حالىقارالىق تۇركى اكادەمياسى ۇجىمى اتاتۇرىكتى ەسكە الۋ شاراسىنا قاتىستى

تۇركيا ەلىنىڭ ۇلى كوشباسشىسى مۇستافا كەمال اتاتۇرىكتىڭ ماڭگىلىككە اتتانعانىنا 81 جىل تولۋىنا وراي ەلشىلىك ۇيىمداستىرعان ەسكە الۋ شاراسىنا تۇركى اكادەمياسى (International Turkic Academy) ۇجىمى دا قاتىستى. ءىس-شارا بارىسىندا كەمال اتاتۇرىكتىڭ ءومىر جولى تۋرالى كورمە ۇيىمداستىرىلدى. كەلگەن قوناقتار ەسكە الۋ شاراسىنىڭ اياعىندا نۇر-Cۇلتان قالاسىندا اتاتۇرىك ساياباعىنداعى ۇلى تۇلعانىڭ ەسكەرتكىشىنە گۇل شوقتارىن قويىپ, تاعزىم ەتتى.تۇركيا رەسپۋبليكاسىنىڭ نەگىزىن قالاۋشى اتاتۇرىك 10 قاراشا كۇنى تاڭەرتەڭ ساعات 09:05-تە كوز جۇمعان. سودان بەرى جىل سايىن ءدال وسى ۋاقىتتا تۇركيادا ءبىر مينۋتتىق ۇنسىزدىك جاريالانىپ كەلەدى.اتاتۇرىك ۇلى ۇلتتىق جينالىسىنىڭ توراعاسى, ودان كەيىن ءوز ەلىنىڭ پرەزيدەنتى رەتىندە تۇركيادا جانە ودان تىس ەلدەردە زور ابىرويعا يە بولعان تۇلعا. ءداستۇر بويىنشا تۇركياداعى «انىت قابير» باسىندا رەسمي وكىلدەر مەن قالىڭ جۇرتشىلىقتىڭ قاتىسۋىمەن اتاتۇرىكتى ەسكە الۋ شاراسى ءوتىپ تۇرادى. وتكەن عاسىردىڭ جيىرماسىنشى جىلدارى تۇركيانىڭ تاۋەلسىزدىگى ءۇشىن تۋ كوتەرگەن ۇلتتىق-رەۆوليۋتسيالىق قوزعالىستى باسقارعان اتاتۇرىك جاڭا مەملەكەت قۇرۋعا قول جەتكىزىپ, بىرقاتار ساياسي, الەۋمەتتىك جانە مادەني رەفورمانى جۇزەگە اسىرعان.اتاتۇرىك تۇركيا رەسپۋبليكاسىنىڭ 15 جىلدىعىنا وراي ەلدى ارالاپ جۇرگەن ساپارى كەزىندە, 1938 جىلى 10 قاراشا كۇنى ىستانبۇلدا قايتىس بولعان. ونىڭ دەنەسى انكاراعا جەتكىزىلىپ, سونداعى ەتنوگرافيا مۇراجايىنا جەرلەنەدى. ال 15 جىلدان كەيىن, ياعني 1953 جىلى قازىرگى كەسەنەسىنە كوشىرىلدى. بۇل كەسەنە تۇرىكشە «انىت قابير» («ەسكەرتكىش قابىر») دەپ اتالادى.