پارلامەنت ءماجىلىسىنىڭ دەپۋتاتتارى اقتاۋ گارنيزونىنىڭ بىرقاتار اسكەري نىسانىن ارالادى. شارا حالىقارالىق ىستەر, قورعانىس جانە قاۋىپسىزدىك كوميتەتىنىڭ كوشپەلى وتىرىسى شەڭبەرىندە ۇيىمداستىرىلدى. بۇل تۋرالى «باتىس» وڭىرلىك قولباسشىلىعى باسقارماسىنىڭ ءباسپاسوز قىزمەتىنەن كاپيتان رۋستەم يگيسينوۆ حابارلادى.
كۇن تارتىبىندە قارۋلى كۇشتەردىڭ, باسقا دا اسكەرلەر مەن اسكەري قۇرالىمدارىنىڭ بازالارى مەن قويمالارىندا قارۋ-جاراق پەن وق-دارىلەردىڭ قاۋىپسىزدىگى مەن ساقتالۋىن قامتاماسىز ەتۋ, ساقتاۋ وبەكتىلەرىن ورنالاستىرۋ جانە جايلاستىرۋ باعدارلاماسىن ىسكە اسىرۋ ماسەلەلەرى تالقىلاندى.
قورعانىس ءمينيسترىنىڭ ورىنباسارى, گەنەرال-مايور باقىت قۇرمانباەۆ وق-دارىلەردى ساقتاۋدىڭ جالپى جۇيەسى جانە ونىڭ دامۋ پەرسپەكتيۆالارى, اسكەري وبەكتىلەردىڭ ينفراقۇرىلىمىن جەتىلدىرۋ, سونداي-اق ارىس قالاسىندا توتەنشە جاعدايلاردى جويۋ مەن قالعان وق-دارىلەردى ورنالاستىرۋ جۇمىستارى تۋرالى ايتىپ بەردى.
- تەحنيكالىق ناۋقان جوسپارى اياسىندا ساقتاۋ وبەكتىلەرىندە قويمالارعا, اۋماقتى جارىقتاندىرۋعا, تەحنيكالىق كۇزەت قۇرالدارىنا جىل سايىنعى قىزمەت كورسەتۋ, اشىق ساقتاۋ قويمالارى مەن الاڭشالاردى قۇلاتۋ, باستىرمالاردى, نايزاعايدان قورعاۋ قۇرىلعىلارىن ورناتۋ, تەحنيكالىق اۋماقتارداعى ءورت ءسوندىرۋ سۋ قويمالارىن ورناتۋ, جارامسىز وق-دارىلەردىڭ تىعىندارىن الۋ جانە اۋىستىرۋ جۇمىستارى جۇرگىزىلۋدە, - دەدى ول.
وق-دارىلەردى ساقتاۋ جۇيەسىن دامىتۋ ءۇشىن قارۋلى كۇشتەردە وق-دارىلەر مەن ساقتاۋ نىساندارىن جۇزەگە اسىراتىن باعدارلاما مەن كەشەندى جوسپار قۇرىلدى. ولار قولدانىستاعى وق-دارىلەردى ساقتاۋ وبەكتىلەرىن جايلاستىرۋدى جانە شەت ەلدەردىڭ تاجىريبەسىن ەسكەرە وتىرىپ, جاڭالارىن سالۋدى كوزدەيدى. ساقتاۋ وبەكتىلەرى شەكارادان الىستىعى, ەلدى مەكەندەر مەن باسقا دا وبەكتىلەردەن, سونداي-اق باسقا دا قويمالاردان قاۋىپسىز قاشىقتىقتا ورنالاسۋى سياقتى تالاپتارعا جاۋاپ بەرەتىن بولادى.
اقتاۋ گارنيزونىنىڭ اسكەري بولىمدەرىندە پارلامەنت دەپۋتاتتارىنا قارۋ-جاراق, اسكەري تەحنيكا مەن م ۇلىكتەردى ساقتاۋدىڭ, ارنايى مەديتسينالىق قۇرالدار بازاسىنىڭ شارتتارى, سونىمەن قاتار قر قك اسكەري-تەڭىز كۇشتەرىنىڭ كەمەلەرى كورسەتىلدى.
اسكەري نىسانداردىڭ ينفراقۇرىلىمىمەن تانىسىپ, دەپۋتاتتار ايتىلعان پروبلەمالىق ماسەلەلەردى جانە ولاردى شەشۋ جولدارىن تالقىلادى. قارۋ-جاراق پەن وق-دارىلەردى ساقتاۋ وبەكتىلەرىن كوشىرۋ جانە جايلاستىرۋ باعدارلاماسىنىڭ ارالىق قورىتىندىلارىن اتاپ ءوتتى. كوشپەلى وتىرىس بارىسىندا ايتىلعان سىندارلى ۇسىنىستار زاڭنامانى جەتىلدىرۋ اياسىندا كورىنىس تاباتىنى ايتىلدى.
وتىرىسقا قورعانىس مينيسترلىگى, ۇلتتىق ۇلان, شەكارا قىزمەتى, توتەنشە جاعدايلار كوميتەتى, باس اسكەري پروكۋراتۋرا جانە وبلىس اكىمدىگىنىڭ باسشىلارى قاتىستى.