قازاقستان رەسپۋبليكاسى پارلامەنتى سەناتىنىڭ توراعاسى داريعا نازارباەۆا مەن سەناتورلار ەرەكشە اكتەرلەر تەاترىنىڭ ء«بىزدىڭ قانىمىز ءبىر» سپەكتاكلىندە بولدى. بۇل تۋرالى پارلامەنت پالاتاسىنىڭ ءباسپاسوز قىزمەتى حابارلادى.
وسىدان بىرنەشە جىل بۇرىن قازاقستاننىڭ ۇلتتىق دەلفي كوميتەتىندە تۋىنداعان ەرەكشە تەاتردى قۇرۋ يدەياسى جاستار جىلى جۇزەگە اسقان بولاتىن. دامۋىندا ەرەكشەلىكتەرى بار 12-22 جاس ارالىعىنداعى 50 جاس اكتەر وسى جوبانىڭ ارقاسىندا تەاتر الەمىنە – ونەر ولكەسىنە قادام باسىپ, قويىلىمعا قاتىستى.
سولتۇستىك قازاقستان وبلىسىنداعى پەتروپاۆل قالاسىنان كەلگەن ەرەكشە اكتەرلەر تەاترى «دەگدار» قايىرىمدىلىق قورىنىڭ قولداۋىمەن نۇر-سۇلتاندا ونەر كورسەتتى.
رەديارد كيپلينگتىڭ «دجۋنگلي كىتابى» پوۆەسى قويىلىمنىڭ نەگىزى بولعان ەدى. اكتەرلەردىڭ قيمىل قوزعالىسقا تولى ويىنى قۇلاعى ەستىمەيتىن ءارى مىلقاۋ بالا بەينەسىنىڭ قورشاعان ورتامەن قاقتىعىسى ارقىلى ەلدەگى وسى زامانعى كورىنىستەردى شىنايى كورسەتەدى. قوعامىمىزداعى دامۋىندا ەرەكشەلىكتەر بار ادامدار سياقتى كەيىپكەرگە دە دجۋنگليدەگى قيىندىقتاردى جەڭۋگە تۋرا كەلەدى.
سەنات توراعاسى سپەكتاكلدەن كەيىن اكتەرلەرمەن جانە تەاتر باسشىلارىمەن كەزدەسىپ, الەۋمەتتىك جوباعا قاتىسۋشىلارعا العىس ايتتى. داريعا نازارباەۆا سپەكتاكلدەن العان اسەرلەرىمەن ءبولىسىپ, بالالاردىڭ شەبەرلىكپەن سومداعان ويىنىن ەرەكشە اتاپ ءوتتى.
«وسى تەاتردىڭ عۇمىرلى ءارى تۇراقتى بولعانىن, بۇكىل ەلىمىزدە وسىنداي تەاترلاردىڭ اشىلعانىن قالايمىز. بۇل قولداۋدى ءارى دامىتۋدى قاجەت ەتەتىن تاماشا جوبا. سىزدەردىڭ ارقايسىلارىڭىز ايرىقشا دارىن مەن زور الەۋەتكە يە ەرەكشە بالاسىزدار», - دەدى داريعا نازارباەۆا.
داريعا نازارباەۆا كەزدەسۋ سوڭىندا سەنات دەپۋتاتتارىمەن, مەملەكەتتىك ورگانداردىڭ جانە جوبا باسشىلارىمەن بىرلەسە وتىرىپ, قوعام مەن مەملەكەتتىڭ جاستار مەن بالالاردىڭ الەۋمەتتىك جانە ەرىكتىلەر جوبالارىن قولداۋ مەن دامىتۋعا ارنالعان جۇيەلى قادامدارىن تالقىلادى.