قاراعاندى قالاسىندا قازاقستان رەسپۋبليكاسى كاسىپوداقتار فەدەراتسياسى مەن وبلىس اكىمدىگى اراسىندا ءوزارا ىنتىماقتاستىق تۋرالى مەموراندۋمعا قول قويىلدى.بۇل تۋرالى كاسىپوداق فەدەراتسياسىنىڭ ءباسپاسوز قىزمەتى حابارلادى.
قۇجاتتى قركف توراعاسى ەرالى توعجانوۆ پەن قاراعاندى وبلىسىنىڭ اكىمى جەڭىس قاسىمبەك قول قويىپ, بەكىتتى.
مەموراندۋم اياسىندا تاراپتار الەۋمەتتىك-ەڭبەك قاتىناستارىن رەتتەۋدە جانە الەۋمەتتىك باستامالاردى جۇزەگە اسىرۋداعى وزەكتى ماسەلەلەر بويىنشا ۇستانىمدارىن ايقىنداپ, بىرلەسكەن شارالار قابىلداۋعا كەلىستى.
مەموراندۋمعا قول قويۋ بارىسىندا قركف باسشىسى ىنتىماقتاستىق اياسىندا كەلەشەكتە كەزەك كۇتتىرمەيتىن مىندەتتەرگە توقتالدى.
كاسىپوداقتار توراعاسى وبلىس اكىمىنە كەزدەسۋگە كەلگەنگە دەيىن, ارنايى «ارسەلورميتتال تەمىرتاۋ» اق كومىر دەپارتامەنتىنە قاراستى ت.كۇزەمباەۆ اتىنداعى شاحتاعا ءتۇسىپ, 600 مەترلىك جەر استى زابويلارىنداعى كەنشىلەرمەن جۇزدەسىپ, ارقايسىنىڭ كوكەيتەستى ماسەلەلەرىن ءبىلىپ قايتقانىن جەتكىزدى.
ەرالى توعجانوۆتىڭ ايتۋىنشا, كەنشىلەردىڭ باسىم بولىگى جەر استىنداعى شاحتەرلاردىڭ اۋىر ەڭبەگىن ەسكەرىپ, زەينەت جاسىن 50-گە دەيىن تومەندەتۋ جونىندەگى ۇسىنىستارىن بىلدىرگەن. سونىمەن قاتار, كەنشى ماماندىعىنا جاستاردىڭ قىزىعۋشىلىعىنىڭ كۇرت تومەندەپ, بۇگىندە قاراعاندىلىق شاحتەرلاردىڭ ورتا جاسى 45 ەكەندىكتەرىن دە ايتقان.
وسى اتالعان ماسەلەلەردى ەسكەرە وتىرىپ, قركف توراعاسى وبلىس اكىمىمەن بىرگە ۇكىمەت اتىنا بىرلەسكەن ۇسىنىستارىن دايىنداپ جەتكىزۋ قاجەت دەگەن پىكىرىن ءبىلدىردى.
سونىمەن بىرگە جۇمىسشىلاردىڭ الەۋمەتتىك-ەكونوميكالىق قۇقىقتارىن قورعاۋ ماقساتىندا كاسىپورىنداردى ۇجىمدىق شارتتار جاساۋعا كەڭىنەن تارتۋ ماسەلەلەرى دە قوزعالدى.
بۇگىندە قاراعاندى وبلىسىندا جۇمىس ىستەپ تۇرعان 21 426 كاسىپورىندارمەن 4 056 ۇجىمدىق شارت جاسالسا, بۇل ولاردىڭ 18,9 پايىزىن عانا قامتىپ وتىر.
كاسىپوداقتاردى الاڭداتاتىن ماسەلە - ءوڭىر بويىنشا كاسىپورىنداردىڭ 81 پايىزى ۇجىمدىق شارت جاساماعاندىعىنان ولاردىڭ جۇمىسشىلارىنىڭ قۇقىعى قورعالمايتىندىعى.
كاسىپوداقتار ءۇشىن تاعى ءبىر وتكىر كۇيىندە قالىپ وتىرعان جاعداي - وندىرىستىك جاراقات پەن كاسىبي سىرقاتتاردى ازايتۋ ماسەلەسى.
ەرالى توعجانوۆ وسى ۋاقىت ىشىندە قاراعاندى وبلىسى بويىنشا وندىرىستە 92 ادام زارداپ شەگىپ, ونىڭ 12-ءسى قايتىس بولعاندىعىن اتاپ ءوتتى.
سونداي-اق قاراعاندى وبلىسى بويىنشا كاسىبي سىرقاتقا شالدىققاندار 65,8 پايىز بولسا, شىعىس قازاقستان وبلىسىندا - 25 پايىز.
-كاسىپوداقتار ءۇشىن جۇمىس بەرۋشىلەردىڭ ۇجىمدىق كەلىسىمشارتتا كورسەتىلگەن ساۋىقتىرۋ شارالارى مەن الەۋمەتتىك كەپىلدىكتەردى جۇزەگە اسىرۋى ماڭىزدى, - دەپ اتاپ ءوتتى ەرالى توعجانوۆ.
بۇل كۇنى كاسىپوداق فەدەراتسياسى توراعاسى پروفەسسور ح.م.ماقاجانوۆ اتىنداعى وبلىستىق تراۆماتولوگيا جانە ورتوپەديا ورتالىعىنىڭ كاسىپوداق اكتيۆىمەن كەزدەستى.
كەزدەسۋ بارىسىندا قاراعاندى وبلىسىندا 1-ءشى قىركۇيەكتەن باستالعان مىندەتتى الەۋمەتتىك ساقتاندىرۋ پيلوتتىق جوباسىنىڭ تۇساۋكەسەرى وتكىزىلدى.
جاڭا فورماتتاعى مەديتسينالىق قىزمەتتىڭ ناتيجەلەرىمەن تانىسقان ەرالى توعجانوۆ كاسىپوداقتار ەڭبەككەر حالىقتىڭ دەنساۋلىعىن قورعاۋداعى اتقارىلىپ جاتقان ىستەرگە قولداۋ تانىتىپ قانا قويماي, بۇل باعىتتا بىرلەسە جۇمىس ىستەۋگە ءازىر ەكەندىكتەرىن جەتكىزدى.
«پرەزيدەنت قاسىم-جومارت توقاەۆتىڭ «سىندارلى قوعامدىق ديالوگ-قازاقستاننىڭ تۇراقتىلىعى مەن وركەندەۋىنىڭ نەگىزى» جولداۋىندا مەديتسينالىق قىزمەت كورسەتۋدىڭ ساپاسى مەن قولجەتىمدىلىگىن قامتاماسىز ەتۋدە مىندەتتى مەديتسينالىق ساقتاندىرۋ جۇيەسىن ەنگىزۋ جونىندە اتاپ ايتىلدى.
مەديتسينالىق كومەكتىڭ جاڭا مودەلىن ەنگىزۋ دارىگەرلەردىڭ جالاقىسىن كوبەيتۋگە,ەڭبەك جاعدايلارىن جاقسارتۋعا, جۇمىس ۋاقىتىن وڭتايلاندىرۋعا جانە دەنساۋلىق سالاسىنداعى بىرقاتار كادرلىق ماسەلەلەردى شەشۋگە سەپتىگىن تيگىزەدى.
كاسىپوداقتاردىڭ تاعى ءبىر ماڭىزدى مىندەتى - دەنساۋلىق سالاسى قىزمەتكەرلەرىنىڭ كاسىبي مىندەتىن اتقارۋىنا قولداۋ كورسەتۋ بولىپ تابىلادى. بۇل تۇرعىدا كاسىپوداقتار الەۋمەتتىك ارىپتەستەرىمەن بىرگە قازاقستاندىق دارىگەرلەردىڭ كاسىبي قىزمەتتەرىن اتقارۋىنا قولداۋ كورسەتىپ قانا قويماي, زاڭ اياسىندا قورعاۋعا بەلسەنە اتسالىساتىن بولادى», - دەدى قركف توراعاسى.
كەزدەسۋ قورىتىندىسىندا قركف توراعاسى «پروفەسسور ح.ج.ماقاجانوۆ اتىنداعى وبلىستىق تراۆماتولوگيا جانە ورتوپەديا ورتالىعى» كمك ديرەكتورى ە.ت. قۇرمانعاليەۆتى قركف-نىڭ «ۇزدىك الەۋمەتتىك ارىپتەس» بەلگىسىمەن ماراپاتتادى.
ۇزدىك كاسىپوداق بەلسەندىلەرى مەن كاسىپوداق قوزعالىسىنىڭ مۇشەلەرى «SENIM» دەنساۋلىق ساقتاۋ قىزمەتكەرلەرىنىڭ سالالىق كاسىپوداعىنىڭ 250 مىڭ تەڭگەلىك سەرتيفيكاتتارىنا يە بولدى.
بۇگىندە «SENIM» دەنساۋلىق ساقتاۋ قىزمەتكەرلەرىنىڭ سالالىق كاسىپوداعىنىڭ قاراعاندى وبلىسى بويىنشا 50 باستاۋىش ۇيىمى قۇرىلعان, ولاردىڭ قاتارىندا 21 مىڭ 384 كاسىپوداق مۇشەسى بار.