قوستانايدا ءداستۇرلى ءان بايقاۋى ءوتتى

بايقاۋ ەكى كۇنگە سوزىلدى.وعان قوستانايدان وزگە سەمەي, الماتى, نۇر-سۇلتان, جەزقازعان, كوكشەتاۋ قالالارىنان 15 جاس انشىلەر قاتىستى. قازاق ۇلتتىق ونەر ۋنيۆەرسيتەتنىڭ پروفەسسورى, قازاقستاننىڭ ەڭبەك سىڭىرگەن قايراتكەرى, بەلگىلى جىرشى الماس الماتوۆ باس بولعان قازىلار القاسىنىڭ  شارتى بويىنشا ءار ءانشى نۇرجان ناۋشاباەۆتىڭ ءبىر ءانىن جانە حالىق نەمەسە حالىق كومپوزيتورلارىنىڭ ءبىر شىعارماسىن ورىنداۋى ءتيىس ەدى. بۇگىنگە دەيىن اسا كەڭ تارالماعان نۇرجان اندەرىن جاس انشىلەر  تەز ۇيرەنىپ, ناقىشىنا كەلتىرە ورىندادى. مىسالى, نۇرجاننىڭ بايقاۋدا «باتيماعا», «ارا-اي», «كوكەن-اي» تاعى باسقا اندەرىن انشىلەردىڭ ارقايسىسى ءوز ناقىشىندا الىپ شىقتى.

بايقاۋدىڭ ەكىنشى كۇنى ىرىكتەلگەندەر دوداعا قايتا ءتۇستى. ءانشىنىڭ ءبارى ءدۇلدۇل, ءبارى بۇلبۇل بولسا دا, مارە ءبارى بىردەي كەسپەيتىنى بار.سونىمەن ءۇشىنشى ورىن كوكشەتاۋلىق ءنازيرا بەيسەنوۆاعا, جەزقازعاندىق ساعىمباي مالىبەكوۆ پەن قوستاناي اۋدانىنىڭ وكىلى جانات مىنايدارعا بۇيىردى. ولارعا ارقايسىسى 100 مىڭ تەڭگەنىڭ سەرتيفيكاتى قوسا تاپسىرىلدى.ەكىنشى ورىندى سەمەي قالاسىنىڭ وكىلى تاڭات مۇقاشەۆ پەن نۇرسۇلتاندىق اقىلتاي زەكەنوۆ ءبولىستى, ولاردىڭ ارقايسىسى 200 مىڭ تەڭگەنىڭ سەكتيفيكاتىن الدى. ءبىرىنشى ورىندى الماتىلىق ءزارينا راحمانبەرديەۆا جەڭىپ الدى. وعان 300 مىڭ تەڭگەنىڭ سەرتيفيكاتى تاپسىرىلدى. ال باس جۇلدە نۇر-سۇلتان قالاسىنداعى قازاق ۇلتتىق ونەر ۋنيۆەرسيتەتىنىڭ 2 كۋرس ستۋدەنتى فارحات جاكىشكە 500 مىڭ تەڭگەنىڭ سەرتيفيكاتىمەن بىرگە تاپسىرىلدى.

«نۇرجان اندەرى ارقانىڭ وزگە اندەرىنەن ءوز بوياۋىمەن ەرەكشەلەنەدى. ول الدىمەن ايقايلاپ, قيقۋ سالىپ الادى. سونداي ەرەكشەلىكتەرىن جاس انشىلەر اشىپ كورسەتە الدى. اسىرەسە, ول نۇرجاننىڭ «كوكەن-اي», «ارا-اي» اتتى اندەرىنەن بايقالدى. وسى كەزگە دەيىن اسا زەرتتەلمەگەن, ناسيحاتى دا از بولعان اقىن ءارى كومپوزيتور نۇرجاننىڭ اندەرىنەن تۇڭعىش بايقاۋ بولسا دا انشىلەردىڭ اياقالىسى جامان بولعان جوق. ازدى-كەمدى كەمشىلىكتەرىن ەلەمەيمىز, ويتكەنى الداعى ۋاقىتتا ءداستۇرلى وتەتىن بايقاۋعا ءالى تالاي تالانتتار قاتىساتىن, كوشتى تۇزەيتىن بولادى» دەدى قازىلار القاسىنىڭ مۇشەسى, نۇرجانتانۋشى اقىلبەك شاياحمەت.