يراندا تۇركى حالىقتارىنا ورتاق ۇلى تۇلعا قورقىت اتا كىتابىنىڭ قولجازباسى تابىلدى دەگەن جاڭالىق عىلىمي قاۋىمدى ەلەڭ ەتكىزىپ, قازاق ەلىندە دە سۇيىنشىلەي تارالىپ جاتىر. يۋنەسكو-نىڭ ماتەريالدىق ەمەس مۇرالارى تىزىمىنە ەنگەن قورقىت اتا كىتاپتارىنىڭ ەكى نۇسقاسى بارىن, ونىڭ كونە قولجازبالارى درەزدەن جانە ۆاتيكان قالالارىندا ساقتاۋلى ەكەنىن عىلىمي ادەبيەتتەردەن وقىپ كەلدىك. ال كولەمى جاعىنان ول ەكەۋىنەن بارىنشا تولىعىراق نۇسقاسىن يران يسلام رەسپۋبليكاسىنىڭ استاناسى تەگەراننان كەزدەيسوق تاپقان قازاق قانداسىمىز ءۋالي مۇحاممەد قوجا ونىڭ كوشىرمەسىن اتاجۇرتى ماڭعىستاۋعا اكەلىپ, Yessenov University وقىتۋشىلارى مەن ستۋدەنتتەرىنە ارنايى تانىستىردى.
ماڭعىستاۋدا XIX عاسىردا ءومىر سۇرگەن اقىن, باتىر, ءدىني اعارتۋشى حاتام يشان (حاتام شايىر) اۋليەنىڭ تىكەلەي ۇرپاعى ءۋالي مۇحاممەد قوجا بۇعان دەيىن دە قوجا احمەت ياساۋي حيكمەتتەرى جازىلعان قولجازبالاردى تاۋىپ, قازاقستان رەسپۋبليكاسىنىڭ يران يسلام رەسپۋبليكاسىنداعى ەلشىلىگىنە وتكىزگەنىن, نەگىزىنەن ەسكى قولجازبالار جيناۋمەن اينالىساتىنىن اڭگىمەلەدى.
ونىڭ مۇنداي جاڭالىقتارىنا دەر ۋاقىتىندا نازار اۋدارىپ, قازاق عالىمدارىمەن بايلانىس ورناتۋىنا مۇمكىندىك تۋعىزعان تۇركسوي حالىقارالىق ۇيىمى قىزىلوردا, ماڭعىستاۋ وبلىستارىنا الدىرىپ, كونفەرەنتسيالارعا قاتىستىرىپ كەلەدى.
ماڭعىستاۋداعى جالعىز مەملەكەتتىك جوعارى وقۋ ورنى - ش.ەسەنوۆ اتىنداعى كمتيۋ ستۋدەنتتەرى اتامەكەنىنە ولجالى كەلگەن مارتەبەلى مەيماننىڭ اسەرلى اڭگىمەلەرىن ىقىلاسپەن قىزىعا تىڭدادى.
كەزدەسۋ سوڭىندا يران مەن قازاقستان اراسىنداعى عىلىمي, مادەني قارىم-قاتىناستى ارتتىرۋعا اتسالىسىپ, الەمدىك دەڭگەيدەگى ادامزاتتىڭ ورتاق رۋحاني قۇندىلىعىنا اينالعان قورقىت اتا كىتابىنىڭ ءوزى تاپقان نۇسقاسىن كەڭ قولدانىسقا ەنگىزۋگە قىزمەت ەتىپ جۇرگەن ءۋالي مۇحاممەد قوجاعا ۋنيۆەرسيتەت رەكتورى بەرىك احمەتوۆتىڭ العىس حاتى تابىستالىپ, قۇرمەت كورسەتىلدى.
ماڭعىستاۋ وبلىسى