ات سپورتى ماۋسىمىنىڭ جابىلۋىنا وراي ۇيىمداستىرىلعان قالالىق اشىق تۋرنيرگە نۇر-سۇلتان قالاسىنان, قاراعاندى, تەمىرتاۋ, تاراز, وسكەمەن, الماتى وڭىرلەرىنەن تۇلپارلار قاتىستى.
بۇل كۇنى يپپودرومعا جينالعان جۇرتشىلىق 24 شاقىرىمدىق الامان بايگە, 2,4 شاقىرىمدىق مايدا جارىس, 14 شاقىرىمدىق نەگىزگى بايگە جانە 8 شاقىرىمدىق جورعا جارىستارىن تاماشالادى.
ءسويتىپ, 24 شاقىرىمدىق الامان بايگەگە 12 جۇيرىك قاتىستى. پاۆلودارلىق «سەنىم» اتتى تۇلپار الاماندا ءبىرىنشى بولىپ كەلدى. اتتىڭ يەسى – باقتيار بايزاقوۆ. توق بايگەدە دە باقتياردىڭ «كارلۋحكان» اتتى جۇيرىگى توپ جاردى.
ال ۇشقىر اتتاردىڭ قىسقا قاشىقتىقتاعى جارىسىندا الماتىنىڭ «مەيك مەمەريس», ۋسپەن اۋدانى «گاليتسكوە» جشس-ءنىڭ «پوپۋتچيك» تۇلپارلارى الدا كەلدى.
–مەن جىل سايىن بايگەگە قاتىسامىن. بۇگىن «كارلۋكحان» اتتى تۇلپارىممەن توق بايگەدە ءبىرىنشى كەلدىم. ءار جۇيرىكتىڭ ءوز ەرەكشەلىگى بار. اتتىڭ شابىسى بىزگە دە بايلانىستى. «كارلۋكحان» بىلتىردان بەرى بايگەگە قاتىسۋدا. بىلتىر ماشينا ولجالاپ ەدىك, بۇگىن 1 ميلليون تەڭگە ۇتىپ الدىق, – دەيدى 12 جاسار شاباندوز نۇربولات سەمەتاي.
بايگەنى كورۋگە كەلگەن جانارگۇل ءبىلاي كەمەڭگەر اۋىلىنداعى اگرارلى-تەحنيكالىق كوللەدجدە تەحنيك-پروگرامميست ماماندىعىندا ءبىلىم الۋدا.
–كوللەدجدە اشىلعان «الامان» كلۋبىن ستۋدەنتتەر عانا ەمەس, اۋىل جاستارى مەن وقۋشىلاردى اتقا مىنۋگە جانە جىلقى باپتاۋعا ۇيرەتۋدە. ءوزىم 8 جاسىمنان اتقا ءمىنىپ ۇيرەندىم, – دەيدى جانارگۇل.
بايگەدەن سوڭ, جاپپاي كوكپار باستالدى. ءبىزدىڭ وبلىستا كوكپارشى جىگىتتەرىمىز نەگىزىنەن ەكىباستۇزدىڭ اقكول اۋىلىندا, باياناۋىلدا, ماي اۋدانىندا, اقسۋدا تۇرادى.
وبلىس اكىمى بولات باقاۋوۆ تا دوداعا قاتىسىپ, سپورتشىلارمەن كۇش سىناسىپ كوردى.
جاپپاي كوكپار ويىنىندا يسلام رات وسىمەن ەكىنشى مارتە جۇلدەگەر اتاندى. اتتىڭ يەسى باقتيار بايزاقوۆ اۆتوكولىك يەلەندى.
–ارينە, تارتىس كەزىندە بىردە اقىڭ كەتەدى, بىردە ەسەلەنە قايتادى. كوكپار دەگەن سونىسىمەن قىزىق. قيقۋى دا عاجاپ. قىزعان دوداعا اتتى قوسىپ كەپ جىبەرىپ, كوكپارعا قول تيگەندە جانىڭ راحات تابادى. سالىم سالعان سوڭ كوڭىل دە جادىرايدى, – دەيدى يسلام.
كوكپارشىلاردىڭ ءبارى دە بالا كەزدەن كوكپارعا تاي, جاباعى, قۇناندارمەن بارعاندارىن ايتادى. بىردەن ۇلكەن كوكپارعا ارالاسۋ مۇمكىن ەمەس.
–سوڭعى كەزدەرى جاپپاي كوكپار مەن كوماندالىق كوكپاردىڭ ايىرماشىلىقتارى دا ايتىلۋدا. كوكپار سپورت ەمەس. ءمان-مازمۇنى باسقا. اتا-بابادان قالعان مۇرا. ۇلتتىق ويىنىمىز. كەڭ دالانىڭ كوكپارى مەن تەاترلاندىرىلعان كورىنىستى كوماندالىق كوكپاردىڭ ايىرماسى جەر مەن كوكتەي, – دەيدى كوكپارشىلار ءوزارا وي ءبولىسىپ.
ال وبلىستىق تۋريزم جانە سپورتتى دامىتۋ باسقارماسىنىڭ مالىمەتىنشە, ات سپورتى تۇرلەرى بويىنشا تۋرنيرگە 3 «Lada» اۆتوكولىگى, موتوتسيكل, سونداي-اق اقشالاي جۇلدە تىگىلگەن. ەندى الداعى جەلتوقسان ايىندا وڭىرىمىزدە العاش رەت وبلىستىق قۇسبەگىلەر سايىسى وتەدى.