بۇل جونىندە «ونوماستيكا ىزدەنىس پەن تاجىريبە» اتتى عىلىمي-پراكتيكالىق كونفەرەنتسيادا وبلىستىق تىلدەردى دامىتۋ باسقارماسىنىڭ باسشىسى گۇلجان مەندەكەنوۆا ايتتى.
وڭىردەگى بارلىق 6138 كوشەنىڭ 632-ءسىنىڭ اتى يدەولوگيالىق جاعىنان ەسكىرگەن.سونىڭ 98-ءىنىڭ اتى وزگەرتىلدى, بۇل 18 پايىزى بولىپ سانالادى. سونىمەن قاتار وڭىردەگى 156 اۋىلدان 63 اۋىلدىڭ ەسىمى وزگەرتۋدى قالايدى, سونىڭ ازىرشە 7-ءنىڭ تاريحي اتاۋلارى قالپىنا كەلتىرىلدى. سوڭعى ەكى جىلدا وبلىس بويىنشا 1 اۋداننىڭ, 7 اۋىلدىق وكرۋكتىڭ, 7 اۋىلدىڭ, 106 كوشەنىڭ جانە 14 ءتۇرلى نىساننىڭ تاريحي اتاۋى قالپىنا كەلتىرىلدى جانە جاڭا اتاۋ بەرىلدى. بيىل بۇرىنعى تاران اۋدانىنا بەيىمبەت ءمايليننىڭ, قوستاناي مەملەكەتتىك پەداگوگيكالىق ۋنيۆەرسيتەتىنە عالىم ومىرزاق سۇلتانعازينىڭ, وبلىس ورتالىعىنداعى گاگارين كوشەسىنە نۇرسۇلتان نازارباەۆتىڭ ەسىمى بەرىلدى.
«تىلدەردى دامىتۋ باسقارماسىنا وتكەن جىل مەن 2019 جىلدىڭ 9 ايىندا جەكە جانە زاڭدى تۇلعالاردان ونوماستيكا جونىندەگى 62 ءوتىنىش كەلىپ ءتۇستى. سولاردىڭ كوبىسىندە ولار وبلىس كولەمىنە تانىمال تۇلعالاردىڭ ەسىمىن ماڭگىلىككە ەستە قالدىرۋ ماقساتىمەن ولاردىڭ اتىن ەلدى مەكەندەر مەن كوشەلەرگە بەرۋدى سۇرايدى. وسى 62 ءوتىنىشتىڭ ء44–ىنىڭ يەسىنە ول ايتقان ماسەلە شەشىمىن تاپپايتىنىن ايتىپ تۇسىندىردىك» دەدى گۇلجان ەرماشقىزى.
كونفەرەنتسيادا ءسوز العان فيلوسوفيا عىلىمدارىنىڭ كانديداتى, پروفەسسور قالقامان جاقىپ, ءو.سۇلتانعازين اتىنداعى قوستاناي مەملەكەتتىك پەداگوگيكالىق ۋنيۆەرسيتەتىنىڭ PhD دوكتورى, قاۋىمداستىرىلعان پروفەسسورى راۋان بايدالى جانە تاعى باسقالار جەردىڭ اتاۋى مەملەكەتتىگىمىزدىڭ ءبىر ءرامىزى دەرلىك ماڭىزدى ماسەلە ەكەنىن ايتتى. باسقوسۋدا پىكىر الماسۋلاردان كەيىن, قارار قابىلدانىپ, وعان ماڭىزدى ۇسىنىستار ەنگىزىلدى.