قحا توراعاسىنىڭ ورىنباسارى شەرزود پۋلاتوۆ اقتاۋعا كەلدى

كەزدەسۋگە ماڭعىستاۋ وبلىستىق قازاقستان حالقى اسسامبلەياسىنىڭ حاتشىلىق مەڭگەرۋشىسى گ.يسمۋرزينا, «قوعامدىق كەلىسىم» كمم-ءنىڭ باسشىسى ا.جايىلحانوۆا جانە قىزمەتكەرلەرى قاتىستى.

-بۇگىن مەن وسىنداي ادەمى عيماراتتا سىزدەرمەن قاۋىشقانىما قۋانىشتىمىن. مۇنداي كەرەمەت عيماراتتا جۇمىس جاساۋ – سىزدەر ءۇشىن دە, بىزدەر ءۇشىن دە ۇلكەن مارتەبە. وسى ۋاقىتقا دەيىن ەلىمىزدىڭ بارلىق وڭىرىندەگى دوستىق ۇيلەرىن ارالاپ, ەتنومادەني بىرلەستىك وكىلدەرىنىڭ ۇسىنىستارىن, يدەيالارىن تىڭدادىم. ارينە, بۇگىنگى كەزدەسۋ رەسمي ەمەس, ءجاي ەركىن فورماتتاعى كەزدەسۋ دەپ بىلىڭىزدەر. سوندىقتان بۇگىنگى كەزدەسۋدە سىزدەردىڭ اسسامبلەيانى دامىتۋ ماقساتىندا ۇسىنىستارىڭىزدى, جاڭا يدەيالارىڭىزدى, ءتىپتى ۇلكەن اۋقىمدى جوبالارىڭىز بولسا, مۇمكىن جۇمىس بارىسىندا تۋىنداپ جۇرگەن, شەشىمىن تابا الماي جۇرگەن ماسەلەلەر بولسا تىڭداۋعا دايىنمىن. الداعى ۋاقىتتا سىزدەردىڭ سول ۇسىنىستارىڭىز بەن كەڭەستەرىڭىز قازاقستان حالقى اسسامبلەياسىنىڭ قىزمەتىن جانداندىرۋعا كومەكتەسەدى دەگەن ويدامىن, دەدى شەرزود اببوز ۇلى.

كەزدەسۋ بارىسىندا قحا قىزمەتى مەن الداعى جوسپارلار تۋرالى ماسەلەلەر تالقىلانىپ, ەتنومادەني بىرلەستىك توراعالارى تاراپىنان ۇسىنىستار ايتىلىپ, كەڭەستەر بەرىلدى. شەرزود اببوز ۇلى مەن ەتنومادەني بىرلەستىك توراعالارى اراسىندا كونسترۋكتيۆتى قارىم-قاتىناس ورنادى.

سونىمەن قاتار شەرزود اببوز ۇلى كەلەسى جىلى قازاقستان حالقى اسسامبلەياسىنىڭ 25 جىلدىعى, ەلباسى ن.نازارباەۆتىڭ 80 جىلدىعىنا وراي ۇيىمداستىرىلاتىن ءىس-شارالاردىڭ جوعارى دەڭگەيدە وتۋىنە ات سالىسۋ كەرەكتىگىن تىلگە تيەك ەتتى.

كەزدەسۋ سوڭىندا وبلىستىق اسسامبلەيا حاتشىلىعىنىڭ مەڭگەرۋشىسى گ.يسمۋرزينا شەرزود اببوز ۇلىن  بىلتىر پايدالانۋعا بەرىلگەن جاڭا دوستىق ءۇيىنىڭ ءۇش قاباتىن دا (كونتسەرت زالى, كونفەرەنتس-زال, كينوزال, اسحانا, كورمە زالى, ت.ب.) ارالاپ, تانىستىردى.

قازاقستان حالقى اسسامبلەياسى توراعاسىنىڭ ورىنباسارى ش.پۋلاتوۆ وبلىستىق قحا حاتشىلىق مەڭگەرۋشىسى گ.ماقسۇتقىزىنا, «قوعامدىق كەلىسىم» كمم باسشىسى ا.جايىلحانوۆاعا, ەتنومادەني بىرلەستىك توراعالارىنا  العىس ءبىلدىرىپ, جۇمىستارىنا ساتتىلىك تىلەدى.

ماڭعىستاۋ وبلىسى