الماتىدا 18-20 قازان ارالىعىندا قازاقستان حالقىنىڭ ەتنيكالىق-ءداستۇرلى مەديتسيناسىنا ارنالعان « ۇلى دالا ەمى» اتتى ءى ۇلتتىق كونفەرەنتسياسى ءوتتى. حالىقارالىق ۇيىمداردىڭ قاتىسۋىمەن وتكەن اۋقىمدى جيىن ءداستۇرلى مەديتسينا ادىستەرىن جاڭعىرتۋدى كوزدەيدى.
ءداستۇرلى مەديتسينا وكىلدەرى كوپتەن بەرى وتكىزۋدى كوكسەپ جۇرگەن جيىنعا 20 مەملەكەتتەن عىلىمي دارەجەلەرى بار 200-گە تارتا دەلەگات قاتىسىپ, 17 باعىتتا اۋقىمدى بايانداما جاسالدى.
ءۇندى مەديتسيناسىنداعى «ايۋۆەردا» مەن «يوگا» سەكتسياسىنىڭ ءوزى تاقىرىپتارعا تاراتىلىپ, مەديتسيناداعى ءبيدىڭ شيپالىق ءرولى باياندالدى. سول سياقتى ستاروۆەرلەردىڭ مەديتسيناسى, فيتوتەراپيا, مانۋالدى تەراپيا, وستەوپاتيا مەن ەمدىك ۋقالاۋ, اپيتەراپيا, ءداستۇرلى قىتاي جانە كورەي مەديتسيناسى, گيرۋدوتەراپيا, گومەوپاتيا سىندى 8 سەكتسيا جۇمىس ىستەدى.
– قازىرگى تاڭدا دۇنيەجۇزىندە ءداستۇرلى مەديتسينا مەن حالىقتىڭ مەديتسينانىڭ ءرولى مەن تانىمالداعى ارتىپ كەلە جاتقاندىعى بايقالادى. الەمنىڭ كوپتەگەن ەلدەرىندە جەرگىلىكتى تۇرعىندار ءۇشىن حالىقتىق مەديتسينا مەديتسينالىق-سانيتارلىق كومەكتىڭ نەگىزگى جانە قولجەتىمدى ءتۇرى بولىپ تابىلادى. بىرقاتار ەلدەردە حالىقتىق مەديتسينا – ءداستۇرلى مەديتسينا دەگەن اتاۋعا يە. ال «دسۇ-نىڭ 2014-2023 جىلدارعا ارنالعان حالىقتىق مەديتسينا سالاسىنداعى ستراتەگياسىندا» حالىقتىق مەديتسينا مەن ءداستۇرلى مەديتسينانى جاقىن جىلداردا دامىتۋدىڭ باعىتتارى انىقتالعان. ياعني, ستراتەگيا حالىقتىڭ جانە ءداستۇرلى مەديتسينانىڭ الەۋەتىن پايدالانۋدا دسۇ-عا مۇشە مەملەكەتتەردىڭ قولداۋى مەن كۇش سالۋىن قاراستىراتىن نەگىزگى ماقساتتاردى ايقىندايدى. ستراتەگيادا ونىمدەردى, ءداستۇرلى مەديتسينا ماماندارىنىڭ تاجىريبەسى مەن قىزمەتىن باقىلاۋ ارقىلى حالىقتىق جانە ءداستۇرلى مەديتسينانى قاۋىپسىز ءارى ءتيىمدى پايدالانۋعا ۇلكەن ءمان بەرىلگەن. سونداي-اق ستراتەگيادا دسۇ-عا مۇشە مەملەكەتتەر ءوز ەلدەرىندەگى حالىقتىق جانە ءداستۇرلى مەديتسيناعا بايلانىستى جاعدايلاردى ساراپتاپ, ەلەكتەن وتكىزىپ, ودان كەيىن ونىڭ ساياسي شارالارىن, ءتارتىبى بەن جەتەكشىلىگىن جاساپ, ەندىرىپ وتىرۋعا ءتيىستى ەكەندىگى اتالعان, – دەيدى قر ۇعا اكادەميگى, دەنساۋلىق ساقتاۋ مينيسترلىگىنىڭ دارىلىك زاتتاردى, مەديتسينالىق بۇيىمدار مەن مەديتسينالىق تەحنيكانى ساراپتاۋ جونىندەگى ۇلتتىق ورتالىعىنىڭ باس كلينيكالىق فارماكولوگى رايسا كۇزدەنباەۆا.
ءوز كەزەگىندە حالىقارالىق «جاس-اي» مەديتسينا ورتالىعىنىڭ باس ديرەكتورى, مەديتسينا عىلىمدارىنىڭ دوكتورى, پروفەسسور, اكادەميك جاسان زەكەي ۇلى: « ۇلى دالا ەمى – تاريحى كۇردەلى, قاتپارى تەرەڭ, كيەلى عىلىم. نەشە شەت ەل اتاقتى عالىمداردى مويىنداعان ۇلى دالا ەم تۇرلەرى تەك شىعىس مەديتسيناسىنىڭ عانا ەمەس, بۇكىل الەم مەديتسيناسىنىڭ قازىناسىنا اينالىپ وتىر. «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا مەديتسينالىق قىزمەت كورسەتۋدىڭ ساپاسى مەن قولجەتىمدىلىگىن قامتاماسىز ەتۋ مىندەتى قويىلعان. وسى ماڭىزدى مىندەتتى ورىنداۋ بارىسىندا « ۇلى دالا» قولدانىسىنداعى ەم تۇرلەرىن ورنىمەن ءتيىمدى پايدالانۋ جوعارىدا مەملەكەت باسشىسى قويعان مىندەتتى تابىستى ورىنداۋعا, ءسوزسىز, سەپتىگىن تيگىزەدى. وسى كونفەرەنتسيا ماقساتى – رۋحاني قۇندىلىقتاردى, ەتنيكالىق-ءداستۇرلى مەديتسينا ادىستەرىن جاڭعىرتۋ, قازاقستان حالقىنىڭ ءومىرىن ۇزارتۋ, سونداي-اق ەتنيكالىق-ءداستۇرلى مەديتسيناعا قاتىسى بار ءار سالا ماماندارىن بىرىكتىرۋ», دەيدى
ۇلتتىق كونفەرەنتسيانى ۇيىمداستىرۋعا «كومپلەمەنتارلىق جانە ءداستۇرلى حالىق مەديتسيناسى ماماندارىنىڭ قوعامى» رەسپۋبليكالىق قوعامدىق بىرلەستىگى جانە قازاقستان حالقى اسسامبلەياسىنىڭ حاتشىلىعى, الماتى قالاسىنىڭ اكىمدىگى, قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتى, حالىقارالىق «جاس-اي» مەديتسينا ورتالىعى ۇيىتقى بولدى.