بۇگىن وبلىس اكىمى اماندىق باتالوۆ وتاندىق ينۆەستورلارمەن كەزدەستى. جيىن بارىسىندا تالدىقورعاندا ەكسپورتقا باعىتتالعان تەكستيل شىعاراتىن كاسىپورىن اشىلاتىنى ايتىلدى. بۇل تۋرالى الماتى وبلىسى اكىمىنىڭ ءباسپاسوز قىزمەتى حابارلادى.
«Yessenov Lab» جوعارى تەحنولوگيالار عىلىمي ورتالىعى» جشس ديرەكتورى سۇلتان كۇنادىلوۆتىڭ ايتۋىنشا, تەحنيكالىق سورادان دايىندالاتىن تالشىق جوعارى ساپالى ءارى مىقتى بولادى. ونى مەديتسينادا, قۇرىلىستا, جيھاز جاساۋدا, كيىم تىگۋدە جانە باسقا دا سالالاردا قولدانادى. اتاپ وتەرلىگى, تەحنيكالىق سورا قۇرامىندا تگك كاننابينويدتارى جوق دەسە دە بولادى. وسى جوباداعى «Elaxima Tech Style inc قازاقستان» ينۆەستور كومپانياسى اقش-تىق سەرىكتەستەرىمەن بىرگە تەكستيل وندىرۋگە ماماندانىپ كەلەدى.
كومپانيا الماتى وبلىسىنىڭ اۋماعىندا سورا تالشىقتارىنان تەكستيل وندىرەتىن كاسىپورىن اشىپ, دايىن ءونىمدى قىتاي مەن ەۋروپا ەلدەرىنە ەكسپورتتاۋعا نيەتتى. وسىعان بايلانىستى ءبىرىنشى كەزەكتە جالپى اۋماعى 2 مىڭ شارشى مەتر بولاتىن, اۆتوجول جانە تەمىر جول قاتىناستارىمەن قامتىلعان عيمارات ساتىپ الۋ نەمەسە جالعا الۋ جۇمىستارى اتقارىلۋى كەرەك. ەكىنشى كەزەكتە كومپانيا ءوز شيكىزاتىن ءوسىرۋدى قولعا الماقشى. ول ءۇشىن سۋارمالى جەر تەلىمى قاجەت.
ينۆەستور-كومپانيا وكىلدەرىنىڭ سوزدەرىن تىڭداعان اماندىق باتالوۆ مۇنداي ءوندىرىستى تالدىقورعاندا اشۋعا ۇسىنىس ءبىلدىردى. لايىقتى عيمارات تابۋ تالدىقورعان قالاسى اكىمىنىڭ ورىنباسارىنا تاپسىرىلدى. جانە ونىڭ سىرتقى ينفراقۇرىلىمىن جۇرگىزىپ بەرۋگە قولداۋ كورسەتىلەتىنى ايتىلدى.
جەر ۋچاسكەسىنە قاتىستى بۇل ماسەلەنى وڭىردەگى اگرارلىق سالا قىزمەتكەرلەرىمەن بىرگە كووپەراتسيا اياسىندا شەشۋگە بولادى. وبلىس اكىمى سەرىكجان بەسكەمپىروۆ كومپانيا ءوز تاراپىنان تەحنيكالىق سورانى قانداي كليماتتىق جاعدايدا ءوسىرۋ كەرەكتىگى تۋرالى تولىق مالىمەت بەرۋى قاجەتتىگىن ايتتى. سول مالىمەتتەردىڭ نەگىزىندە ءتيىستى جۇمىس اتقارىلادى. الدىمەن وبلىس اكىمىنىڭ تاپسىرماسىنا ساي كووپەراتسيا اياسىندا 1-2 مىڭ گا سۋارمالى جەر ءبولۋ مۇمكىندىكتەرى قاراستىرىلماق.
كەزدەسۋ سوڭىندا وبلىس اكىمى اماندىق باتالوۆ ءوز ورىنباسارلارى س.بەسكەمپىروۆ پەن ج.تۇياقوۆقا وسى جوبانىڭ جۇزەگە اسىرىلۋىن باقىلاۋدا ۇستاۋدى تاپسىردى. تاراپتار بارلىق ماسەلەلەر بويىنشا ناقتى شەشىمدەر قابىلدانعاندا, وبلىس اكىمىنىڭ قاتىسۋىمەن تاعى ءبىر كەزدەسۋ وتكىزۋگە ۋاعدالاستى.