نازارباەۆ زياتكەرلىك مەكتەپتەرى يۋنەسكو-نىڭ Wenhui Award 2019 سىياقىسىن جەڭىپ الدى. وسىعان وراي يۋنەسكو-نىڭ الماتىداعى كلاستەرلىك بيۋرو ديرەكتورى كريستا پيكات «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ ءتورايىمى كۇلاش شامشيدينوۆاعا قۇتتىقتاۋ حات جولدادى.
«قازاقستان, قىرعىزستان, تاجىكستان جانە وزبەكستان بويىنشا يۋنەسكو-نىڭ كلاستەرلىك بيۋروسىنىڭ اتىنان ءوزىمنىڭ «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنا دەگەن اسا قۇرمەتىمدى ءبىلدىرىپ, سىزدەردىڭ ۇيىمدارىڭىزدىڭ يۋنەسكو Wenhui Award 2019 سىياقىسىن جەڭىپ العاندارىڭىزدى قۋانىشپەن حابارلايمىن» دەلىنگەن كريستا پيكاتتىڭ حاتىندا.
نزم وكىلدەرىنىڭ ايتۋلارىنشا, بۇل مەكتەپ يۋنەسكو-نىڭ ءبىلىم سالاسىنداعى سىياقىسىن يەلەنگەن قازاقستاننىڭ ءبىرىنشى ءبىلىم وشاعى. Wenhui Award ۋنيۆەرسيتەت پەن مەكتەپ اراسىنداعى ء«بىلىم-2030» جوباسىن ىلگەرىلەتۋ جولىنداعى سەرىكتەستىكتى دامىتۋعا باعىتتالعان.
ايتا كەتۋ كەرەك, يۋنەسكو سىياقىسى قازاقستاندىق يننوۆاتسيالىق مەكتەپتەرگە ساپالى ءبىلىم مەن ءومىر بويى ءبىلىم الۋعا ىقپالداساتىن ۋنيۆەرسيتەتتەر مەن مەكتەپتەر اراسىنداعى تابىستى سەرىكتەستىك ءۇشىن, بالالار مەن جاستاردى ومىرگە, جۇمىسقا جانە جاھاندىق ازاماتتىققا بەيىمدەۋ جولىنداعى ەڭبەك ءۇشىن بەرىلەدى.
فينالدىق كەزەڭنىڭ نومينانتتارىنىڭ ىشىندە اۋستراليا, قىتاي, مالايزيا جانە شري-لانكا ەلدەرىنىڭ بەدەلدى ۋنيۆەرسيتەتتەرى بولدى.