بەلگىلى جۋرناليست ماعاۋيا سەمباي دۇنيەدەن وزدى

ماعاۋيا سەمباي ەڭبەك جولىن 1976 جىلى قازمۋ-ءدىڭ جۋرناليستيكا فاكۋلتەتىن تامامداعان سوڭ,  «ورتالىق قازاقستان» گازەتىنەن باستاعان. مۇندا ول قاتارداعى ءتىلشى قىزمەتىنەن باستاپ ءبولىم مەڭگەرۋشىسى, جاۋاپتى حاتشى, باس رەداكتوردىڭ ءبىرىنشى ورىنباسارىنا دەيىنگى قىزمەتتە ەڭبەك ەتتى.

رەسپۋبليكالىق «Egemen Qazaqstan» گازەتىندە اعا ءتىلشى, قاراعاندى وبلىسى بويىنشا مەنشىكتى ءتىلشى, ە. بوكەتوۆ اتىنداعى قارمۋ-دىڭ جۋرناليستيكا بولىمشەسىندە اعا وقىتۋشى قىزمەتىن اتقارعان.

كەيىنىرەك 1997 جىلدان باستاپ «ورتالىق قازاقستان» گازەتىنىڭ باس رەداكتورى بولدى.

جۋرناليست ە.لۇقپانوۆپەن بىرلەسىپ جازعان «جاۋىنگەر قىزدار-بوەۆىە پودرۋگي» (1995), «قولىما قالام الدىم ايتامىن دەپ...»(2005) دەرەكتى وچەركتەر كىتابىنىڭ اۆتورى.

قازاقستان جۋرناليستەر وداعى سىيلىعىنىڭ لاۋرەاتى (1980), گ. تولماچەۆ اتىنداعى رەسپۋبليكالىق بايقاۋدىڭ «2009 جىلعى تاڭداۋلى باق رەداكتورى» سىيلىعىنىڭ يەگەرى, قازاقستاننىڭ ەڭبەك سىڭىرگەن قايراتكەرى (2009). وبلىستىق ءماسليحاتتىڭ ءىىى جانە IV شاقىرىلىمىنىڭ دەپۋتاتى (2003 جىلدان). «مادەنيەت قايراتكەرى» بەلگىسىنىڭ يەگەرى, سونداي-اق ءتورت مەرەكەلىك مەدالمەن ماراپاتتالعان. بۇدان بولەك قاراعاندى وبلىسى اكىمىنىڭ «التىن سۇڭقار» سىيلىعىنىڭ ارناي جۇلدەسىنىڭ, پرەزيدەنت سىيلىعىنىڭ يەگەرى.