تۇلكىباس اۋدانىنىڭ مايتوبە اۋىلىندا پروفەسسور, فيلولوگيا عىلىمدارىنىڭ دوكتورى, ابايتانۋشى, باۋىرجانتانۋشى عالىم مەكەمتاس مىرزاحمەت ۇلىنا جەرلەستەرى ءۇي سىيلادى. بار ءومىرىن عىلىمعا سارپ ەتىپ, كوز مايىن تاۋىسىپ جۇرگەن عالىمعا تارتۋ ەتىلگەن باسپانانىڭ سالىنۋىنا اۋدان اكىمى باستاماشىل بولعان.
وسى ورايدا ايتا كەتەلىك, تۇلكىباس اۋدانىنىڭ اكىمى نۇربول تۇراشبەكوۆتى جۇرت رۋحانياتقا جاناشىر, جاڭاشىل باسشى رەتىندە دە قۇرمەتتەيدى. شاعىن جانە ورتا كاسىپكەرلىك دامىپ, تۇرعىنداردىڭ الەۋمەتتىك جاعدايى جاقسارا تۇسكەن تۇلكىباستا سوڭعى جىلدارى اقىن-جازۋشى, عالىمدار, جۋرناليستەرگە ءتۇرلى باعىتتا كوپتەپ قولداۋ كورسەتىلىپ كەلەدى. مەكەمتاس مىرزاحمەت ۇلىنا جاڭا دا ءزاۋلىم ءۇيدىڭ كىلتىن تابىستاۋ راسىمىندە اۋدان اكىمى: ء«بىرازدان بەرى بىزدە مەكەمتاس اعامىزعا تۋىپ-وسكەن جەرىنەن باسپانا سوعىپ بەرسەك دەگەن نيەت بولدى. وسى باسپانادا اعامىز شىعارماشىلىقپەن ەمىن-ەركىن اينالىسسا دەگەن ماقساتتاعى نيەتىمىز ىسكە اسىپ, بۇگىن قۋانىشتى بولىسپەكپىز. بۇل ءۇي اعامىزعا اۋدان حالقىنىڭ اتىنان بەرىلىپ وتىر», - دەي كەلە ءۇيدى سالۋعا ۇلەس قوسقان دەمەۋشىلەرگە العىسىن ءبىلدىردى. ال وبلىستىق ارداگەرلەر كەڭەسىنىڭ توراعاسى جەڭىسبەك ماۋلەنقۇلوۆ مەكەمتاس مىرزاحمەت ۇلىنىڭ وتكەن ءومىرى مەن شىعارماشىلىق جولىنا كوز جۇگىرتىپ, قازاق عىلىمىنىڭ دامۋىنا قوسقان ۇلەسى شەكسىز ەكەنىن جەتكىزدى. ءوز كەزەگىندە مەكەمتاس اعا جەرلەستەرىنە العىسىن ءبىلدىرىپ, سول جەرلەستەرىن يگى ىسكە جۇمىلدىرا بىلگەن اۋدان اكىمى نۇربول تۇراشبەكوۆتىڭ جۇمىسىنا ساتتىلىك تىلەدى.
سونداي-اق بۇل كۇنى اۋداندىق «شامشىراق» قوعامدىق-ساياسي گازەتىنىڭ رەداكتسياسىندا تۇلكىباس وڭىرىنە ەسىمى تانىمال اقىن ابدىبەك ارالباي ۇلى مەن ۇزاق جىلدار بويى اۋداندىق گازەتتىڭ وتىمەن كىرىپ, ك ۇلىمەن شىققان جۋرناليست ورىنتاي كومەكوۆتىڭ كىتاپتارىنىڭ تۇساۋكەسەرى ءوتتى. «ىزدە مەنى» كىتابىندا ارقالى اقىن ابدىبەك ارالباي ۇلىنىڭ سوڭعى جىلدارى جازعان ولەڭدەرى توپتاستىرىلعان. ال, «ەندى گۇلگە جولاماسپىن» - ورىنتاي كومەكوۆتىڭ العاشقى كىتابى. قالىڭ كىتاپتا ءجۋرناليستىڭ وسى ۋاقىتقا دەيىن ءازىل-سىقاق, تىلسىم دۇنيە تاقىرىپتارىندا جازعان دۇنيەلەرى توپتاستىرىلعان. تۇساۋكەسەر راسىمىندە مەكەمتاس مىرزاحمەت ۇلى باسىلىپ شىعۋىنا اۋدان اكىمى ىقپال ەتكەن كىتاپ يەلەرىنە شىعارماشىلىق تابىس تىلەدى.