ماڭعىستاۋ وبلىستىق سالاۋاتتى ءومىر سالتىن قالىپتاستىرۋ پروبلەمالارىنىڭ ورتالىعى وبلىستىق دەنساۋلىق ساقتاۋ باسقارماسىنىڭ تاپسىرماسى بويىنشا مەديتسينا قىزمەتكەرلەرى ءۇشىن سەمينارلار مەن «مەديتسينا جانە سىبايلاس جەمقورلىق ۇيلەسپەيدى» الەۋمەتتىك ماڭىزدى جوباسىن ىسكە اسىرۋ بويىنشا حالىقپەن كەزدەسۋلەر ۇيىمداستىردى. بۇل تۋرالى ماڭعىستاۋ وبلىسى دەنساۋلىق ساقتاۋ باسقارماسى ءباسپاسوز قىزمەتى حابارلادى.
قوعامدىق دەنساۋلىق ساقتاۋ ينستيتۋتىنىڭ وكىلى ارسلان يندەرشيەۆتىڭ ايتۋىنشا, جوبانى جۇزەگە اسىرۋ بيىلعى جىلدىڭ قازان ايىندا باستالدى. - ماڭعىستاۋ وبلىسىنىڭ سىبايلاس جەمقورلىققا قارسى قىزمەتىمەن بىرلەسىپ, بىز دەنساۋلىق ساقتاۋ سالاسىندا قولدانىلاتىن سىبايلاس جەمقورلىققا قارسى زاڭنامانىڭ نەگىزگى قاعيداتتارىن ءتۇسىندىرۋ بويىنشا ءىس-شارالار جۇرگىزەمىز. مەديتسينالىق قىزمەتكەرلەرمەن كەزدەسۋلەر ۇيىمداستىرىلدى, وندا ءبىز قولدانىستاعى زاڭناما, قۇقىققا قارسى ارەكەتتەردىڭ سالدارى تۋرالى ايتىپ بەرەمىز. سونىمەن قاتار, ءبىز وبلىس حالقىمەن — اۋرۋحانالار مەن ەمحانا ۇيىمدارىنىڭ ناۋقاستارىمەن كەزدەسەمىز, وندا سىبايلاس جەمقورلىققا قارسى زاڭنامانىڭ نەگىزگى اسپەكتىلەرى تۋرالى ايتىپ, زاڭعا قايشى ارەكەتتەرگە بارماۋعا, مەديتسينا قىزمەتكەرلەرىنە پارا جانە سىيلىقتار بەرمەۋگە شاقىرامىز. ەكى ايلىق ەسەپتىك كورسەتكىشتەن اساتىن نارسە زاڭعا قايشى ارەكەت بولىپ سانالادى. دەنساۋلىق ساقتاۋ باسقارماسى جۇيەلى ءتۇسىندىرۋ جۇمىستارىن جۇرگىزۋ ءۇشىن وسىنداي الەۋمەتتىك ماڭىزدى جوباعا باستاما جاسادى, - دەپ ءتۇسىندىردى ارسلان يندەرشيەۆ.
مەديتسينا قىزمەتكەرلەرىنە ارنالعان سەمينارلار جانە تۇرعىندار ءۇشىن اشىق ەسىك كۇندەرى اقتاۋ قالالىق №1 جانە №2 ەمحانالارىندا, ماڭعىستاۋ وبلىستىق اۋرۋحاناسىندا وتكىزىلدى. وبلىستىق سىبايلاس جەمقورلىققا قارسى قىزمەتتىڭ وكىلدەرى ناۋقاستار اراسىندا دارىگەرلەردىڭ بوپسالاۋى جانە مەديتسينالىق قىزمەت ءۇشىن پارا الۋدىڭ الدىن الۋ تۋرالى تۇسىندىرمە جۇمىستارى مەن ساۋالنامالار ۇيىمداستىردى. ارسلان يندەرشيەۆتىڭ ايتۋىنشا, ساۋالناما بارىسىندا ۇيىمداستىرۋشىلار وبلىس تۇرعىندارىنىڭ سىبايلاس جەمقورلىق, بوپسالاۋ, پارا الۋ فاكتىلەرىمەن كەزدەسكەنىن, بىرەۋلەر ولاردى وسى ارەكەتتەرگە يتەرمەلەگەن بە, جوق پا جانە ولار وعان قالاي قارايتىنىن انىقتايدى. - بىزگە حالىقتىڭ دەنساۋلىق ساقتاۋ سالاسىنداعى قۇقىققا قارسى ارەكەتتەرگە قانشالىقتى دايىن ەكەنىن ءتۇسىنۋ ماڭىزدى. «مەديتسينا جانە سىبايلاس جەمقورلىق ۇيلەسپەيدى» جوباسىنىڭ سوڭىندا ءبىز بارلىق مالىمەتتەردى ساراپتاپ, جىل سوڭىندا وبلىستىق دەنساۋلىق ساقتاۋ باسقارماسىنا تاپسىرامىز, دەپ اتاپ ءوتتى ارسلان يندەرشيەۆ.
مەديتسينا قىزمەتكەرلەرىنە ارنالعان سەمينارلار مەن حالىقپەن كەزدەسۋلەر ماڭعىستاۋ وبلىسىنىڭ قالالارى مەن اۋداندارىندا وتەدى.
ماڭعىستاۋ وبلىسى