پارلامەنت سەناتىنىڭ توراعاسى داريعا نازارباەۆا سولتۇستىك ماكەدونيا رەسپۋبليكاسى اسسامبلەياسىنىڭ توراعاسى تالات دجافەريمەن كەزدەستى. داريعا نازارباەۆا ءوزىنىڭ كىرىسپە سوزىندە قازاقستان سولتۇستىك ماكەدونيانى ماڭىزدى ساياسي ارىپتەس رەتىندە قاراستىراتىنىن جانە ەكى ەل اراسىنداعى ديپلوماتيالىق قاتىناستار ورناعان ساتتەن بەرگى العاشقى رەسمي پارلامەنتتىك دەلەگاتسيا ساپارىنىڭ ءمانى زور ەكەنىن اتاپ ءوتتى, دەپ حابارلادى پارلامەنت سەناتىنىڭ ءباسپاسوز قىزمەتى.
سەنات باسشىسى سولتۇستىك ماكەدونيانىڭ ەۋروپالىق ينتەگراتسياسىنداعى ۇلكەن ىلگەرىلەۋىن ەرەكشە اتاپ وتە كەلىپ: «سىزدەردى قۇتتىقتايمىز جانە ماكەدونيامەن ىنتىماقتاستىعىمىز جالعاسا بەرەدى ءارى سەنىمدى دوسىمىز بولادى دەپ ۇمىتتەنەمىز», – دەدى.
سەنات توراعاسى ت.دجافەريدىڭ ساپارى ەكى ەل اراسىنداعى ءوزارا ءتيىمدى ىنتىماقتاستىقتىڭ جاڭا كەزەڭىنە اياق باسۋ بولاتىنىنا سەنىم ءبىلدىردى. «ەۋرازيا ەلدەرى پارلامەنتتەرى سپيكەرلەرىنىڭ كەڭەسى العاش رەت نۇر-سۇلتان قالاسىندا ءوتتى. وسى كەزدەسۋلەردىڭ ءبارى ەۋرازيا اۋماعىنداعى ينتەگراتسيالىق ۇدەرىستەردە پارلامەنتتەردىڭ ءرولى جىل سايىن ۇلعايىپ كەلە جاتقانىن اڭعارتادى», – دەدى سەنات باسشىسى.
سولتۇستىك ماكەدونيا رەسپۋبليكاسى اسسامبلەياسىنىڭ توراعاسى تالات دجافەري ءوز تاراپىنان پارلامەنتارالىق بايلانىستاردى نىعايتۋعا مۇددەلى ەكەنىن ءبىلدىردى.
ت.دجافەريدىڭ ايتۋىنشا سولتۇستىك ماكەدونيا قازاقستاننىڭ بارلىق حالىقارالىق باستامالارىنا, اسىرەسە بۇۇ مەن ەقىۇ اياسىنداعى قىزمەتىنە قولداۋ بىلدىرەدى. ول بارلىق سالالاردا, سونىڭ ىشىندە تۋريزم, اۋىل شارۋاشىلىعى, ءبىلىم بەرۋدە ءوزارا ءىس-قيمىل دەڭگەيىن ارتتىرۋ ءۇشىن ەكىجاقتى قاتىناستاردىڭ بارلىق الەۋەتىن پايدالانۋ ماڭىزدى ەكەنىن اتاپ ءوتتى.
كەلىسسوزدەر اياسىندا سولتۇستىك ماكەدونيا رەسپۋبليكاسى اسسامبلەياسىنىڭ توراعاسى ەكى ەل اراسىنداعى ۆيزاسىز ءتارتىپ ماسەلەسىن شەشۋدى جەدەلدەتۋدى ءوتىندى. «بۇل ساۋدا-ەكونوميكا سالاسىنا وڭ اسەر ەتەدى», – دەدى ول.
داريعا نازارباەۆا ارىپتەسىنىڭ سوزىنە قولداۋ ءبىلدىرىپ, بۇگىنگى كۇنى قازاقستاندا ينۆەستورلار ءۇشىن بارلىق جاعداي جاسالعانىن جانە بيزنەس-كليماتتى دامىتۋدىڭ بەرىك زاڭنامالىق بازاسى قالىپتاسقانىن ايتتى.