ماراپاتتاۋ ءراسىمى بارىسىندا ەلباسى تسۋكۋبا ۋنيۆەرسيتەتى ءوزىنىڭ تەرەڭ تاريحىمەن تانىمال الەمدىك دەڭگەيدەگى ءبىلىم بەرۋ جانە زەرتتەۋ ورتالىعى سانالاتىندىعىن اتاپ ءوتتى. بۇل تۋرالى قازاقستاننىڭ تۇڭعىش پرەزيدەنتى - ەلباسى نۇرسۇلتان نازارباەۆتىڭ ءباسپاسوز قىزمەتى حابارلادى.
– تسۋكۋبا – نوبەل سىيلىعىنىڭ لاۋرەاتتارى ەڭ كوپ شىققان جاپون ۋنيۆەرسيتەتتەرىنىڭ قاتارىندا. ءسىزدىڭ ۋنيۆەرسيتەتىڭىز قازاقستاندىقتار اراسىندا دا ۇلكەن سۇرانىسقا يە, ءبىزدىڭ 105 ستۋدەنتىمىز تسۋكۋبا ديپلومىن الدى. ولاردىڭ كوپشىلىگى «بولاشاق» باعدارلاماسىنىڭ ستيپەندياتتارى, – دەدى قازاقستاننىڭ تۇڭعىش پرەزيدەنتى.
نۇرسۇلتان نازارباەۆ بەرىلگەن قۇرمەتتى دوكتور اتاعى بۇكىل قازاقستاندىقتارعا دەگەن قۇرمەتتىڭ بەلگىسى ەكەنىن اتاپ ءوتتى.
– ءوز تاراپىمنان قازاقستاندا ارقاشان ءبىلىم بەرۋ مەن جاستار ساياساتىن دامىتۋعا ۇلكەن ءمان بەرگەنىمدى اتاپ وتكىم كەلەدى. ەلىمىزدە ءبىلىم بەرۋ مادەنيەتى قوعامنىڭ اجىراماس بولىگىنە اينالعانى ءبىزدى قۋانتادى, – دەدى ەلباسى.
ءسوز سوڭىندا قازاقستاننىڭ تۇڭعىش پرەزيدەنتى بارلىق قاتىسۋشىلاردى يمپەراتور نارۋحيتونىڭ تاققا وتىرۋىمەن جانە جاپونيادا «رەيۆا» ءداۋىرىنىڭ باستالۋىمەن قۇتتىقتادى.