قوس ونەردى بىرىكتىرگەن كورمە

تاراز قالالىق اكىمدىگىنىڭ ۇيىمداستىرۋىمەن وتكەن شارا جامبىل وبلىسىنىڭ 80 جىلدىعىنا ارنالدى. ايگىلى فيردوۋسي عازالىمەن اتالعان كەشتى جاس اقىن نۇرجان قادىرالى جۇرگىزدى. كورمە اۋەلى اشىق اسپان استىنداعى كلاسسيكالىق ۆالسپەن اشىلدى. سودان كەيىن جۇرگىزۋشى ورتاعا شىعىپ, كارتينالاردىڭ بەتپەردەلەرىن اشا ءجۇرىپ ولەڭ وقىدى. وسى ساتتە وڭىردەگى «اقكەربەز» بيشىلەر توبىنىڭ ۇلتتىق ناقىشتا كيىنگەن ارۋلارى دا بارلىق كارتينالاردىڭ بەتپەردەلەرىن اشىپ, ولاردى كوپشىلىك نازارىنا ۇسىندى.

اۋليەاتا وڭىرىنەن قازاق ادەبيەتىندە ەسىمى بەلگىلى تۇلعالار كوپتەپ شىققان. كونە زاماندا دا شىعىس شايىرلارىنىڭ تارازدى تامسانا جىرلاعانى تاريحتان بەلگىلى. بۇل ورايدا التىنبەك قارتاباي ءوزىنىڭ تۇڭعىش شىعارماشىلىق كورمەسىن اقىنداردىڭ ولەڭدەرىمەن كەرەمەت ۇيلەستىرە بىلۋىمەن دە ەرەكشەلەندى دەۋگە بولادى. ءفوتوتىلشى قازاقتىڭ ارۋ قىزدارى, سونىمەن قاتار التىن كۇز, اقىندار بەينەسى, تابيعات كورىنىستەرى سياقتى كوركەم كورىنىستەردى دە قالت جىبەرمەگەن. ال, بۇل شىعارمالار جاقسىلىق ساتىبەكوۆ, ارعىنباي بەكبوسىن, تىنىشباي راقىم, كۇلاش احمەتوۆا, سەرىك تومانوۆ, مارالتاي رايىمبەك ۇلى سياقتى اقىنداردىڭ ولەڭدەرىمەن جاقسى جاراسىم تاۋىپ, كورمەنى تاماشالاۋشىلارعا كەرەمەت كۇي سىيلادى. فوتوپوەزيا كورمەسىن تاماشالاۋعا كەلگەن جامبىل وبلىسى اكىمىنىڭ ورىنباسارى سۇلۋشاش قۇرمانبەكوۆا مۇنداي كەشتىڭ تاراز توپىراعىندا تۇڭعىش رەت ۇيىمداستىرىلىپ وتىرعانىن اتاپ ءوتىپ, كورمە يەسىنىڭ جۇمىسىنا ساتتىلىك تىلەدى.

بۇل كۇنى التىنبەك قارتاباي جامبىل وبلىسىنىڭ 80 جىلدىعىنا وراي كوپشىلىك نازارىنا 80 سۋرەت ۇسىندى. ونىڭ ىشىندە ءوڭىر تاريحىنان سىر شەرتەتىن تۋىندىلار دا بار. «تۋعان جەردىڭ, قورشاعان ورتانىڭ كەرەمەت سۇلۋلىعىن كورمەۋ مۇمكىن ەمەس. مەن بۇل كورمەدە ءوزىمنىڭ فوتوتۋىندىلارىممەن قوس ونەردى بىرىكتىرىپ, اقىندار شىعارماشىلىعىن دا وسى كەشكە ارقاۋ ەتۋدى ماقسات ەتتىم», دەيدى التىنبەك قارتاباي. بۇل كۇنى تارازدىقتار ءتۇرلى تاقىرىپتاعى كارتينالاردى تاماشالاپ, ءوز اسەرلەرىمەن ءبولىستى.