28 قىركۇيەك پەن 6 قازان ارالىعىندا نۇر-سۇلتان قالاسىندا ۆولەيبولدان ەرلەر اراسىنداعى قازاقستان رەسپۋبليكاسى 27-ءشى كۋبوگى ءوتتى, دەپ حابارلايدى اتىراۋ وبلىسىنىڭ وڭىرلىك كوممۋنيكاتسيالار قىزمەتى.
«اتىراۋ» كلۋبى تارتىستى ويىندا ەكىنشى ورىن يەلەندى. ۆولەيبولشىلارىمىز جارىستىڭ شيرەك فينالىندا پەتروپاۆلدىق «ەسىل سك» كومانداسىن 3:0 ەسەبىمەن جەڭىپ, جارتىلاي فينالدا ءدال سول ەسەپپەن «ۇشقىن-كوكشەتاۋ» كومانداسىن تىزە بۇكتىردى. فينالدىق ماتچتا اتىراۋلىقتار الماتى قالاسىنىڭ «بۋرەۆەستنيك» كومانداسىنان 3:0 ەسەبىمەن ۇتىلدى. ال ماڭعىستاۋ وبلىسىنىڭ «ماڭعىستاۋ» كومانداسى ۇزدىك ۇشتىكتى قورىتىندىلادى.
- قازىرگى تاڭدا ءبىزدىڭ كوماندا الدا وتەتىن «سۋپەركۋبوك» ويىنىنا قىزۋ دايىندالۋدا. وسى ويىندا قازاقستان كۋبوگىندا كورسەتكەن ناتيجەدەن اسىپ تۇسۋگە نيەتتىمىز, - دەيدى «اتىراۋ ۆولەيبول كلۋبىنىڭ» ديرەكتورى اماندىق عاريفوللا.
ايتا كەتەيىك, 17-21 قازان ارالىعىندا تالدىقورعان قالاسىندا «سۋپەركۋبوك» ويىنى وتەدى. ويىندا قازاقستان كۋبوگىندا ۇزدىك تورتتىك قاتارىنان كورىنگەن «بۋرەۆەستنيك», «اتىراۋ», «ماڭعىستاۋ», «ۇشقىن-كوكشەتاۋ» كوماندالارى ءوزارا باسەكەگە تۇسەتىن بولادى. «سۋپەركۋبوك» يەلەنگەن كوماندا 2020 جىلدىڭ ءساۋىر ايىندا وتەتىن ۆولەيبولدان كلۋبتىق ازيا چەمپيوناتىندا قازاقستاننىڭ نامىسىن قورعايدى.