ماڭعىستاۋدا مۇنايلى اۋدانىنىڭ توتەنشە جاعدايلار ءبولىمىنىڭ قىزمەتكەرلەرى ماڭعىستاۋ ستانساسىنىڭ جەلىلىك پوليتسيا ءبولىمى قىزمەتكەرلەرىمەن بىرلەسە پويىزداعىلارعا ۇگىت-ناسيحات جۇمىستارىن جۇرگىزدى. بۇل تۋرالى ماڭعىستاۋ وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى حابارلادى.
قازان ايىنىڭ سوڭعى كۇنى پاكىستاندا اس ءپىسىرۋ ءۇشىن پايدالانىلعان گاز باللونىنىڭ جارىلىسى سالدارىنان كاراچي-راۆالپيندي باعىتىنداعى جولاۋشىلار پويىزىندا جارىلىس بولىپ, 73 ادام قازا تاپتى, 20-عا جۋىق ادام ءتۇرلى دارەجەدەگى كۇيىك پەن جاراقات العاندىعى بەلگىلى. وسىعان وراي ساقتىق جانە الدىن الۋ ماقساتىندا «ماڭعىستاۋ-الماتى» باعىتىنداعى جولاۋشىلار پويىزىندا اۋقىمدى ۇگىت-ناسيحات جۇمىستارى جۇرگىزىلىپ, جول سەرىكتەرى نۇسقاۋلىقتان وتكىزىلىپ, كورنەكى جادىنامالار تاراتىلدى, تۇسىندىرمە جۇمىستارى بارىسىندا پويىز مەيرامحاناسىنا اسا كوڭىل ءبولىنىپ, اسپاز جانە داياشىلارعا تاماق ءپىسىرۋ كەزىندە قۋاتتى كوپ قاجەت ەتەتىن جانە گاز بالونمەن پايدالانىلاتىن تاماق ءپىسىرۋ پليتالارىن قولدانباۋ جونىندە ءدارىس وتكىزىلدى.
توتەنشە جاعدايلار ءبولىمىنىڭ باستىعى ا. قۇلمانوۆ باستاپقى ءورت ءسوندىرۋ قۇرالدارىن دۇرىس قولدانۋ ەرەجەلەرىن ءتۇسىندىردى. ءىس-شارا سوڭىندا پويىز قىزمەتكەرلەرىنە سيتۋاتسيالىق سۇراقتار قويىلىپ, ولاردىڭ ءورت قاۋىپسىزدىگى بويىنشا بىلىكتىلىگى تەكسەرىلدى.