جاقىندا قاراعاندى وبلىسىنا جۇمىس ساپارىمەن كەلگەن ۇكىمەت باسشىسى اسقار مامين رەسپۋبليكالىق ماڭىزداعى جولداردىڭ قۇرىلىسىمەن, اتاپ ايتقاندا «قاراعاندى – بالقاش», «قاراعاندى – تەمىرتاۋ», قاراعاندىنىڭ سولتۇستىك جانە شىعىس اينالما جولدارى سىندى ءىرى ينفراقۇرىلىمدىق جوبالاردىڭ جۇزەگە اسۋ بارىسىمەن تانىستى.
ايتا كەتۋ كەرەك, بۇل جارىلقاعىر جوبالار تۇڭعىش پرەزيدەنت – ەلباسى نۇرسۇلتان نازارباەۆتىڭ باستاماسىمەن قولعا الىنعان «نۇرلى جول» باعدارلاماسىنىڭ اياسىندا دۇنيەگە كەلگەن ەدى.
قازىرگى تاڭدا قاراعاندى مەن بالقاش قالالارىنىڭ اراسىن جالعايتىن ءتورت جولاقتى جولدىڭ قۇرىلىسى قىزۋ, جۇمىس جوسپارلانعان كەستەگە ساي ءجۇرىپ جاتىر. «ورتالىق-وڭتۇستىك» كولىك ءدالىزىن قايتا قۇرۋ بويىنشا قولعا الىنعان اۋقىمدى جوبا اياسىنداعى جۇمىستارعا 2300-دەن استام ادام مەن 1200 بىرلىك ءتۇرلى تەحنيكا جۇمىلدىرىلعان.
جۇمىستىڭ جاي-جاپسارىمەن تانىسقان ۇكىمەت باسشىسى «قاراعاندى – بالقاش» تاس جولىن 2020 جىلى اياقتاۋدى تاپسىردى. ال جول بويىن اباتتاندىرۋدى تولىق ءبىتىرۋ 2021 جىلدىڭ ەنشىسىنە تيەسىلى دەپ جوسپارلاندى.
ال «قاراعاندى – تەمىرتاۋ» مەن سولتۇستىك جانە شىعىس اينالما جولدارى مويىنعا الىنعان مىندەتتەمەلەرگە ساي بيىلعى جىلدىڭ سوڭىنا دەيىن اياقتالۋعا ءتيىس.
اينالما جول دەمەكشى, توعىز جولدىڭ تورابىندا تۇرعان قاراعاندى قالاسى ءۇشىن بۇل جوبا اۋاداي قاجەت بولاتىن. مۇنىڭ كوپتەگەن سەبەپتەرى بار. سونىڭ بىرەۋىن عانا ايتساق تا, بۇل ماسەلەنىڭ كۇن تارتىبىندە وتكىر تۇرعانىن بايقاۋعا بولادى. ماسەلەن, كەنشىلەر استاناسى ارقىلى كۇنىنە 20 مىڭنان استام ترانزيتتىك كولىك وتەدى ەكەن. بۇل دەگەنىڭىز, جەڭىلى بار, اۋىرى بار, قاپتاعان كولىك وبلىس ورتالىعىن قاق جارىپ ءوتىپ, قالانى كوك تۇتىنگە تۇنشىقتىرىپ قانا قويماي, جول قوزعالىسىن دا قيىنداتىپ جىبەرەدى دەگەن ءسوز. ال اۋىر جۇك كولىكتەرىنىڭ قالا ىشىندەگى جولداردىڭ تەزىرەك توزۋىنا ۇلكەن «ۇلەس» قوسىپ جۇرگەنى جاسىرىن ەمەس. مىنە, وسى ءتۇيىندى ماسەلەنى ءبىرجولا شەشۋ ماقساتىندا جالپى ۇزىندىعى 48,4 شاقىرىمدى قۇرايتىن سولتۇستىك –شىعىس اينالما جولىن سالۋ قولعا الىنعان بولاتىن.
قاراعاندىنىڭ سولتۇستىك جانە شىعىس اينالما جولى پايدالانۋعا بەرىلگەندە وبلىس ورتالىعى تالاي جىلدان بەرى ءتۇيىنى تارقاتىلماي كەلگەن بىرنەشە پروبلەمادان قۇتىلادى. جوعارىدا ايتىپ وتكەنىمىزدەي, قالا ىشىندەگى جولداردا كەپتەلىس كەميدى, شاھاردىڭ ەكولوگيالىق جاعدايى دا جاقسارا تۇسپەك. بۇدان بولەك, اۋىر جۇك كولىكتەر قالا ىشىمەن ءجۇرىپ قانشاما ۋاقىتىن جوعالتپاي, اينالما جولمەن ەش كەدەرگىسىز ساپارىن جالعاستىرا بەرەتىن بولادى. سونان سوڭ, اينالما جولدىڭ بويىندا شاعىن جانە ورتا بيزنەستىڭ ءتۇرلى نىساندارى سالىنىپ, كاسىپكەرلەردىڭ ىستەرىن دوڭگەلەتۋىنە دە مول مۇمكىندىك تۋىندايتىنىن ايتا كەتەيىك.
جول قۇرىلىس تۋرالى ءسوز قوزعاعاندا, جەزقازعان وڭىرىندەگى جاعدايدى اينالىپ وتۋگە بولمايدى. جالپى, بۇل وڭىردەگى اۆتوموبيل جولدارىنىڭ جالپى ۇزىندىعى 1542 شاقىرىمعا سوزىلىپ جاتىر. سوڭعى ءۇش جىلدىڭ ىشىندە وسى جولدىڭ 535 شاقىرىمىنا جوندەۋ جۇمىستارى جۇرگىزىلدى. اراسىندا رەسپۋبليكالىق, وبلىستىق جانە جەرگىلىكتى ماڭىزداعى ۋچاسكەلەرى بار بۇل جوباعا 13,2 ملرد تەڭگە بولىنگەن.
بيىل جەزقازعان – ۇلىتاۋ وڭىرىندەگى رەسپۋبليكالىق جانە جەرگىلىكتى ماڭىزداعى جولدىڭ 140 شاقىرىمىن جوندەۋ ءۇشىن بيۋدجەتتەن 5,9 ملرد تەڭگە ءبولىندى. ءتۋريزمدى دامىتۋ جانە قاسيەتتى جەرلەرگە وڭاي جەتۋدى قامتاماسىز ەتۋ ماقساتىندا اۋداندىق ماڭىزداعى جولدارعا ورتاشا دەڭگەيدەگى جوندەۋ جۇمىستارى جۇرگىزىلدى.
جىل باسىنان بەرى جەزقازعان قالاسىندا 13 كوشەگە ورتا دەڭگەيلى جوندەۋ جۇرگىزىلدى. بۇل جۇمىستارعا بيۋدجەتتەن 1 ملرد تەڭگە بولىنگەن. ال ساتباەۆ قالاسىندا ءتورت كوشەنىڭ اسفالت جولى جوندەۋدەن ءوتتى. سونىمەن قاتار جەزقازعان مەن ساتباەۆ قالاسى اراسىنداعى كۇرە جولعا دا جوندەۋ جۇمىستارى جۇرگىزىلدى.
قاراعاندى وبلىسى