ەلوردادا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆتىڭ توراعالىعىمەن كاسىپتىك ستاندارتتاردى ازىرلەۋ جونىندەگى باسقارۋشى كوميتەتتىڭ وتىرىسى ءوتتى. وتىرىستا «اقپاراتتىق تەحنولوگيالار», «بايلانىس», «يننوۆاتسيالىق قىزمەت» جانە «ەنەرگەتيكا» سالالارى ءۇشىن كاسىبي ستاندارتتاردى دايىنداۋ بارىسى تالقىلاندى.
«ەگەر ءبىزدىڭ ەلىمىزدە ەكونوميكانىڭ سۇرانىسىنا ساي ماماندار دايارلاۋ كەرەك دەسەك, وندا تيىسىنشە ۇلتتىق بىلىكتىلىك جۇيەسىن قالىپتاستىرعان ءجون. ۇلتتىق بىلىكتىلىك جۇيەسى نەگىزىنەن ءۇش بولىمنەن تۇرادى. ءبىرىنشىسى, جۇمىس بەرۋشىنىڭ, ياعني ەرتەڭ سول ماماندى جۇمىسقا قابىلداۋشىنىڭ جاس ماماننىڭ بىلىمىنە, داعدىسىنا دەگەن تالاپ. سول تالاپتى كاسىپتىك ستاندارت دەپ اتايدى. كاسىپتىك ستاندارتتى ازىرلەگەننەن كەيىن وعان ءبىزدىڭ ءبىلىم بەرۋ ستاندارتتارى مەن باعدارلامالارى بەيىمدەلۋى, نە بولماسا سوعان قاتىستى ازىرلەنۋى كەرەك. سول كەزدە ءبىلىم بەرۋ وشاقتارى ەكونوميكانىڭ سۇرانىسىنا ساي مامانداردى دايارلايدى. ۇلتتىق بىلىكتىلىك جۇيەسىنىڭ كەلەسى ءبىر بولىگى – العان ءبىلىمدى تاۋەلسىز باعالاۋ. مىسالى, بىزدە ۋنيۆەرسيتەت, ينستيتۋت, كوللەدج بولسىن, ستۋدەنتتەردى دايارلايدى دا ديپلومىن قولىنا بەرەدى. سول ديپلومى ءبىلىمىن راستايتىن قۇجات سانالادى. بىراق دۇنيە جۇزىندەگى بارلىق دامىعان ەلدەردە تالىمگەردىڭ ديپلومىنا قاراماي, ونىڭ ءبىلىمىن راستايتىن تاۋەلسىز بىلىكتىلىك ورتالىقتارى جۇمىس ىستەيدى. ولار ستۋدەنتتەردىڭ بىلىكتىلىگىن راستاپ, سول سەرتيفيكاتى ارقىلى جۇمىس بەرۋشىلەر قالاعان ماماندارىن قابىلداي الادى. ونىڭ قۇنى مەن باعاسى جوعارى. سوندىقتان ءبىز وسىنداي جۇيەنى قالىپتاستىرۋدامىز. دۇنيەجۇزىلىك بانكتىڭ زەرتتەۋى بويىنشا بۇكىل ەكونوميكامىزدى قامتۋ ءۇشىن 550 كاسىپتىك ستاندارت قاجەت. وسى جوبا ارقىلى بىلتىر سونىڭ 70 كاسىپتىك ستاندارتىن ازىرلەگەنبىز. قالعان 480 ستاندارتتى جىلدىڭ سوڭىنا دەيىن ازىرلەۋىمىز كەرەك», دەدى ءبىرجان نۇرىمبەتوۆ.
بۇل رەتتە «ەلىمىزدەگى جوعارى وقۋ ورىندارى كاسىپورىنعا ساي كەلەتىن مامان دايارلاي الماي جاتىر ما؟» دەگەن ءجۋرناليستىڭ سۇراعىنا ءمينيستردىڭ جاۋابى بىلاي بولدى:
«بىزدە ەڭبەك نارىعىندا سۇرانىسقا دايارلانعان ماماندارىمىز ساي كەلمەيدى. زاڭگەر نەمەسە ەكونوميست كوپ. سول نەگىزگى ماسەلە بولىپ وتىر. قازىر ەڭبەك نارىعىنىڭ سۇرانىسى وزگەشە. وسى رەتتە كوپتەگەن زەرتتەۋ جاسالىپ جاتىر. ەڭبەك نارىعىنىڭ سۇرانىسى جوعارى ءبىلىمدى ماماندارعا ەمەس, ورتا, ارنايى كاسىبي ءبىلىمى بار ماماندارعا 75 پايىز مۇقتاج دەۋگە بولادى. ءار ادام ءوز بالاسىن جوعارى ءبىلىم السىن, زاڭگەر, ەكونوميست بولسا ەكەن دەيدى. بىراق ەڭبەك نارىعىن دا ەستەن شىعارماۋىمىز كەرەك. ۇلتتىق بىلىكتىلىك جۇيەسىن قالىپتاستىرۋداعى نەگىزگى مىندەتتەرىمىزدىڭ ءبىرى – وسى ماسەلەنى شەشۋ. ءار سالانىڭ ءوزىنىڭ ەڭبەك ەرەكشەلىكتەرى بار. بىراق بارلىعىنىڭ تالابى ءبىر. قازىرگى تالاپ سول سالاداعى ماماندار قانداي بولۋى كەرەك دەگەن قاعيدالاردى كاسىپتىك ستاندارتقا ەنگىزۋ», دەدى مينيستر.
سونداي-اق اتالعان شاراعا مادەنيەت جانە سپورت, تسيفرلىق دامۋ, يننوۆاتسيا جانە اەروعارىش ونەركاسىبى, ەنەرگەتيكا ۆيتسە-مينيسترلەرى, ءتۇرلى سالاداعى كاسىپتىك ستاندارتتاردى ازىرلەۋشىلەر, «اتامەكەن» ۇكپ جانە «Ernst & Young» كونسالتينگتىك كومپانياسىنىڭ وكىلدەرى قاتىستى. سالالىق بىلىكتىلىك شەڭبەرى مەن «تۋريزم» سالاسىنداعى كاسىپتىك ستاندارتتاردى دامىتۋ تۋرالى مادەنيەت جانە سپورت ۆيتسە-ءمينيسترى وركەن بيساقاەۆ, اقپاراتتىق تەحنولوگيالار, بايلانىس جانە يننوۆاتسيالىق قىزمەت سالالارى بويىنشا تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى اسحات ورازبەك, ەنەرگەتيكا سالاسى بويىنشا ەنەرگەتيكا ۆيتسە-ءمينيسترى سۇڭعات ەسىمحانوۆ ءتيىستى اقپاراتتاردى ورتاعا سالدى.
جيىن سوڭىندا ءبىرجان نۇرىمبەتوۆ ورتالىق مەملەكەتتىك ورگاندارعا سالالىق كوميسسيالارداعى كاسىپتىك ستاندارتتاردىڭ ۇيلەسىمىن قامتاماسىز ەتۋدى جانە ولاردى بەكىتىلگەن كەستەگە سايكەس «اتامەكەن» ۇكپ-عا جولداۋدى, سونىمەن قاتار ازىرلەۋشىلەردىڭ ەسكەرتۋلەرىن ۋاقتىلى ازىرلەۋدى, بيىل 15 قاراشاعا دەيىن «Ernst & Young» ساراپتاماسىن الۋدى اياقتاۋدى تاپسىردى. ازىرلەۋشىلەرگە كەستەگە سايكەس ساراپتاما ناتيجەلەرى بويىنشا الىنعان ەسكەرتۋلەردى جويۋ جانە بەكىتىلگەن كس پەن باسقا دا كاسىپتىك ستاندارتتاردى ەسكەرە وتىرىپ, ازىرلەنىپ جاتقان كاسىپتىك ستاندارتتارداعى كاسىپتەردىڭ قايتالانۋىن بولدىرماۋدى تاپسىردى.