان سەزىمنىڭ جەتەگىندە كەتىپ جاتۋى ويلانتارلىق جاعداي. بۇعان اتا-انانى دا, مۇعالىمدى دە كىنالاۋ ورىنسىز. قوعامدا اركىم ءوزىنىڭ ارىن, يمانىن ساقتاسا عانا ورەسكەل جاعداي ورىن المايدى دەۋگە بولادى. ال قىزداردى الداۋسىراتىپ, ءبىر ساتتىك قۇمارلىق ءۇشىن ەركىنە تۇساۋ سالا المايتىن بوزبالالاردىڭ دا بۇل ماسەلەگە كەلگەندە ويلانعاندارى دۇرىس-اق...
جامبىل وبلىسى