قازىرگى ۋاقىتتا ونكولوگيالىق اۋرۋلارمەن ديسپانسەرلىك ەسەپتە 180 مىڭنان استام قازاقستاندىق تۇر. جىل سايىن ەلىمىزدە قاتەرلى ىسىكتەردىڭ 35 مىڭعا جۋىق جاڭا جاعدايى تىركەلەدى, 14 مىڭنان استام ادام جىل سايىن ونكولوگيالىق اۋرۋلاردان قايتىس بولادى. تۇڭعىش پرەزيدەنت – ەلباسى نۇرسۇلتان نازارباەۆتىڭ 2018 جىلعى 5 قازانداعى قازاقستان حالقىنا جولداۋىندا جۇكتەگەن تاپسىرماسى ەل ۇكىمەتى قولدانىستاعى ۇلتتىق ونكولوگيا جانە ترانسپلانتولوگيا عىلىمي ورتالىعى بازاسىندا ۇلتتىق عىلىمي ونكولوگيا ورتالىعىن قۇرۋ تۋرالى شەشىم قابىلدادى.
عىلىمي ورتالىقتىڭ زاماناۋي عيماراتىن سالۋ ستراتەگيالىق ارىپتەستەردى تارتا وتىرىپ جانە حالىقارالىق ستاندارتتارعا سايكەس جۇزەگە اسىرىلادى.
ۇعوو قاتەرلى ىسىكتەردى دياگنوستيكالاۋ مەن ەمدەۋدىڭ بارلىق بىرەگەي الەمدىك تەحنولوگيالارى شوعىرلاناتىن ەلدىڭ ونكولوگيالىق قىزمەتىن دامىتۋدى ۇيلەستىرۋ جانە باقىلاۋ ورتالىعىنا اينالۋى ءتيىس.
ورتالىق قىزمەتىنىڭ ماڭىزدى باعىتتارى:
–ۇعوو-نىڭ زياتكەرلىك الەۋەتىن ساقتاۋ, نىعايتۋ جانە دامىتۋ, ونىڭ ىشىندە پروفيلاكتيكانىڭ, دياگنوستيكانىڭ, ەمدەۋدىڭ, وڭالتۋدىڭ, پاللياتيۆتىك كومەكتىڭ جانە ولاردى وڭىرلەرگە تاسىمالداۋدىڭ دەربەستەندىرىلگەن ادىستەرىن ازىرلەۋ بويىنشا;
- جاڭا يننوۆاتسيالىق تەحنولوگيالاردى تاجىريبەگە ەنگىزۋ ءۇشىن مەديتسينالىق جانە مەديتسينالىق ەمەس بەيىندەگى ونكولوگيالىق قىزمەت ماماندارىن دايارلاۋ.
بۇگىندە العا قويىلعان مىندەتتەردى ىسكە اسىرۋ ءۇشىن مىنالار جۇزەگە اسىرىلدى.اعىمداعى ەمدەۋ قىزمەتىن ساقتاۋ قاجەتتىلىگىن ەسكەرە وتىرىپ, جاڭا ونكولوگيا ورتالىعى قۇرىلىسىنىڭ جوباسى ەكى كەزەككە بولىنگەن: 2021 جىلعا دەيىن جاڭا ەمدەۋ-دياگنوستيكالىق كورپۋسىن سالۋ جانە 2022 جىلدىڭ سوڭىنا قاراي جۇمىس ىستەپ تۇرعان كلينيكا عيماراتىن قايتا جاڭارتۋ.
ۇعوو قۇرىلىسىنا ۇزدىك جوبالاۋ, قۇرىلىس جانە ينجينيرينگتىك كومپانيالار تارتىلدى.كونكۋرستىق ىرىكتەۋ ناتيجەلەرى بويىنشا جوبالاۋ-سمەتالىق قۇجاتتامانى ازىرلەۋدى قازاقستاندا دا, شەتەلدە دە الەۋمەتتىك جانە ونەركاسىپتىك وبەكتىلەردى جوبالاۋدا ۇلكەن تاجىريبەسى بار شۆەيتساريالىق IT Engineering S.A. كومپانياسى جۇزەگە اسىرادى.
جوبالاۋدىڭ جوسپارلانعان ءتورت كەزەڭىنەن بۇگىندە العاشقى ەكى كەزەڭى اياقتالدى جانە مەملەكەتتىك ساراپتامانىڭ وڭ قورىتىندىسى الىندى.
ۇكىمەت باسشىسى ا.مامين مەملەكەت باسشىسى ق.توقاەۆتىڭ كەلىسىمى بويىنشا ۇكىمەت قاۋلىسىمەن جاڭا ونكولوگيالىق ورتالىقتىڭ قۇرىلىسىن سالۋ جانە ينجينيرينگتىك سۇيەمەلدەۋ جونىندەگى كومپانيالار بەلگىلەندى.
باس مەردىگەر بولىپ «B&A سontractors SA» حالىقارالىق كومپانياسى انىقتالدى. ونىڭ بىرقاتار جوبالارى ەلىمىزدە جۇزەگە اسىرىلعان, ولاردىڭ ىشىندە رەسپۋبليكالىق دياگنوستيكالىق ورتالىق, انا مەن بالا ۇلتتىق عىلىمي ورتالىعى, ۇلتتىق عىلىمي كارديوحيرۋرگيالىق ورتالىق, رەسپۋبليكالىق ۆەلوترەك, «استانا وپەرا» وپەرا جانە بالەت تەاترى, نۇر-سۇلتان قالاسىنداعى اۋەجايدىڭ حالىقارالىق تەرمينالى بار.
ينجينيرينگتىك سۇيەمەلدەۋدى Deloitte TCF كومپانياسى جۇزەگە اسىرادى. بۇل حالىقارالىق بيزنەس سالاسىنداعى ترانسۇلتتىق اۋقىمداعى ءتورت ءىرى بەدەلدى كومپانيالاردىڭ ءبىرى جانە ولاردىڭ قىزمەتى ءمىنسىز ىسكەرلىك بەدەلگە نەگىزدەلگەن.
Deloitte TCF ەسەبىندە اقش-تا, نيدەرلاندىدا, اۆستراليادا جانە باسقا دا ەلدەردە مەديتسينالىق نىساندار قۇرىلىسىن سۇيەمەلدەۋ جانە مەديتسينالىق تەحنيكانى جەتكىزۋ بار.
Deloitte TCF-تىڭ ەلىمىزدىڭ الەۋمەتتىك سالاسىنداعى جوبانى ينجينيرينگتىك باسقارۋداعى العاشقى جاعدايى زاڭدىلىقتىڭ ساقتالۋىنا جانە بارلىق حالىقارالىق ستاندارتتارعا سايكەستىگىنە كەپىلدىك بەرەتىنىنە كۇمان جوق.
ۇعوو-نىڭ ستراتەگيالىق سەرىكتەستەرى جەتەكشى مەديتسينالىق جانە عىلىمي ورتالىقتار – University College London ۋنيۆەرسيتەتتىك كلينيكاسى, وڭتۇستىك كورەيانىڭ ۇلتتىق ونكولوگيالىق ورتالىعى, س.بەرەزين اتىنداعى مەديتسينالىق ينستيتۋتى (سانكت-پەتەربۋرگ, رەسەي).
جاپونيانىڭ ۇلتتىق ونكولوگيالىق ورتالىعىن, ەۋروپالىق ونكولوگيا ينستيتۋتىن (يتاليا), MD Anderson (اقش) ونكولوگيالىق ورتالىعىن, گەرمانيا, اۆستريا, يزرايل ۋنيۆەرسيتەتتىك كلينيكالارىن ستراتەگيالىق سەرىكتەستىككە تارتۋ تۋرالى كەلىسسوزدەر جۇرگىزىلۋدە. دۇنيەجۇزىلىك دەنساۋلىق ساقتاۋ ۇيىمىمەن, اتوم ەنەرگياسى جونىندەگى حالىقارالىق اگەنتتىكپەن (ماگاتە), وبىردى باقىلاۋ جونىندەگى حالىقارالىق وداقپەن (UICC), وبىردى زەرتتەۋ جونىندەگى حالىقارالىق اگەنتتىكپەن (وزحا), ەۋروپالىق ونكولوگتار قاۋىمداستىعىمەن (ESMO) ىنتىماقتاستىق ماسەلەلەرى پىسىقتالۋدا.
ەلباسى ن.نازارباەۆتىڭ تاپسىرماسىنا سايكەس ۇعوو پروتوندىق, ساۋلەلىك جانە لازەرلىك تەراپيا, سونداي-اق يادرولىق مەديتسينا تەحنولوگيالارىمەن بىرگە ونكولوگيالىق اۋرۋلاردى دياگنوستيكالاۋ مەن ەمدەۋگە ارنالعان ەڭ وزىق جابدىقتارمەن جابدىقتاۋ كوزدەلەدى.
بۇل رەتتە ءبىز مىناداي قاعيدانى باسشىلىققا الامىز: «بىزگە جابدىقتى جەتكىزۋشى – وندىرۋشىلەر قاجەت ەمەس, بىزگە – ستراتەگيالىق سەرىكتەستەر – جابدىقتاردىڭ ۇزدىكسىز جۇمىس ىستەۋىن جانە مامانداردى وقىتۋدى قامتاماسىز ەتەتىن, بىرلەسكەن عىلىمي ىزدەنىستەر جۇرگىزەتىن, سالانى ينتەللەكتۋالدى جانە كادرلىق سۇيەمەلدەۋدى جۇزەگە اسىراتىن, ۇعوو-ىنا دا, وڭىرلەرگە دە جاڭا تەحنولوگيالاردى ترانسفەرتتەۋگە ىقپال ەتەتىن مەديتسينالىق جابدىقتى وندىرۋشىلەر قاجەت».
ونكولوگيالىق اۋرۋلاردى دياگنوستيكالاۋ مەن ەمدەۋگە ارنالعان مەديتسينالىق جابدىقتار مەن باعدارلامالىق قامتاماسىز ەتۋ وندىرىسىندەگى الەمدىك كوشباسشىلار – Varian Medical Systems International AG, Ion Beam Applications (IBA), Philips جانە باسقا دا كومپانيالار جاڭا ورتالىقپەن وسىنداي ىنتىماقتاستىققا دايىن ەكەندىگىن مالىمدەدى. جابدىق تىكەلەي وندىرۋشىلەردەن ساتىپ الىنادى دەپ بولجانۋدا.
ساتىپ الىناتىن جابدىقتاردىڭ تىزبەسى ونى ساتىپ الۋدىڭ نەگىزدىلىگىنە جانە پايدالانۋدىڭ تيىمدىلىگىنە تاۋەلسىز ساراپتامالىق باعالاۋدان وتەدى. بۇعان جەتەكشى تاۋەلسىز قازاقستاندىق جانە شەتەلدىك ساراپشىلار, ستراتەگيالىق سەرىكتەستەر, سونداي-اق Deloitte TCF كومپانياسى تارتىلادى.
بارلىق بەلگىلەنگەن مىندەتتەردى تابىستى ىسكە اسىرۋ ءۇشىن ءتيىستى كادرلىق قامتاماسىز ەتۋ قاجەت.وسىعان بايلانىستى, اعىمداعى جىلدىڭ كۇزىنەن باستاپ دۇنيەجۇزىلىك بانكتىڭ قارجىلىق قولداۋىمەن جاپونيا, وڭتۇستىك كورەيا مەن گەرمانيانىڭ جەتەكشى ونكولوگيالىق ورتالىقتارىندا ۇعوو ءۇشىن ماماندار دايارلاۋ باستالادى, ۇعوو ستراتەگيالىق سەرىكتەستەرى جۇزەگە اسىراتىن تەگىن وقۋعا جىبەرۋ ءۇشىن 35 ماماندى كونكۋرستىق ىرىكتەۋ جۇرگىزىلەدى.
ءبىلىم جانە عىلىم مينيسترلىگىمەن شەتەلدىك كلينيكالاردا تاعىلىمدامادان ءوتۋ جانە مامانداردى «بولاشاق» باعدارلاماسى شەڭبەرىندە شەتەلدىڭ جوعارى وقۋ ورىندارىنا ماگيستراتۋراعا وقۋعا جىبەرۋ مۇمكىندىگى زەرتتەلۋدە.
كلينيكالىق مامانداردى دايىنداۋمەن قاتار ەلگە قاجەتتى مەديتسينالىق فيزيكتەر, حيميكتەر, تەحنيك-دوزيمەتريستەر, رادياتسيالىق قاۋىپسىزدىك جونىندەگى ينجەنەرلەر جانە يادرولىق مەديتسينا, پروتوندىق جانە ساۋلەلىك تەراپيا ءۇشىن باسقا دا ماماندار دايارلاۋ جوسپارلانۋدا.
جالپى, 250 ماماندى وقىتۋ جوسپارلانۋدا.وسىلايشا, عىلىمي زەرتتەۋلەر جۇرگىزۋ تاجىريبەسى بار بىلىكتى زەرتتەۋشىلەر مەن كلينيتسيستەر توبى, سونداي-اق تەحنيكالىق بەيىندەگى جوعارى مامانداندىرىلعان ماماندار دايارلانادى.
بۇل ۇلتتىق ونكولوگيالىق قىزمەتتى زاماناۋي ۇردىستەرگە سايكەس جاڭعىرتۋعا جانە جاقىن بولاشاقتا ءوز ونكولوگيالىق مەكتەبىن قۇرۋعا مۇمكىندىك بەرەدى.
پەرسونالدى دايىنداۋمەن قاتار ونكولوگيا سالاسىندا عىلىمي زەرتتەۋلەر جۇرگىزۋ ءۇشىن قاجەتتى جاعدايلار جاسالاتىن بولادى. ۇعوو-ىندا زەرتتەۋ ورتالىعىن قۇرۋ جوسپارلانۋدا. ونىڭ زەرتحانالارىندا گەنومدىق جانە پروتەومدىق زەرتتەۋلەر, اعىندى تسيتومەتريا, ميكروسكوپيا, تىندىك ينجەنەريا, بيواقپاراتتىق تالداۋ جۇرگىزىلەتىن بولادى.
ۇعوو الدىندا 2021 جىلعا دەيىن ورتالىقتىڭ اعىمداعى كوپ بەيىندى مەديتسينالىق قىزمەتىن حالىقارالىق ستاندارتتارعا سايكەس ونكولوگيالىق كومەك كورسەتۋ جونىندەگى قىزمەتكە تولىق قايتا بەيىندەۋ كۇردەلى مىندەتى تۇر.
بۇل رەتتە قاتەرلى ىسىكتەرى بار پاتسيەنتتەردى ەمدەۋدىڭ اجىراماس بولىگى بولىپ تابىلاتىن وڭالتۋعا ۇلكەن نازار اۋدارىلاتىن بولادى. قىزمەتى تىرشىلىكتى قامتاماسىز ەتۋ داعدىلارىن, ەڭبەككە قابىلەتتىلىگىن قالپىنا كەلتىرۋگە جانە ءومىر ءسۇرۋ ساپاسىن جاقسارتۋعا باعىتتالاتىن ونكولوگيالىق وڭالتۋدىڭ ارنايى بولىمشەلەرىن قۇرۋ كەرەك.
پوپۋلياتسيالىق جانە جەكە دەڭگەيدە ونكولوگيالىق اۋرۋلاردىڭ الدىن الۋ جانە ەرتە دياگنوستيكالاۋ جونىندەگى جۇمىستى ۇيىمداستىرۋ ءۇشىن ۇعوو قۇرىلىمىندا وبىر اۋرۋلارىن باقىلاۋ جونىندەگى ورتالىق قۇرىلادى. بۇل ورتالىق وبىردىڭ الدىن الۋدىڭ, ەسكەرتۋدىڭ جانە ەرتە دياگنوستيكالاۋدىڭ زاماناۋي جانە ءتيىمدى تەحنولوگيالارىن ازىرلەيدى جانە ەنگىزەدى.
پايدالانۋعا ەنگىزىلگەننەن كەيىن ۇعوو-ندا جىل سايىن 6 مىڭنان استام پاتسيەنت ستاتسيونارلىق ەمنەن وتەدى, كونسۋلتاتسيالىق – دياگنوستيكالىق كومەكپەن شامامەن 30 مىڭ پاتسيەنتتى قامتۋ جوسپارلانۋدا, ونىڭ ىشىندە 10 مىڭعا جۋىق پوزيتروندىق-ەميسسيالىق توموگرافيامەن (پەت), ساۋلەلىك جانە لازەرلىك تەراپيانى پايدالانا وتىرىپ ەمدەۋ-شامامەن 4 مىڭ پاتسيەنت, ال 2 ەمشارا بولمەسى جۇمىس ىستەگەن كەزدە پروتون ورتالىعىنىڭ وتكىزۋ قابىلەتى جىلىنا 700-800 پاتسيەنتتى قۇراۋى مۇمكىن.
قىزمەتكەرلەردى ىنتالاندىرۋ مەن موتيۆاتسيالاۋعا باعىتتالعان الەۋمەتتىك قۇرامداس بولىگى دە ماڭىزدى.سونىمەن, دەنساۋلىق ساقتاۋ مينيسترلىگىنىڭ قولداۋحاتى بويىنشا نۇر-سۇلتان اكىمشىلىگى ۇعوو-مەن ءبىر كۆارتالدا ءمجا تەتىكتەرىن قولدانا وتىرىپ, كوپ پاتەرلى تۇرعىن ءۇي سالۋعا ۇعوو-نىڭ بولاشاق ماماندارىن تۇرعىن ۇيمەن قامتاماسىز ەتۋ ءۇشىن جەر ۋچاسكەسىن ءبولدى.
بارلىق بەلگىلەنگەن مىندەتتەر مەن العاشقى ناتيجەلەردى نۇر-وتان پارتياسى الاڭىندا قوعامدىق تىڭداۋعا شىعارۋدى جوسپارلاپ وتىرمىز. ۇعوو الدىندا ىسكە اسىرۋدىڭ قىسقا مەرزىمدەرىنە قاراماستان جوعارى, ءور ماقساتتار تۇر.كۇردەلى جانە كوپ جوسپارلى مىندەتتەر ورىندالۋى ءتيىس. ەندى بارلىق جوسپارلاردى پراكتيكالىق ارەكەت تىلىنە اۋدارۋ قاجەت. بۇل مۇددەلى مەملەكەتتىك ورگانداردىڭ كەلىسىلگەن ءىس-قيمىلدارىنا, جىگەرلى ەڭبەگى مەن تاڭداعان ىسىنە مامانداردىڭ ادال قىزمەت ەتۋىنە تىكەلەي بايلانىستى.
بارلىعى «وبىر» دەگەن قورقىنىشتى دياگنوزدى ءولىم جازاسى دەپ ساناماۋعا باعىتتالادى. ورتالىقتى قۇرۋ ارقىلى قازاقستاندىق پاتسيەنتتەر ءوز وتانىندا, جاقىندارىنىڭ قاسىندا ۇزدىك حالىقارالىق تاجىريبەگە سايكەس ەڭ جوعارى تەحنولوگيالىق مامانداندىرىلعان ەم الا الادى. اۋرۋدى ەرتە انىقتاۋ پاتسيەنتتەردىڭ باسىم بولىگىن تولىق ەمدەۋگە مۇمكىندىك بەرەدى.
ولار ءۇشىن جاسالعان ۇزاق جانە تولىققاندى ءومىر ءسۇرۋ مۇمكىندىگى – ەڭ باتىل جانە كۇردەلى جوسپارلاردى جۇزەگە اسىراتىن بارلىق ادامدارعا باستى ماراپات ەكەنى انىق.
جاندوس بۇركىتباەۆ
ۇلتتىق عىلىمي ونكولوگيا ورتالىعىنىڭ باسقارما توراعاسى