شىمكەنتتە ەتنومادەني بىرلەستىكتەردىڭ قاتىسۋىمەن ۇلتىمىزدىڭ مەيماندوستىعىن كورسەتكەن «قازاق داستارقانى» كورمە-فەستيۆالى ءوتتى.
قازاقستان حالقى اسسامبلەياسىنىڭ (قحا) «قازاقتانۋ» جوباسى اياسىندا قولعا الىنعان ءىس-شارانى بيىل قالالىق قحا مەن ادەت-عۇرىپ جانە سالت-ءداستۇر ورتالىعى بىرلەسە ۇيىمداستىردى.
ءتورتىنشى جىل قاتارىنان وتكىزىلىپ وتىرعان شارادا شىمكەنتتىك 11 ەتنومادەني بىرلەستىك ءوز تالعامدارى بويىنشا قازاقتىڭ ۇلتتىق تاعامدارىن دايىنداپ, قازاق داستارقانىن جايدى ءارى دايىنداعان تاعامداردىڭ تانىم-تاريحىنا ءۇڭىلىپ, اس ازىرلەۋدىڭ ءادىس-ءتاسىلىن كەلگەن قوناقتارعا تانىستىردى. جايىلعان داستارقاننان ءدام تاتقان كوپشىلىك ونىڭ ىنتىماققا باستايتىن قادىر-قاسيەتىنە دە قانىقتى.
– «رۋحاني جاڭعىرۋ» باعدارلاماسى اياسىندا جۇزەگە اسىپ كەلە جاتقان بۇل ءىس-شارا قازاق مادەنيەتىن, تاريحىن, فيلوسوفياسىن ناسيحاتتاۋعا باعىتتالعان. وسى ارقىلى قالاداعى ەتنوستاردى مەملەكەت قۇراۋشى قازاق حالقىنىڭ ماڭايىنا توپتاستىرۋدى, ۇلتىمىزدىڭ قوناقجايلىق ءداستۇرىن دارىپتەپ, رۋحاني قۇندىلىقتارىمىزدى جاڭعىرتۋدى كوزدەپ وتىرمىز. قازاقتىڭ اس مازىرىندەگى ۇلتتىق تاعامداردىڭ سان الۋاندىعىن جۇرتشىلىققا كورسەتۋ دە باستى ماقساتىمىز, – دەيدى جيىندا ءسوز العان شىمكەنت قالالىق قازاقستان حالقى اسسامبلەياسى توراعاسىنىڭ ورىنباسارى ءمۇراتالى قالمۇراتوۆ.
ءىس-شاراعا بەلسەنە قاتىسۋشىلاردىڭ ءبىرى – شىمكەنت قالالىق ازەربايجان ەتنومادەني بىرلەستىگى توراعاسىنىڭ ورىنباسارى ارزۋ گۋربونوۆا. ول – قيىن-قىستاۋ كەزەڭدە اتا-بابالارىن اشتىقتان امان الىپ قالعان قازاق داستارقانىنا ەرەكشە قۇرمەتپەن قارايتىنىن ايتادى.
– سوناۋ تار زاماندا كۇشتەپ قونىس اۋدارىلعان ميلليونداعان ەتنوستى قازاق حالقى ءوز ۇيىنە قابىلداپ, ءبىر ءۇزىم نانىن ءبولىپ بەردى. بىزدەردىڭ اتا-بابالارىمىزدى بوتەنسىمەي, ءوز بالالارىمەن بىرگە ءبىر داستارقاننان, ءبىر ىدىستان ءدام تاتقىزدى. جەرگىلىكتى حالىقتىڭ دارقاندىعىنىڭ ارقاسىندا بۇگىنگى بەيبىت كۇنگە دە جەتتىك. سوندىقتان ءبىز قازاق حالقىنا العىس ايتا وتىرىپ, قازاق داستارقانىنىڭ قادىر-قاسيەتىن ەرەكشە باعالايمىن, – دەيدى ول.
كورمە-فەستيۆال اياسىندا كوپشىلىك باۋىرساق ءپىسىرۋ مەن تابا نان جابۋدىڭ تاسىلدەرىمەن تانىستى. سونىمەن قاتار اسىق اتۋ, لاڭگى تەبۋ, ارقان تارتۋ سەكىلدى قازاقتىڭ ۇلتتىق ويىن تۇرلەرى مەن ەتنومادەني بىرلەستىكتەر جانىنداعى ونەر ۇجىمدارى دايىنداعان كونتسەرتتىك باعدارلامانى تاماشالادى.
ەستەرىڭىزگە سالا كەتەيىك, «قازاق داستارقانى» فەستيۆالى وڭىرلىك قازاقستان حالقى اسسامبلەياسىنىڭ باستاماسىمەن 2015 جىلدان بەرى وتكىزىلىپ كەلەدى. وتكەن جىلدارى فەستيۆال اياسىندا ەتنوس وكىلدەرى قازاقتىڭ ۇلتتىڭ تاعامى ەت اسۋدان شەبەرلىكتەرىن كورسەتىپ, قازاقتىڭ ۇمىت بولا باستاعان ۇلتتىق تاعامدارىن دايىنداۋدان سايىسقا تۇسكەن بولاتىن.
شىمكەنت