جەمقورلىققا جىعىلما, سىبايلاستىققا سۇرىنبە

ەندى قىزىلوردا وبلىسىنداعى جاعدايدى تارقاتىپ كورەلىك. جۋىردا وبلىستىق ىشكى ساياسات باسقارماسىندا سىبايلاس جەمقورلىققا قارسى كۇ­رەس تا­قىرىبىندا وتكەن سەميناردا سىبايلاس جەمقورلىققا قارسى ءىس-قيمىل اگەنتتىگى وبلىس بويىنشا دەپارتامەنتىنىڭ پرە­ۆەن­تسيا باسقارماسىنىڭ باسشىسى عاليا الىمقۇلوۆا تىڭ دەرەكتەر ۇسىندى. ول: – بيىلعى جىلدىڭ 8 ايىن­دا سىبايلاس جەمقورلىقتىڭ ال­دىن الۋ ماقساتىندا 3750 شارا ۇيىم­داستىرىلدى. بۇگىندە «اشىق بيۋد­جەتتىڭ ينتەراكتيۆتى تاقتاسى», «ادال ۇرپاق», «ادال جول» جانە باسقا دا جەمقورلىقتى بولدىرماۋعا ارنالعان بىرنەشە جوبا جۇزەگە اسۋ ۇستىندە. ال «اقمەشىت – ادالدىق الاڭى» جوبالىق كەڭسە­سىنىڭ جۇمىس اۋقىمى جوعارى, – دەيدى.

ەسەپتى مەرزىمدە ايماقتا 93 سى­باي­لاس جەمقورلىق سيپاتىندا قىل­مىس انىقتالعان. ونىڭ ىشىندە 48-ءى پاراقورلىق, 6-ۋى جۇيەلى تۇردەگى جەم­قورلىق, 8-ءى كىشى جانە ورتا كاسىپكەرلىككە زاڭسىز ارالاسۋ, 17-ءسى مەملەكەتتىك باعدار­لامالاردى ىسكە اسىرۋ بارىسىندا ورىن العان. ەڭ سوراقىسى, ەلىمىزدە جىل سايىن ورتا ەسەپپەن ەكى مىڭنان استام سىبايلاس جەمقورلىققا قاتىستى قىلمىستىق ءىس تىركەلىپ, 1000-نان استام ادام جاۋاپقا تارتىلادى ەكەن. بۇل ءوز كەزەگىندە مەملەكەتتىك قىزمەتكە دە كەدەرگىسىن كەلتىرىپ وتىر. ويتكەنى مەملەكەت قارجىسىن جىمقىرۋدا زاڭسىز ارەكەتكە باراتىندار لاۋازىم يەلەرى ەكەنى بەسەنەدەن بەلگىلى.

وسىعان وراي باسقارما باسشىسى جەمقورلىققا قارسى ءىس-قيمىل جوس­پارىنىڭ نەگىزگى جەتى باعىتىن اتاپ, قىل­مىستىڭ جولىن كەسۋ امالدارىنا توقتالدى. ماسەلەن, بيۋدجەت سايا­ساتىنىڭ اشىقتىعى تۇيتكىل ساۋال­دىڭ ءتۇيىنى بولسا, «Open Space» جوباسى بيلىك پەن حالىق اراسىن جاقىنداتا ءتۇس­تى. قىسقاسى, اقشا اينالاسىنداعى ارپا­لىستا شالىس قادامنىڭ دا شەگى بولادى.

قانىبەك ءابدۋوۆ,

قىزىلوردا