گولۋبوۆكا اۋىلىنداعى «اباي» شارۋا قوجالىعىنىڭ باسشىسى نيكولاي ميللەر – جاقسى جەر ىزدەپ ەشقايدا كەتپەگەن نەمىس ۇلتىنىڭ وكىلى. ءوزى تۋىپ-وسكەن قازاق اۋىلىنىڭ وركەندەپ وسۋىنە ۇلەس قوسۋدا. استىقتى القاپتىڭ يەسى. ميللەر جاساعان قالاداعىداي ءومىر سۇرەتىن وركەنيەتتى اۋىلعا كەلسەڭىز تاڭعالاسىز.
گولۋبوۆكاڭىزدىڭ بايىرعى اتاۋى – قورعانكول. تىڭ يگەرۋ كەزىندە اتاۋىن جوعالتىپ العانى بولماسا, قازىرگى اۋىل توق, امان-ەسەن جايناپ تۇر.
وسى تىڭ يگەرۋشىلەر وتباسىندا, قورعانكولدە نيكولاي ميللەر دۇنيەگە كەلگەن.
وسىدان ءبىراز بۇرىن نيكولاي ميللەر اۋىلداستارىمەن اقىلداسا وتىرىپ, جەرگىلىكتى مۇسىلماندار ءۇشىن مەشىت, ال پراۆوسلاۆيە حريستياندارى ءۇشىن شىركەۋ سالۋدى قولعا الدى.
اۋىلىندا وزبەكستاننان كەلگەن جۇمىسشىلار وتباسىلارىمەن بىرگە تۇرىپ جاتىر. قازىر ولار وزدەرى باستاعان مەشىت قۇرىلىسىن اياقتاپ قالدى.
نيكولاي ميللەردىڭ ايتۋىنشا, مەشىت تە ورتالىقتاندىرىلعان جىلۋ قۇبىرىنا قوسىلعان. اۋلاسىنا ءتۇرلى اعاشتار مەن جەمىس-جيدەكتەر وتىرعىزىلعان.
تاعى ءبىر ەرەكشەلىگى – اۋىل مەشىتى وزگەشە ۇلگىدە تۇرعىزىلۋدا. شاعىن, جيناقى, ءساندى.
– بىرقاتار مەشىتتىڭ ۇلگىلەرىن كوردىك. بىزگە قازانداعى مەشىتتەردىڭ ۇلگىسى ۇنادى, – دەيدى نيكولاي ميللەر.
جۋىردا قازاقستان مۇسىلماندارى ءدىني باسقارماسىنىڭ وبلىستاعى وكىل يمامى جولداس قاجى قوسپاق ۇلى دا گولۋبوۆكاعا بارىپ قايتتى. جەرگىلىكتى تۇرعىندارمەن دە جۇزدەستى. جولداس قاجى شارۋاشىلىق باسشىسىنا ريزاشىلىعىن ءبىلدىرىپ, مەشىتتى تىركەۋ جۇمىسىنا قولداۋ كورسەتپەك.
ءبىز دە جولساپارلار بارىسىندا نيكولاي الەكساندروۆيچتىڭ اۋىلىندا تالاي رەت بولدىق. ازىلىمەن قاتار قىزىقتى اڭگىمەلەرىن دە تىڭداي بەرگىڭ كەلەدى.
مايمىش اتا جايلى ءجيى ايتادى. قورعانكولدىڭ بالاسى – ميللەر سولتۇستىك مۇزدى مۇحيتتا اسكەري-فلوتتا قىزمەت ەتىپ, سۇڭگۋىر قايىقتا تەڭىزشى بولعان.
ءيا, ميللەر جايلى قانشا جازساق تا, ارتىق ەمەس دەپ ويلايمىن. ءبىزدىڭ ەلىمىزگە قورعانكولدىڭ وسىنداي ەڭبەكقور, باسقالارعا ۇلگى ەتەرلىك ازاماتتارىنداي ەڭبەك ادامدارى كەرەك-اق.
پاۆلودار وبلىسى,
ەرتىس اۋدانى