مەملەكەتتىك ورتالىق مۋزەيدە قازاقستاننىڭ اتاقتى سۋرەتشىسى, ءمۇسىنشى باقىتجان ابىشەۆتىڭ «دالا ءۇنى» اتتى مەموريالدىق كورمەسى اشىلدى.
قازاقستاننىڭ ەڭبەك سىڭىرگەن قايراتكەرى, بەلگىلى ءمۇسىنشى باقىتجان ابىشەۆتىڭ شىعارماشىلىعى مادەني قوعام مەن كورەرمەندەرگە جاقسى تانىس. قازاق حالقىنىڭ تاريحى, ۇلتىمىزدىڭ كورنەكتى قايراتكەرلەرىنىڭ تاعدىرى مۇسىنشىگە ەتەنە جاقىن. سۋرەتشى ونى ءوزىنىڭ باستى تاقىرىبى رەتىندە سانايدى. ول ۇزاق جىل تاريحي تۇلعالار مەن ۇلتتىق باتىرلاردىڭ بەينەلەرىن قالپىنا كەلتىرۋگە ۇلكەن ۇلەس قوسىپ كەلەدى.
سۋرەتشى باقىتجان ابىشەۆتىڭ ەل كوڭىلىنەن شىققان مۇسىندىك تاقىرىپتارى مەن سيۋجەتتەرى قازاق تاريحى مەن حالىق ءومىرى جانە سالت-داستۇرىمەن تىعىز بايلانىستى كەلەدى. اۆتوردىڭ ءوز شىعارمالارىن جاساۋدا ءارتۇرلى كومپوزيتسيالىق جانە كوركەم پلاستيكالىق مانەرلى قۇرالدار مەن ادىستەردى پايدالاناتىنىن ايتۋ ءلازىم. ءمۇسىنشىنىڭ جۇرەگىنە جاقىن, جىلىلىققا تولى «انانىڭ پورترەتى» شىنايى ومىردەن نەگىز العانىن باعامدار ەدىڭىز. كەڭدىك پەن پلاستيكالىق قۋاتقا تولى «كۇيشى» بەينەسى, حالقىن ەرلىك ىستەرگە ۇندەگەن «ۇران» ەسكەرتكىشى جاس ۇرپاقتى ەرلىككە, ۇلىلىققا شاقىرعانداي بولادى. ال قازاق باتىرلارىنىڭ كۇشى مەن ەپتىلىگى «ۇماي», «توميريس», «بەتاشار», «بۇركىتشى», «باتىر» بەينەلەرىنەن جاقسى كورىنىس بەرەدى.
ءمۇسىنشىنى 1970 جىلدان باستاپ ستۋدەنتتىك, رەسپۋبليكالىق, حالىقارالىق كورمەلەردىڭ تۇراقتى قاتىسۋشىسى, كورنەكتى مونۋمەنتالدىق جۇمىستاردىڭ اۆتورى رەتىندە بىلەمىز. ول قازاق حالقىنىڭ باتىرلارىنا ارناپ قويىلعان كوپتەگەن عاجايىپ ەسكەرتكىشتىڭ اۆتورى. ب.ابىشەۆ الماتى قالاسىندا جامبىلعا, توقاش بوكينگە, اقتوبەدە ءاليا مولداعۇلوۆاعا, بۇقار جىراۋعا, ءماشھۇر-ءجۇسىپ كوپەي ۇلىنا, باياناۋىلدا س.تورايعىروۆقا, قاراعاندى قالاسىندا ساكەن سەيفۋللينگە قويىلعان ەسكەرتكىشتەردى مۇسىندەسە, سونىمەن قاتار الماتىداعى ءال-فارابي, ماحامبەت, كۇلاش بايسەيىتوۆا, جازۋشى ءادي ءشارىپوۆ, نۇر-سۇلتان قالاسىنداعى اتاتۇرىك, جاياۋ مۇسا تۇرپاتتارىن بەينەلەگەن. ستانوك جانرىنىڭ جاڭقالانعان جۇمىستارى قازاقستاندىق جانە شەتەلدىك مۋزەيلەردە ەرەكشە باعالانادى. بۇگىندە ءمۇسىنشى, سۋرەتشى ب.ابىشەۆتىڭ «وليمپياداشى» اتتى وزگەشە ەڭبەگى شۆەيتساريانىڭ لوزاننا قالاسىنداعى وليمپيادالىق كوميتەتتىڭ شتاب-پاتەرىندە تۇرعانىن كوپ ادام بىلە بەرمەۋى مۇمكىن. ونىڭ سوڭعى جىلدارى ىستەگەن ءىرى تۋىندىسى – يۋنەسكو شەڭبەرىندە اتالىپ وتكەن ماحامبەت وتەمىس ۇلىنىڭ 200 جىلدىعىنا ارنالعان «يساتاي مەن ماحامبەت» مونۋمەنتالدى كەشەنى دەۋگە بولادى.
ءمۇسىنشى شىعارمالارى تاس پەن قولا ءداۋىرىنىڭ وي سەزىمىن شىعارماشىلىق جاسامپازدىقتىڭ ۇلى ەكپىنىندە بىرىكتىرە وتىرىپ, ماڭگىلىككە شاقىرادى. سالقار دالانىڭ سىرنايلى ۇنىندەي ادەمى ءبىر اۋەن كەلەتىندەي دەرسىز. الدەنەنى اڭساپ ساعىناسىز.
الماتى