قازاقستاننىڭ ىشكى ىستەر ءمينيسترى ەرلان تۇرعىمباەۆ ازەربايجانعا جۇمىس ساپارى بارىسىندا ەكى ۇكىمەتارالىق حالىقارالىق كەلىسىمشارتقا قول قويدى.
سونداي-اق ساپار كەزىندە كوشى-قون سالاسىنداعى زاڭسىزدىقتارمەن بىرلەسىپ كۇرەسۋدىڭ نىساندارىن, ۇيىمداستىرۋ جولدارىن ايقىندايتىن جانە وسى باعىتتا اقپارات الماسۋدى قامتاماسىز ەتەتىن كەلىسىمگە قول قويىلدى.
بۇل قۇجاتتا ەل اۋماعىندا جۇرگەن ازاماتتار جايلى, ەكى مەملەكەتتە ازاماتتىقتى قابىلداعان نەمەسە قالپىنا كەلتىرىلگەندەر تۋرالى مالىمەت الماسۋ, سونىمەن بىرگە تاجىريبەلەر ءبولىسۋ, پراكتيكالىق كومەك كورسەتۋ كوزدەلگەن.
بۇعان قوسا, قازاقستان رەسپۋبليكاسى مەن ازەربايجان رەسپۋبليكاسى ۇكىمەتتەرى اراسىنداعى ەكى ەل ازاماتتارىنىڭ ۆيزاسىز ءجۇرۋى جونىندەگى كەلىسىمگە وزگەرىستەر ەنگىزۋ تۋرالى حاتتاماعا قول قويىلدى.
بۇل حاتتاما ەكى مەملەكەت ازاماتتارىنىڭ مىندەتتى تىركەلۋسىز ءجۇرۋىن 30 كۇنگە دەيىن, سونداي-اق مەملەكەتتىك شەكارادان وتكەننەن كەيىن ەلدە بولۋ مەرزىمىن 90 كۇنگە دەيىن ۇزارتۋدى قاراستىرادى. بۇدان بۇرىن ۇلتتىق زاڭنامالار بويىنشا ازەربايجان ازاماتتارى ەلگە كەلگەن سوڭ 5 كۇن ىشىندە ءىىو-دا تىركەلۋى ءتيىس بولاتىن.
سونداي-اق قازاقستاننىڭ ىشكى ىستەر ءمينيسترى مەن ازەربايجان رەسپۋبليكاسى مەملەكەتتىك كوشى-قون قىزمەتىنىڭ باستىعى ۆۋسال گۋسەينوۆپەن كەزدەسۋى بارىسىندا كوشى-قون سالاسىنداعى ءوزارا بايلانىس جاساۋدىڭ وزەكتى ماسەلەلەرى جانە قول قويىلعان كەلىسىمدەردى ىسكە اسىرۋ جونىندەگى شارالار تالقىلاندى.
«قول قويىلعان حالىقارالىق قۇجاتتار تەك ءبىزدىڭ قىزمەتتەردىڭ ءوزارا ءىس-ارەكەتتەرىن جەتىلدىرىپ قويماي, كوشى-قون تالاپتارىن وڭتايلاندىرۋ ارقىلى ءبىزدىڭ حالقىمىزدىڭ دوستىعىن نىعايتا تۇسەدى. سونداي-اق بۇل قۇجاتتار ەكى ەل ازاماتتارىنىڭ ىسكەرلىك بايلانىسىن كەڭەيتەدى. سول ارقىلى تۋريستىك سالانىڭ دامۋىنا ىقپال ەتەدى», – دەپ ءتۇسىندىردى ەرلان تۇرعىمباەۆ.
ساپار بارىسىندا ە.تۇرعىمباەۆ ازەربايجاننىڭ ىشكى ىستەر ءمينيسترى ۆيلاەت ەيۆازوۆپەن كەزدەسىپ, ۆەدومستۆوارالىق بايلانىستاردىڭ كەلەشەگىن تالقىلادى.
مينيسترلەر جەدەل قىزمەتتىڭ كوپتەگەن باعىتتارى بويىنشا پوليتسەيلەردىڭ ىنتىماقتاستىعى ەكىجاقتى فورماتتا, سونداي-اق حالىقارالىق قۇرىلىم اياسىندا جوعارى دەڭگەيدە قالىپتاسقانىن اتاپ ءوتتى.