جاڭاوزەندە «اشىق ەسىك كۇنى» ءوتتى

جاڭاوزەن قالاسىنىڭ تۇرعىنى دينا كەنجەباەۆانىڭ ايتۋىنشا, جۇمىسسىزدىقتان ارىلۋ ءۇشىن مۇنايشىلىقتى ۇزاق ۋاقىت كۇتىپ جۇرمەي, قىسقا مەرزىمدى كۋرستاردى وقىپ, تاپشى ماماندىقتى يگەرۋگە كەڭەس بەرىلگەن. وسىنداي اشىق, جاريا جۇمىستار الدا دا بولسا ەكەن دەگەن ءوتىنىشىن جەتكىزدى.  

ال كاسىپكەر بولات تۋلانوۆ جاڭاوزەندەگى تەحنوپاركتەگى جەر تەلىمىنە كوپ جىل جارىق تارتىلماي, جاقىندا كاسىپكەرلەر پالاتاسىنىڭ تىكەلەي ارالاسۋىمەن ماسەلە وڭ شەشىلگەنىن تىلگە تيەك ەتتى.

«ەندى تۇرالاپ قالعان كاسىبىمدى ىسكە قوسۋ ءۇشىن نەسيە الۋعا قۇجات تاپسىرعان ەدىم. قارجىلاندىرۋ جاعدايى تەز ارادا شەشىلسە, وتە ريزا بولار ەدىم» دەيدى ول.

اشىق ەسىك كۇنى «كاسىپ ءتۇبى - ءناسىپ» جوباسى اياسىندا جاڭاوزەن قالالىق اكىمدىگىنىڭ قولداۋىمەن ءوتتى. جاڭا جوبا باستالعان ءبىر اي ىشىندە 500-گە جۋىق جەرگىلىكتى تۇرعىنعا كاسىبي كەڭەس بەرىلگەن. سالىستىرمالى تۇردە ايتار بولساق, بۇل وسىعان دەيىن كەلۋشىلەردەن 3-4 ەسەگە ارتىق.

- «كاسىپ ءتۇبى - ءناسىپ» جوباسى باستالعانعا دەيىنگى ەسەپكە قاراپ وتىرساق, كەلۋشىلەر سانى 150-گە جەتەر جەتپەس. ءبىز ءبىر ايدا 500-دەي ادامدى قابىلداپ ۇلگەردىك. ولاردىڭ ماسەلەلەرىن قاراپ, ءتيىستى شارالار قولدانىلدى. قازىر «باستاۋ» جوباسىمەن 195 جاڭاوزەندىك وقىتىلىپ جاتىر. وتكەن ايدا 150 ادام ءبىلىم العان ەدى, - دەدى وكپ كاسىپكەرلەرگە قارجىلاي ەمەس قولداۋ كورسەتۋ ءبولىمىنىڭ باسشىسى اققۋ ايتجانوۆا.

ءىس-شاراعا جاڭاوزەن قالاسى اكىمىنىڭ ورىنباسارى امانعالي نۇرداۋلەتوۆ قاتىسىپ, كەلۋشىلەرمەن كەزدەستى. ولاردىڭ ماسەلەلەرىن تىڭداپ, كەڭەسشىلەرگە ناقتى جاۋاپ بەرۋدى, تيىسىنشە جەرگىلىكتى اكىمدىك بىرلەسىپ جۇمىس ىستەۋگە دايىن ەكەنىن جەتكىزدى. 

كەلۋشىلەر اشىق كەزدەسۋ, الاڭسىز ارالاسىپ اڭگىمەلەسۋدىڭ حالىق ءۇشىن پايداسى زور ەكەنىن ايتتى.

ماڭعىستاۋ وبلىسى