«ەل ءۇمىتى» سەنىم ۇيالاتتى

جاستار جىلى اياسىندا بويىندا ءبىلىمى مەن بىلىگى قاتار ورىلگەن قىز-جىگىتتەردىڭ باسىن قوسقان مارافوننىڭ باستى ماقساتى – تالانتتى بالالار مەن جاس­تاردى انىقتاپ, ولارعا ناقتى قول­داۋ كورسەتۋ. تابىستى بولۋ, باسەكەگە قابى­لەتتىلىك, پاتريوتيزم جانە بىلىمگە قۇش­تارلىق يدەيالارىن وزگە جاستارعا ۇلگى ەتىپ ۇسىنۋ. «ەل ءۇمىتى» مارافونى ەلى­مىزدىڭ جاستارىن بارىنشا قالىڭ كوپ­شىلىككە تانىستىرۋعا تىرىسادى, ولار­دىڭ ەرەكشەلىگىن, دارىندىلىعىن, عى­لىمي جانە كوشباسشىلىق الەۋەتىن ۇلگى رەتىندە ناسيحاتتاپ, بارشا جاس وتانداس­تارىن وتان ءۇشىن ەرىنبەي ەڭبەك ەتۋگە شاقىرادى.

وڭتۇستىك ايماقتاعى ءۇش وبلىس پەن ەكى مەگاپوليستىڭ ءبىلىم-بىلىگى جوعارى, تالعامى مەن تالابى ساي بەلسەندى جاس­تارىنان قۇرالعان دەلەگاتسيالاردى الماتى جاستارى قۇرمەتپەن قارسى الدى. جاس بولسا دا, جەتىستىككە جەتىپ ۇلگەرگەن دارىن­دى جاستارعا تۇڭعىش پرەزيدەنت – ەلباسى قورىنىڭ اتقارۋشى ديرەكتورى اسەت يسەكەشەۆ پەن الماتى قالاسىنىڭ اكىمى باقىتجان ساعىنتاەۆتىڭ ىقىلاسى دا الا-بوتەن بولدى.

«ەل جاستارىنىڭ ەڭ كوپ شوعىر­لانعان ورتالىعى الما­تى­دا «ەل ءۇمىتى» جوباسى قاتى­سۋ­شىلارىن قارسى الۋ – ءبىز ءۇشىن ۇلكەن قۋانىش. سىزدەر, قازاق­ستاننىڭ بولاشاعى, ەل ۇمى­تىسىزدەر. سىزدەردىڭ جەتىستىكتەرىڭىز – ەلىمىزدىڭ جەتىستىگى. بۇگىنگى مارافوننىڭ تۇڭعىش پرەزيدەنت كۇنى­نە ارنالىپ وتكىزىلىپ وتى­رۋى دا كەزدەيسوق ەمەس. ويت­كە­نى دارىندى جاستار مەن كوش­باس­شىلارعا قولداۋ كورسەتۋ, ودان ءارى دامىتۋ ەلباسىمىز ن.نازارباەۆتىڭ نازارىنان ەشقا­شان دا تىس قالعان ەمەس. «ەل ءۇمىتى» مارافونىنىڭ ەلباسىنىڭ قول­داۋىمەن يگى داستۇرگە اينالۋى – وسىنىڭ جارقىن دالەلى», دەدى قالا اكىمى ب.ساعىنتاەۆ.

الماتىدا 700 مىڭنان اس­تام جاس ءومىر سۇرەدى. ياعني, قالانىڭ ءاربىر ءۇشىنشى تۇر­عىنى – جاستار. ونىڭ 230 مىڭ­نان استامى – ستۋدەنت. ولار الماتىنىڭ 39 جوعارى وقۋ ورنىندا, 80 ورتا ءبىلىم بەرەتىن كوللەدجدە وقيدى. بيىل الماتىدا جۇمىسشى جاستارعا ارنالىپ جالعا بەرىلەتىن 1050 پاتەردىڭ كىلتى تابىستالدى. 2020 جىلى مەملەكەتتىڭ بۇل باعدارلاماسىنا الماتى قالاسى اكىمدىگى قوسىمشا «الماتى جاستارى» اتتى ءوز باعدارلاماسىن ۇسىنىپ, پاتەر سانىن بىرتە-بىرتە تاعى دا 1000-عا كوبەيتۋدى كوزدەپ وتىر. وسىلايشا جىل سايىن جاستار ءۇشىن بولىنەتىن پاتەر سانىن 2000-عا جەتكىزۋ جوسپارلانعان. جاستاردى جۇمىسپەن قامتۋ, ولاردىڭ كاسىبي قابىلەتىن ارتتىرۋ, كاسىپكەرلىك باستامالارىن قولداۋ – شاھار اكىمدىگىنىڭ باستى ماقساتى. الماتىعا ارمان قۋىپ كەلگەن جاستاردىڭ ءۇمىتىن ۇرلەپ, كەلەشەگىنە سەنىممەن قاراۋىنا ءوز تاراپىنان وسىلايشا قولۇشىن سوزباق. «ەل ءۇمىتى» مارافونى سول سەبەپتى دە الماتى ءۇشىن ستراتەگيالىق جاعىنان ماڭىزدى جوبا سانالادى.

قازاقستاننىڭ تۇڭعىش پرە­زي­دەن­تى – ەلباسى قورىنىڭ اتقا­رۋشى ديرەكتورى اسەت يسەكەشەۆتىڭ ءسوزى دە دارىندى جاستاردى دەمەۋگە باعىتتالدى. ەلباسى ن.نازارباەۆ حالىقتىڭ بۇگىنى مەن بولاشا­عى­نا قام­قور­لىق جاساۋدى ءوز ساياسا­تى­نىڭ نەگىزگى ءمانى دەپ سانايتىنىن اتاپ ءوتتى. پرەزيدەنت ق.توقاەۆ تا وسى باعىتتا جەمىستى جۇمىستى جالعاستىرىپ كەلەدى. «ەل ءومىرى» باستاماسى اياسىندا كوپتەگەن جاڭا جوبا قولعا الىندى. قۇرمەتتى جاستار! قازىرگى جىلدام وزگەرىپ جاتقان زامان مىنا سىزدەردەن, جاستاردان, مىقتى بولۋدى تالاپ ەتەدى. بارلىق سالا بويىنشا وزگەرىس كۇن سايىن ءجۇرىپ جاتىر. ءبىز سىزدەردى قولدايمىز. بۇگىنگى مارافون تەك ءبىرىنشى قادام, الدا ۇلكەن جۇمىس تۇر», دەدى ءا.يسەكەشەۆ. ونىڭ ايتۋىنشا, دۇنيەجۇزىلىك بانكتىڭ بولجامىنا سايكەس, الداعى ون جىلدا بۇگىنگى مەكتەپتەر مەن ۋنيۆەرسيتەتتەردە وقىپ جۇرگەن جاستاردىڭ جارتىسىنان استامى ءالى ومىرگە كەلمەگەن ماماندىقتار بويىنشا جۇمىس ىستەيدى. ال 2050 جىلدارعا قاراي جاڭا باعىتتا ءبىلىم الىپ, تاجىريبەسى تولىسقان وسى جاستار يگەرەتىن كاسىپتىڭ دەنىن جاساندى ينتەللەكت الماستىرادى. وتە جىلدام ءارى قارقىندى وزگەرىپ كەلە جاتقان ۋاقىت اعىنى جاستاردىڭ ۇزدىكسىز ءبىلىم الۋىن, ەرىنبەي ەڭبەكتەنۋىن, سەرگەك بولۋىن قاجەت ەتىپ وتىر. ومىرگە كەلگەن ءار ادامنىڭ بويىندا قابىلەت بولادى, تەك ونىڭ كوزىن اشىپ, ۇشتاي ءبىلۋى ماڭىزدى.

الماتىلىق كريستينا بەك­مىرزاەۆا بىلتىر عانا كۇردەلى جون­دەۋ جۇر­گىزى­لىپ, مۇلدە جاڭا سيپاتقا يە بولعان الما­تى­نىڭ جەراستى وتكەلدەرىنە, تۇرعىن ءۇي قا­بىرعالارىنا ءتۇرلى مازمۇنداعى سۋرەتتەر سالعان اۆتورلاردىڭ ءبىرى. وعان گەر­مانيادا جۇمىس ىستەۋگە ۇسىنىس تۇسكەن, بىراق «وتان وتتان دا ىستىق», شى­عار­ما­شىلىق الەۋەتىن تۋعان جەرىنىڭ گۇلدەنۋىنە جۇمساعاندى ءجون كورەدى. ال ازامات ورازبەك بولسا, مۇمكىندىگىنىڭ شەكتەۋلى بولعا­نى­نا قاراماستان, قازاق­ستان رەسپۋبليكاسىنىڭ چەمپيونى, پارا­ليم­پيا­دانىڭ بىرنەشە دۇركىن چەمپيونى. ءوزى اۋەسقوي ءانشى. ەكى بالانىڭ اكەسى. تا­لانتىن تابىسپەن ۇشتاستىرعان جاس كا­سىپكەر نۇرسۇلتان شۆەيتساريا مەنەدجمەنت ۋنيۆەرسيتەتىندە ءبىلىم الىپ كە­لىپ, تۋعان جەرى تۇر­كىستان وبلى­سىن­دا ليمون مەن كيۆي جەمىسىن ءوسىرۋدى قولعا السا, دياس گوللانديادان اسىل تۇ­قىمدى سيىر اكەلىپ, ءوڭىردى ايران, قا­تىق, يوگۋرتپەن قام­تا­ماسىز ەتىپ ءجۇر. سەرىكبول دانىشباەۆ تۇركىستان قالا­سى­نا ار­نالعان اقىلدى باعدارشام جاساپ شىعارعان. كاسىبىن باستاماي جاتىپ «ەگەر وسى ىسپەن اينالىسسام, ناتيجەسى بولا ما, جوق پا؟», «مۇنى كىم الادى؟», «قايدا اپارىپ وتكىزەمىن؟» دەپ كۇدىك-كۇمانگە كوبىرەك بەرىلەتىن زامانداستارىن­ بۇل جاس­تاردىڭ قول جەتكەن تابىسى ءسوزسىز جىگەر­­لەن­دىرەدى. ال بۇل مارافوندا ەكى كوزى شوقتاي جانىپ, ءوز ماماندىعىن تابىس كوزىنە اينالدىرا العان جۇزدەگەن تالانتتى جاستىڭ ناقتى جەتىستىگىنىڭ سىرى تالاي قىز-جىگىتتەردىڭ وزىنە دەگەن سەنىمىن وياتىپ, قۇلشىنىسىن ارتتىرا ءتۇستى. ءبارى دە «ەل ءۇمىتى» مارافونىنىڭ ەس­تەلىك ستاتۋەتكاسىمەن ماراپاتتالدى.

سونداي-اق جىل سايىن اۋىل بالالارىنا ارنالعان «مىڭ بالا» اتتى تۋرنير وتكىزۋ قولعا الىنادى. ناتيجەسىندە ءتۋرنيردىڭ جەڭىمپازدارى ەلىمىزدىڭ ۇزدىك مەكتەپتەرىندە وقۋىن جال­عاس­تىرادى. وسى يگىلىكتى باستا­ما­لار­دىڭ بارىنە ەلباسى قورى قولداۋ كورسەتەدى.

تالانتتى ءارى جىگەرلى جاس­تار­دىڭ سە­نى­مىن قالىپ­تاس­تى­رۋدا بۇل مارافوننىڭ ورنى ايرىقشا. مەملەكەت تىرەگى, ەل ءۇمىتى – وسىن­داي جاستار. ءوزىنىڭ جەتىستىككە جەتۋ جولىن وزگەمەن ءبولىسىپ, وزىنە ءوزى سەنىپ, باتىل قادام جاساۋىنا, بويىندا بۇعىپ جات­قان قابىلەتىن جۇزەگە اسىرۋعا, وزىمەن ءوزى جۇيەلى جۇمىس ىستەۋگە, جان-جاقتى ءارى بەلسەندى بولۋعا ەشكىم دە كەدەرگى ەمەس. تەك ءوز تاعدىرىڭدى ءوزىڭ قولىڭا ال. ال­دىڭا باتىل ماقسات قوي. قيىندىقتان قو­رىقپا. مەملەكەت ارقاشان جاستاردى قولدايدى.

الماتى