تاعدىرى قاسىرەتپەن اياقتالعان الاش ارىستارىنىڭ اياۋلى مەكەنى بولعان الماتى كورنەكتى قايراتكەرلەردى قاستەرلەۋدىڭ وزىق ۇلگىسىن كورسەتۋدەن ايانىپ قالعان ەمەس. سولاردىڭ ءبىرى تەلجان شونان ۇلى سوڭىنا 32 كىتاپ جازىپ قالدىرعان ەكەن.
تەلجان شونان ۇلىنىڭ تۋعانىنا بيىل 125 جىل تولىپتى. ۇلتتىق كىتاپحانا ۇجىمى الاش ارداقتىسىنىڭ بەس تومدىق شىعارمالار جيناعىنىڭ تۇساۋىن كەسپەكشى. بۇل شارا الداعى جۇما كۇنىنە ۇيىمداستىرىلىپ وتىر. «جازۋ رەفورماسى: رۋحاني جاڭعىرۋ جانە تاريحي ساباقتاستىق» دەپ اتالادى. سەبەبى, شونان ۇلىنىڭ جازۋ رەفورماسىنا تىكەلەي قاتىسى بار.
كىتاپحانانىڭ سيرەك قولجازبالار ءبولىمى «سپەتسحران» اتالىپ كەتكەن ارنايى قوردا ساقتالىپ تۇرعان شونان ۇلىنا قاتىستى قۇپيا قۇجاتتاردىڭ بارلىعىن وسى كۇنى الدىمىزعا جايىپ سالماق. 1938 جىلى شونان ۇلى اتىلعان كەزدە ونىڭ بۇكىل ەڭبەكتەرى, قولجازبالارى اياۋسىز وتقا ورتەلگەن. سوندا قاراپايىم كىتاپحاناشىلار ونىڭ ءبىراز ەڭبەكتەرىن جاسىرىپ ساقتاپ قالعان.
اتالعان جيىندا حح عاسىردىڭ باسىنداعى جازۋ رەفورماسىنا بايلانىستى ۇستانىمداردى ايقىنداۋ, سول كەزەڭدەگى قوعامنىڭ احۋالى مەن تىلدىك جاعداياتتى كورسەتۋ, ت.شونان ۇلىنىڭ ءومىرى مەن عىلىمي مۇراسىن كەڭ كولەمدە ناسيحاتتاۋ, قازاق ءتىلىن وقىتۋ ادىستەمەسىنە قاتىستى عالىم قولدانعان, بۇگىنگى تاڭدا ءتىلدى وقىتۋدا پايدالانۋعا بولاتىن ءادىس-تاسىلدەردى كورسەتىپ, بىرقاتار ۇسىنىس جاسالماق. الاش قايراتكەرىن ارداقتاۋ شاراسىنا ءبىلىم جانە عىلىم مينيسترلىگىنىڭ عىلىم كوميتەتى جانە ا.بايتۇرسىن ۇلى اتىنداعى ءتىل ءبىلىمى ينستيتۋتى قولداۋ ءبىلدىرىپ وتىر.