«Qazaqstan» ۇلتتىق تەلەارناسى تۇسىرگەن دەتەكتيۆ جانرىنداعى العاشقى تەلەحيكايا كورەرمەنگە جول تارتتى. جۇمىس كۇندەرى «قاشقىن» اتاۋىمەن ەفيرگە شىعاتىن تۋىندى قوعامنىڭ وزەكتى ماسەلەسىنە اينالىپ وتىرعان جەمقورلىق, تەرىس ءدىني اعىمداردىڭ اسەرى, ءداستۇردىڭ قۇنسىزدانۋى, وتباسى قۇندىلىقتارى سياقتى سان ءتۇرلى تاقىرىپتاردى ارقاۋ ەتەدى.
سونىمەن قاتار تەلەحيكايا بۇگىنگى زامانداعى قۇقىق قورعاۋ وكىلدەرىنىڭ اسا قاۋىپتى قىلمىسكەرلەردىڭ جولىن كەسۋدەگى كاسىبي جۇمىسى مەن قوعام الدىنداعى اۋىر مىندەتىن اشىپ كورسەتەدى.
«جەمقورلىق پەن اشكوزدىك جايلاعان قوعامدا سەنىم, بىرلىك, باۋىرمالدىق جوعالادى. جاڭا تۋىندى بيىك ادامگەرشىلىك قاسيەت پەن ادال ەڭبەك جولى عانا قوعامدى جاقسىلىققا جەتەلەيتىنىن, ادامي وركەنيەتتىڭ نەگىزى تازا جولمەن قىزمەت ەتۋ ەكەنىن اشىپ كورسەتۋدى ماقسات تۇتادى. تەلەحيكايا وڭاي جەردەن ولجا ىزدەگەن جاننىڭ قايشىلىققا تولى, جاعىمسىز ءومىرىن بەينەلەۋ ارقىلى وزگەلەرگە وي سالۋدى كوزدەيدى. تۋىندىنىڭ نەگىزگى يدەياسى – اينالاسىنا زيانىن تيگىزەتىن ادامنىڭ ءومىرى تىعىرىققا تىرەلەتىنىن, زاڭ ادىلدىگىنىڭ قاي كەزدە دە ۇستەمدىك قۇراتىنىن كورسەتۋ», دەيدى «قازاقستان» ۇتا ەفيرلىك ساياسات ديرەكتسياسىنىڭ ديرەكتورى باعجان بيمۇراتوۆا.
باستى رولدەردى قازاقستاننىڭ حالىق ءارتىسى تىلەكتەس مەيراموۆ, قازاقستاننىڭ ەڭبەك سىڭىرگەن قايراتكەرى باۋىرجان قاپتاعاي سىندى ەلىمىزگە بەلگىلى تانىمال اكتەرلار سومدايدى. تەلەحيكايا «Qazaqstan» ۇلتتىق تەلەارناسىنان اپتانىڭ جۇمىس كۇندەرى 21:30-دا كورسەتىلەدى.
«ەگەمەن-اقپارات»