قاراعاندى وبلىسىنداعى وساكاروۆ اۋدانىنىڭ وشاعان اۋىلىندا تۇراتىن جالعىز باستى انا اتاۋلى الەۋمەتتىك كومەك قارجىسىنا جەكە قوسالقى شارۋاشىلىعىن قۇرىپ, وتباسىنىڭ ماتەريالدىق جاعدايىن جاقسارتۋعا قول جەتكىزدى.
تاتيانا ەسكينانىڭ كۇيەۋى ءبىراز جىل بۇرىن ومىردەن وتكەن ەكەن. سودان بەرى ايەل جەتى بالانى جالعىز ءوزى تاربيەلەپ وتىر. ول وسىعان دەيىن ءوزىنىڭ جەكە شارۋاشىلىعى بولعانىن ارمانداعانىمەن قاراجاتتىڭ تاپشىلىعىنان ويىنداعىسىن جۇزەگە اسىرا الماي جۇرگەن-ءدى. سوندىقتان وتاناسى بيىل ااك-تەن تۇسكەن اقشانى ۇنەمدەپ جيناي باستادى. ءبىراز ۋاقىتتان كەيىن ەسكيندەردىڭ اۋلاسىندا ءۇش بۇزاۋ, توعىز قويان جانە توراي پايدا بولدى.
«ەندى كورشىلەردەن ءبىزدىڭ ەش ايىرماشىلىعىمىز جوق, ءوز شارۋاشىلىعىمىز بار. ەڭ باستىسى, بالالارىم قۋانىپ, بىردەن ءۇي جانۋارلارىنا كۇتىم جاساي باستادى. ەندى مال باسىن كوبەيتۋدى جوسپارلاپ وتىرمىن. كىم بىلەدى, مۇمكىن بالالارىم بولاشاقتا فەرمەر دە بولار. بارلىعى دا كىشكەنتاي نارسەدەن باستالادى ەمەس پە؟!», دەگەن كوپ بالالى انا كەلەشەگىنە ۇمىتتەنە قارايدى.
جەرگىلىكتى اكىمدىك وكىلدەرىنىڭ ايتۋىنشا, ەسكيندەردىڭ تابىسى كەدەيلىك شەگىنەن تومەن بولدى (جان باسىنا شاققانداعى كىرىس – 8,772 تەڭگە). اتاۋلى الەۋمەتتىك كومەك تاعايىندالعاننان كەيىن وتباسى بىرتىندەپ كەدەيلىك شەگىن ەڭسەرىپ, كۇردەلى جاعدايدان شىقتى.
«اتاۋلى الەۋمەتتىك كومەك كوپ بالالى وتباسىلاردىڭ ءومىر ءسۇرۋ جاعدايىن جاقسارتۋعا مۇمكىندىك بەرەدى. كومەك الۋشىلاردىڭ كوپشىلىگى مەملەكەت ەسەبىنەن قىسقا مەرزىمدى قايتا دايارلاۋ كۋرستارىنان وتەدى. كەيبىرى ءۇي جانۋارلارىن ساتىپ الىپ, جەكە قوسالقى شارۋاشىلىقتارىن دامىتادى. جالپى, قاراعاندى وبلىسىندا 9 مىڭ 620 وتباسى نەمەسە 46 مىڭ 915 ادام 3,3 ملرد تەڭگە كولەمىندە ااك الادى. تاتيانا ەسكينانىڭ وتباسىنا اي سايىن 145 مىڭ 523 تەڭگە كولەمىندە جالپى سوماسى 1 ملن 746 مىڭ تەڭگەنى قۇرايتىن اتاۋلى الەۋمەتتىك كومەك تاعايىندالدى», دەيدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باستىعى اسەم جۇنىسبەكوۆا.
جۋىردا ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ەلىمىزدە 2020 جىلدىڭ 1 قاڭتارىنان باستاپ ەنگىزۋ جوسپارلانعان ااك كورسەتۋدىڭ جاڭا تەتىكتەرىن تانىستىرعانى بەلگىلى.
«ەڭ باستى قاعيدا – مەملەكەت شىن مانىندە كومەككە مۇقتاج ادامدارعا, الدىڭعى كەزەكتە بالالار مەن كوپ بالالى وتباسىلارعا كومەكتەسەدى. ەڭبەككە قابىلەتتى ازاماتتار جۇمىس ىستەۋى كەرەك. مەملەكەت جۇمىسقا ورنالاستىرۋعا نەمەسە شاعىن بيزنەسپەن اينالىسۋعا قول ۇشىن سوزادى. مەملەكەتتىك كومەك الۋعا كوپ بالالى وتباسىلاردى قولداۋ, تابىسى تومەن وتباسىلارعا اتاۋلى الەۋمەتتىك كومەك كورسەتۋ, تابىسى از وتباسىلارداعى بالالارعا كەپىلدەندىرىلگەن الەۋمەتتىك پاكەت بەرۋ كىرەدى», دەگەن-ءدى ءبىرجان نۇرىمبەتوۆ.