«قاۋىپسىز كاسىپورىن – ساۋ جۇمىسشى» تاقىرىبىندا ەلوردانىڭ باستاۋىش كاسىپوداق ۇيىمدارىنىڭ فورۋمى ءوتتى. شارانى نۇر-سۇلتان قالاسى كاسىپوداقتار ورتالىعى ۇيىمداستىردى.
فورۋم جۇمىسىنا قازاقستان كاسىپوداقتار فەدەراتسياسىنىڭ باسشىلارى, الەۋمەتتىك سەرىكتەستەر, باستاۋىش كاسىپوداق ۇيىمدارىنىڭ مۇشەلەرى, حالىقارالىق ۇيىمداردىڭ, ورتالىق مەملەكەتتىك ورگانداردىڭ جانە كوممەرتسيالىق ەمەس ۇيىمداردىڭ وكىلدەرى, سونداي-اق ەڭبەكتى قورعاۋ سالاسىنداعى ساراپشىلار مەن عالىمدار قاتىستى. ماقسات – وندىرىستىك جاراقاتتار, كاسىپتىك اۋرۋلار, وندىرىستەگى قايعىلى وقيعالار جانە ەڭبەك قاۋىپسىزدىگى جاعدايلارىن جاقسارتۋ, سونداي-اق جۇمىس ىستەيتىن حالىقتىڭ دەنساۋلىعىن ساقتاۋ جانە قولداۋ.
جيىندى اشقان كاسىپوداقتار فەدەراتسياسىنىڭ توراعاسى ەرالى توعجانوۆ باستاۋىش كاسىپوداق ۇيىمدارىنىڭ قىزمەتى كاسىپوداقتار فەدەراتسياسىنىڭ ەرەكشە نازارىندا ەكەنىن اتاپ ءوتتى. ءوز سوزىندە ەلىمىزدىڭ كاسىپوداقتار باسشىسى وندىرىستىك جاراقات ماسەلەسىنە توقتالدى. كاسىپوداقتار قابىلداعان شارالاردىڭ ناتيجەسىندە كاسىپتىك جاراقات الۋ ديناميكاسى تومەندەگەنى ايتىلدى.
بۇل كۇن كاسىپوداقتار قوزعالىسى ءۇشىن وتە ماڭىزدى. بيىل العاش رەت كاسىپوداقتار فەدەراتسياسىنىڭ باستاماسىمەن, ۇكىمەتتىڭ شەشىمىمەن 10 قازان – قازاقستان رەسپۋبليكاسىنداعى مەرەكەلىك كۇندەر تىزىمىنە ەنگىزىلدى. بۇل كاسىپوداقتاردىڭ جانە ولاردىڭ بىرلەستىكتەرىنىڭ ءرولى مەن ماڭىزدىلىعىن ايقىندايدى. ەلىمىزدەگى كاسىپوداقتار قوزعالىسىن دامىتۋعا جاڭا سەرپىن بەردى. سونىمەن قاتار قىركۇيەكتىڭ سوڭعى جەكسەنبىسىندە – ەڭبەك كۇنى اتالىپ ءوتتى. بۇل – ءار ەڭبەككەردىڭ, ءار كاسىپوداق مۇشەسىنىڭ مەيرامى. پرەزيدەنت قاسىم-جومارت توقاەۆ بارلىق ەڭبەككەرلەردىڭ ءرولىنىڭ ماڭىزدىلىعىن, ەڭبەك ادامىنىڭ كۇش-جىگەرىنىڭ ارقاسىندا قازاقستاننىڭ قارقىندى دامىپ كەلە جاتقانىن اتاپ ءوتتى. ەلباسى نۇرسۇلتان ءابىش ۇلى نازارباەۆ قازاقستاندىق كاسىپوداقتار – تۇراقتىلىق تىرەگى, الەۋمەتتىك-ەڭبەك قاتىناستارىنىڭ بازالىق ەلەمەنتى بولىپ تابىلاتىندىعىن ارقاشان اتاپ وتىرادى. كاسىپوداقتار ارقاشان ازاماتتىق قوعامنىڭ نەگىزگى تىرەكتەرىنىڭ ءبىرى بولىپ قالا بەرەدى», دەدى ول.
شاراعا قاتىسۋشىلار زياندى ەڭبەك جاعدايلارى بار جۇمىس ورىندارىن قىسقارتۋ ماسەلەلەرى كاسىپوداقتار ءۇشىن وزەكتى بولىپ قالاتىنىن العا تارتتى. ستاتيستيكاعا سايكەس, 1,6 ميلليون جۇمىسشىنىڭ 373 مىڭى نەمەسە ءاربىر ءتورتىنشىسى (22,3%) زياندى جانە قاۋىپتى ەڭبەك جاعدايلارىندا جۇمىس ىستەيدى. شامامەن ءاربىر ەكىنشى جۇمىسشى (45,4%) شۋ مەن ءدىرىلدىڭ جوعارىلاۋى جاعدايىندا جۇمىس ىستەيدى, ال 34,4%-نىڭ جۇمىس ايماعىندا گازدىڭ لاستانۋى مەن شاڭنىڭ اسەرى مول.
وسى پروبلەمالاردى ەسكەرە وتىرىپ, كاسىپوداقتار فەدەراتسياسى ۇكىمەتكە ەڭبەكتى قورعاۋدى باسقارۋ جۇيەسىن ەنگىزۋ بولىگىندە زاڭنامانى جەتىلدىرۋ بويىنشا ۇسىنىستارمەن جۇگىنىپ, الەۋمەتتىك باعىتتاعى جۇمىس بەرۋشىلەرگە عيماراتتار مەن قۇرىلىستاردىڭ تەحنيكالىق جاعدايىن جاڭارتۋعا جانە جۇمىس ۇيىمداستىرۋداعى كەمشىلىكتەردى جويۋعا بايلانىستى شىعىندار ءۇشىن سالىقتىق جەڭىلدىكتەر بەرۋ ءتارىزدى ۇسىنىستار ايتىپ وتىر. قاۋىپسىزدىك جانە ەڭبەكتى قورعاۋ ماسەلەلەرى بويىنشا اكىمشىلىك جانە قىلمىستىق جاۋاپكەرشىلىك شارالارىن كۇشەيتۋ, وندىرىستەگى جازاتايىم وقيعالار مەن كاسىپتىك اۋرۋلاردى ەسەپكە الۋ مەن باقىلاۋدىڭ بىرىڭعاي اقپاراتتىق جۇيەسىن قۇرۋ سياقتى ۇسىنىستار بار.