بۇگىن الماتىداعى قازاقستان ءباسپاسوز كلۋبىندا حالىقتى ەمحاناعا تىركەۋ ناۋقانى ناتيجەلەرىن قورىتىندىلاۋعا ارنالعان ءباسپاسوز ءماسليحاتى كەزىندە «الەۋمەتتىك مەديتسينالىق ساقتاندىرۋ قورى» كەاق الماتى قالالىق فيليالىنىڭ ديرەكتورى تىلەۋحان ابىلداەۆ الماتىلىقتار مەديتسينالىق ساقتاندىرۋ قورىنا 47,3 ميلليارد تەڭگە اۋدارعانىن رەسمي تۇردە حابارلادى.
ال 2017 جىلدىڭ 1 شىلدەسىنەن باستاپ 2019 جىلدىڭ 21 قاراشاسىنان دەيىن مەديتسيانالىق ساقتاندىرۋ قورىنا 230 ميلليارد تەڭگە تۇسكەن.
«الماتى قالاسى بۇرىنعىداي وڭىرلەردىڭ ىشىندە تولەمدەر بويىنشا كوشباسشىلىقتى ۇستاپ تۇر – بۇل قورعا تۇسكەن قاراجاتتىڭ بەستەن ءبىرىن قۇرايدى. ونىڭ ىشىندە ءمامس-كە الماتىدان 1 ميلليون 421 مىڭ ادامعا تۇسكەن جالپى سوما 47,3 ميلليارد تەڭگەنى قۇرايدى. تولەمدەردىڭ نەگىزگى بولىگىن نەمەسە 44,8 ميلليارد تەڭگەنى جۇمىس بەرۋشىلەر اۋدارىپ وتىر», – دەدى فيليال ديرەكتورى.
سونداي-اق, ءوزىن ءوزى جۇمىسپەن قامتىپ وتىرعان 4900-دەن استام الماتىلىقتىڭ وزىنە قۇيعان ساقتاندىرۋ تولەمدەرىنىڭ بىرىڭعاي جيىنتىق سوماسى 16,7 ميلليون تەڭگە بولعان.
ەسكە سالا كەتۋ كەرەك, 2019 جىلدىڭ قاڭتارىنان باستاپ ەلدە بىرىڭعاي جيىنتىق تولەم ەنگىزىلگەن بولاتىن. بجت, باسقا دا الەۋمەتتىك تولەمدەردەن باسقا, وزىنە ءمامس تولەمدەرىن دە كىرىكتىرە وتىرىپ, تولەمشىلەرگە مىندەتتى الەۋمەتتىك مەديتسينالىق ساقتاندىرۋ جۇيەسىنە قاتىسۋعا مۇمكىندىك بەرەدى. بۇل تولەم تابىس تابۋعا ۇمتىلعان, بىراق جالدامالى جۇمىسشىلاردىڭ ەڭبەگىن پايدالانبايتىن, جەكە ادامداردىڭ جۇمىسىن ىستەپ نەمەسە قىزمەت كورسەتەتىن جەكە تۇلعالار اراسىندا قاراستىرىلعان. تولەم مەملەكەتتىك دەڭگەيدە ماڭىزدى قالالار مەن وبلىس ورتالىقتارىندا 1 اەك كولەمىندە, اۋىل تۇرعىندارى ءۇشىن 0,5 اەك قۇرايدى. ياعني, الماتى قالاسى ءۇشىن – 2 525 تەڭگە.
تىلەۋحان ابىلداەۆتىڭ ايتۋىنشا, ساقتاندىرۋ جۇيەسىن ەنگىزۋگە بايلانىستى بىرقاتار جۇمىستار اتقارىلىپ: نورماتيۆتىك-قۇقىقتىق بازا جاساقتالىپ, ءۇش دەڭگەيلى مەديتسينالىق قامتاماسىز ەتۋ جۇيەسى بەكىتىلىپ, ءمامس-ءتى ەنگىزۋگە بايلانىستى اقپاراتتىق جۇيەلەر دايىن بولعان.
الماتى