«جاڭا الماتى» باعدارلاماسى بويىنشا قالانىڭ شەتكى ايماقتارىن دامىتۋعا 800 ملرد تەڭگە قاجەت. بۇل تۋرالى الماتى اكىمى باقىتجان ساعىنتاەۆ الماتىدا وتكەن قارجى فورۋمىندا ايتتى.
«الماتى بيۋدجەتى 500 ملرد تەڭگەدەن اسادى. ونىڭ كوپ بولىگى اعىمداعى شىعىندارعا, قالالىق ينفراقۇرىلىم مەن الەۋمەتتىك باعدارلامالاردى قارجىلاندىرۋعا جۇمسالادى.100 ملرد تەڭگەدەن استام قارجى - بۇل جاڭا نىسانداردى قۇرۋ نەمەسە قولدانىستاعى نىسانداردى قايتا قۇرۋعا كەتەتىن بيۋدجەت. ءبىز «جاڭا الماتى» باعدارلاماسىن ازىرلەدىك. تەك وسى باعدارلامانى جۇزەگە اسىرۋ ءۇشىن 5 جىلعا 800 ملرد تەڭگەگە جۋىق قاراجات كەرەك. بۇل بيۋدجەتتىك جانە جەكە ينۆەستيتسيالار», - دەدى ساعىنتاەۆ.
اكىمنىڭ تۇسىندىرۋىنشە, ينۆەستيتسيا تارتۋ مەن بيزنەستىڭ بەلسەندى دامۋى وتە ماڭىزدى فاكتور.
«بۇل قالالىق باستامالاردى جۇزەگە اسىرۋ جانە الماتىلىقتاردىڭ ءال-اۋقاتىن ارتتىرۋ ءۇشىن سالىقتىڭ ءوسۋىن قامتاماسىز ەتەدى. ولار ءوز كەزەگىندە قور جيناپ, قالا ەكونوميكاسىنىڭ دامۋىنا ينۆەستيتسيا قۇيا الادى. ءبىز ءۇشىن استانا حالىقارالىق قارجى ورتالىعى سىندى قالىپتاسۋ كەزەڭىنەن وتكەن الاڭدى پايدالانۋ وتە ماڭىزدى. اسىرەسە ينۆەستيتسيالىق دامۋ قورىمەن ىنتىماقتاستىققا مۇددەلىمىز», - دەدى الماتى اكىمى. ەسكە سالايىق, بۇعان دەيىن ساعىنتاەۆ «جاڭا الماتى» باعدارلاماسى بويىنشا قالانىڭ قالاي داميتىنى جانە بۇل جوبانىڭ قالاي جۇزەگە اسىرىلاتىنى تۋرالى حابارلاعان بولاتىن.
وسىعان دەيىن مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا ەل دامۋىنىڭ 5 باسىم باعىتىن ايقىنداپ, مەملەكەت الدىندا تۇرعان ماڭىزدى مىندەتتەردى بەلگىلەپ بەردى.
اتاپ ايتقاندا, تالابىنا ساي ءتيىمدى مەملەكەت قالىپتاستىرۋعا, ازاماتتاردىڭ قۇقىقتارى مەن قاۋىپسىزدىگىن قامتاماسىز ەتۋگە, قارقىندى دامىعان جانە ينكليۋزيۆتى ەكونوميكا قۇرۋعا, الەۋمەتتىك جاڭعىرۋدىڭ جاڭا كەزەڭىن باستاۋعا جانە وڭىرلەردىڭ قۋاتتىلىعىن ارتتىرۋعا, ونىڭ ىشىندە «الماتى قالاسىنىڭ ەرەكشە مارتەبەسى تۋرالى» زاڭعا اسا كوڭىل ءبولىندى.
الماتى – ورتا ازياداعى ەڭ ءىرى وڭىرلىك ىسكەرلىك جانە قارجى ورتالىعى. ەل ەكونوميكاسىنىڭ ەڭ باستى قوزعاۋشى كۇشى بولىپ تابىلاتىن شاعىن جانە ورتا بيزنەس قالاسى. ەلىمىزدەگى حالىقارالىق قۇرىلىمدار مەن قارجى ينستيتۋتتارىنىڭ, ءىرى ءىT-كومپانيالاردىڭ, جوعارى وقۋ ورىندارىنىڭ باسىم بولىگى وسىندا ورنالاسقان.سول سەبەپتى «جاڭا الماتى» جوباسىنىڭ بۇل ماڭىزدى مىندەتتەردى اتقارۋدىعا ورنى ەرەكشە.
گۇلبارشىن ايتجانبايقىزى
الماتى