ماقسات شاكىباەۆ قارابالىق اۋدانىنداعى ميحايلوۆ ورمان شارۋاشىلىعىنا قاراستى قايىڭ توعايىنىڭ ىرگەسىندەگى جولمەن كەلە جاتىپ, اعاش اراسىنان شىعا كەلگەن قوس ەلىكتى كوزى شالدى.
ورماندا قازىر ەلىك كوپ, تەك ءوزىنىڭ قاراۋىنداعى شارۋاشىلىق اۋماعىندا عانا ولاردىڭ سانى مىڭنان اسادى. ال اۋدان كولەمىندە ودان دا كوپ. قوس ەلىك ءاپ دەگەننەن ماقساتتىڭ نازارىن ەرەكشە اۋداردى. ەلىكتىڭ 5-6 ايلىق قوس لاعىنىڭ ءبىرى سۇر دا, ءبىرى اعالا. ماقسات قالتاسىنان ۇيالى تەلەفونىن الا سالىپ, ولاردى سۋرەتكە تۇسىرە باستادى. كۇزگى دالا تۇنەرىپ, جاڭبىر سىركىرەپ تۇرعاندىقتان تەلەفون فوتواپپاراتى دا ەلىكتەردى انىق تارتا المادى. دەگەنمەن ول ەلىكتەر ورمانعا قايتا كىرىپ, كوزدەن عايىپ بولعانشا ون شاقتى رەت باسىپ ۇلگەردى.
– ەلىكتەر جىل مەزگىلدەرىنە قاراي ءتۇسىن وزگەرتەدى. مىسالى, جازدا تەكەلەرى كۇرەڭ سارى, ەشكىلەرى جيرەن سارى بولادى. ال قىسقا قاراي ولاردىڭ ءتۇسى سۇرعا اۋىسادى. ولاردىڭ ءتۇسى قازىردەن وزگەرە باستايدى. مىنا كورگەن اعالا ەلىكتىڭ ارقاسى جانىنداعى سەرىگىنىڭ ءتۇسى سەكىلدى سۇر دا, باسى, جامباسى, قۇيىمشاق جاعى, اياقتارى اق. وسىدان بەس جىل بۇرىن ەلىكتىڭ اپپاق تەكەسىن كورىپ تاڭعالعانىم بار ەدى. ەلىكتەردىڭ اراسىندا دا البينوستارى كەزدەسەتىن شىعار؟ – دەيدى ماقسات.
ورمان شارۋاشىلىعى ماماندارىنىڭ سوزىنە قاراعاندا, وڭىردەگى ەلىكتەردىڭ ەڭ كوپ ءۇيىرى وسى ميحايلوۆ ورمان شارۋاشىلىعىندا, جالپى قارابالىق اۋدانىندا جۇرەدى. وتكەن قىستىڭ جۇمساقتىعىنا بايلانىستى ەلىكتەردىڭ سوڭىنا ەرگەن لاق كوپ. ەرەسەك ەشكىلەرى ەگىزدەن, ءتىپتى ۇشەۋدەن, تورتەۋدەن لاقتادى. ورمان شارۋاشىلىعىندا قىزمەتكە كەلگەنىنە ون شاقتى جىل بولعانىمەن, ماقسات بالا كەزىنەن ورمان-توعايلى ورنەك اۋىلىندا وسكەن. سوندىقتان ەلىكتى كۇندە كورىپ ءوستى دەسە دە سەنەسىڭ.
– ەلىكتەردىڭ ءتۇسىنىڭ بارلىعى بىردەي بولادى. بىراق بالا كەزىمنەن مۇنداي اپپاق نەمەسە الا ەلىك كورمەپپىن, مەن وسىنى قانداي وزگەرىس ەكەن دەپ تاڭعالىپ ءجۇرمىن, – دەيدى ول. ءبىز قوشتاساردا ماقساتتان قىزمەتىن سۇرادىق.
– ءبىزدى بۇرىنعىداي «ەگەر», ياعني «قورىقشى» دەمەيدى, «وحوتوۆەد» – «اڭتانۋشى» دەپ اتايتىن بولعان. ميحايلوۆ ورمان شارۋاشىلىعىنىڭ اڭتانۋشىسىمىن. وسىعان دا تاڭعالامىن, قازاقتىڭ جالپاق تىلىمەن «قورىقشى» دەسە دە وسى جۇمىسىمنىڭ ماعىناسى بۇزىلمايدى عوي؟ – دەيدى اڭتانۋشى.
– قىزمەتىڭنىڭ اتى دا كورگەن اعالا ەلىگىڭ سياقتى ەكەن عوي؟!, – دەيمىز ءبىز. ماقسات كۇلەدى, بىراق كۇلكىسىنىڭ مازاسى جوق.
قوستاناي وبلىسى,
قارابالىق اۋدانى