ۇلتتىق اكادەميالىق كىتاپحانادا قازاق ادەبيەتىندەگى دەتەكتيۆ جانرىنىڭ نەگىزىن قالاعان كورنەكتى جازۋشى كەمەل توقاەۆتى ەسكە الۋعا ارنالعان «ديدارى دۇنيەنىڭ – دەتەكتيۆتە» اتتى كەش ءوتتى.
ءىس-شاراعا مەملەكەت جانە قوعام قايراتكەرلەرى مەن زيالى قاۋىم وكىلدەرى قاتىستى. جيىن بارىسىندا ءسوز سويلەگەن فيلولوگيا عىلىمدارىنىڭ دوكتورى ءادىل احمەتوۆ: «كەمەل اعامىزدىڭ شىعارمالارى وتە جاقسى قابىلداندى. اگاتا كريستي مەن شەكسپيردەن كەيىن ەڭ كوپ وقىلاتىنداردىڭ قاتارىندا. بۇل جانردى بۇكىل الەم, اسىرەسە جاستار كوپ وقيدى», – دەدى. ال جازۋشى بايانعالي ءالىمجان ك.توقاەۆتىڭ كىتابىن كەزەككە تۇرىپ الاتىنىن ەسكە الىپ: «ساعات اشىمباەۆ اعامىز ءبىر كۇنى دەتەكتيۆ جانرى جونىندە ماقالا جازۋدى تاپسىردى. وقىرمانداردىڭ 60 پايىزىنان استامى كوركەم شىعارمالاردان گورى, دەتەكتيۆتىك جانرداعى شىعارمالاردى وقيتىن كورىنەدى. ءبىرىنشى كەزەكتە كەمەل توقاەۆتىڭ شىعارماسى تۇر ەكەن. ول كىسىنىڭ پوۆەستەرىن تالداپ, سالىستىرا وتىرىپ, كولەمدى ماقالا جازىپ شىقتىم», دەپ ويىن ورتاعا سالدى.
«كەمەل توقاەۆتىڭ كينوعا شىعاراتىن كەمەل بەينەسى بار. جازۋشىنىڭ بەينەسى ارقىلى, ءبىر تاماشا كينو تۇسىرۋگە بولادى. ماعان ءبىر وي كەلىپ وتىر. ءاربىر شىعارماشىلىق كەزدەسۋلەردە جۇرتتىڭ ىقىلاسى مەنىڭ جانىمدى تەبىرەنتەدى. ادامنىڭ قاسيەتى بولماسا, جازۋشى بولماس ەدى. ماعان كەمەل اعانىڭ «سوڭعى سوققى» رومانى ۇنادى. سىزىپ تۇرىپ, وتە قىزىعىپ وقىدىم. ءبىر قالىپتى, ۇستامدى جازىلعان شىعارما», دەپ جالپى قاۋىمعا ۇسىنىس ايتقان فيلولوگيا عىلىمدارىنىڭ دوكتورى تۇرسىن جۇرتباي اۆتوردىڭ الداعى بولار ءجۇز جىلدىعىن اتاپ ءوتتى.