الماتى قالاسىندا قازاقستان حالقى اسسامبلەياسىنىڭ ۇيىمداستىرۋىمەن قازاقستانداعى ازەربايجان ەتنوسىنىڭ مادەنيەتى جانە سالت-داستۇرىنە ارنالعان مەرەكەلىك ءىس-شارا ءوتتى.
دوستىق ءۇيى شاڭىراعىندا وتكەن ازەربايجان ەتنومادەني بىرلەستىگىنىڭ مادەنيەتى مەن داستۇرلەرى كۇنىمەن قۇتتىقتاعان قحا توراعاسىنىڭ ورىنباسارى – حاتشىلىق مەڭگەرۋشىسى جانسەيىت تۇيمەباەۆ:
«قازاقستاندا 110 مىڭنان استام ازەربايجاندار تۇرادى. ولاردىڭ باسىم كوپشىلىگى ەلىمىزدىڭ وڭتۇستىگىندە – تۇركىستان, الماتى, جامبىل وبلىستارى مەن الماتى جانە شىمكەنت قالالارىن مەكەن ەتەدى» دەي كەلە, ازەربايجانداردىڭ قازاقستانعا قونىس اۋدارۋ تاريحى جايلى دا ايتىپ ءوتتى.
ازەربايجان ەتنوسى قازاقستاندا تۇراتىن حالىقتاردىڭ سانى بويىنشا 10-ورىندا. الماتىنىڭ وزىندە 10 مىڭعا جۋىق ازەربايجان تۇرادى.
«1992 جىلى قازاقستاندا «تۇران» تۇڭعىش ازەربايجان مادەنيەت ورتالىعى قۇرىلعان بولاتىن. 2007 جىلى «ازەربايجاندار قاۋىمداستىعى» رەسپۋبليكالىق قوعامدىق بىرلەستىگى قۇرىلدى. جالپى بۇگىنگى كۇنى ەلىمىزدە 32 ازەربايجان ەتنومادەني بىرلەستىگى جۇمىس اتقارۋدا. ازەربايجان تىلىندە «ۆاتان» گازەتى جارىق كوردى. مەملەكەتتىك ءتىل مەن ازەربايجان ءتىلىن ۇيرەتەتىن, سالت-ءداستۇر, ادەت-عۇرىپ, مۋزىكا جانە بي ۇيرەنۋ كۋرستارى جۇمىس ىستەيدى. «باحار» بيشىلەر توبى, ۇلتتىق-اسپاپ جانە فولكلورلىق ۇجىمدار قۇرىلعان», دەگەن جانسەيىت تۇيمەباەۆ, قىزىقتى مالىمەتتەرگە تولى بايانداماسى بارىسىندا قازاقستانداعى ماقتان تۇتار, وتكەن جۇزجىلدىق پەن قازىرگى كەزەڭدە تانىمال بولعان ازەربايجاندار جايلى ايتىپ ءوتتى.
«ابيلفاس حامەدوۆتىڭ جەتەكشىلىگىمەن ازەربايجاندار قاۋىمداستىعىنىڭ مۇشەلەرى ەتنوسارالىق قارىم-قاتىناستى نىعايتۋعا ىقپال ەتىپ, ەلىمىزدىڭ قوعامدىق-مادەني ومىرىنە ۇلەس قوسىپ وتىر» دەگەن جانسەيىت تۇيمەباەۆ, اتالعان شارانىڭ وتۋىنە ۇيىتقى بولىپ, ءوز ۇلەسىن قوسقان «ازەربايجان قاۋىمداستىعى» رەسپۋبليكالىق قوعامدىق بىرلەستىگىنىڭ توراعاسى ابيلفاس حامەدوۆكە جانە بارلىق ۇيىمداستىرۋشىلارعا العىسىن ءبىلدىردى.
فەستيۆال اياسىندا «حالىقتىڭ بىرلىگى – ەلدىڭ كۇشى» تاقىرىبىندا دوڭگەلەك ۇستەل, قولدانبالى ونەر كورمەسى, «كىتاپ – حالىقتىڭ جان دۇنيەسىن ءبىلۋدىڭ كىلتى» اتتى كىتاپ كورمەسى, شىعارماشىلىق ۇجىمداردىڭ كونتسەرتى, سونداي-اق «دوستىق داستارقانى» اتتى ازەربايجانداردىڭ ۇلتتىق اسحاناسى تاعامدارىنىڭ كورمەسى ۇيىمداستىرىلدى.
شارانىڭ ماقساتى – «رۋحاني جاڭعىرۋ» باعدارلاماسىن جۇزەگە اسىرا وتىرىپ, قوعامدىق كەلىسىم مەن جالپىۇلتتىق بىرلىكتى نىعايتۋ; قازاقستاندىق ەتنوس وكىلدەرىنىڭ مادەنيەتىن ناسيحاتتاپ, ازاماتتىق بىرتەكتىلىك قالىپتاستىرۋ; قازاقستاندىق باۋىرلاس حالىقتار اراسىندا ارىپتەستىك بايلانىس ورناتىپ, دوستىق قارىم-قاتىناستاردى ارتتىرۋ.